Bgayet: asunded n yiselmaden n uɣerbaz amenzu

Aseggas segmi i d-iberreḥ uneɣlaf n usegmi ɣef nniya-nsen ad qeεden addad n useɣri deg uɣerbaz amenzu.

Anda i yella yetturaǧu, ad tbeddel liḥala n uselmad n uswir-a, i yettwaḥeqren nezzeh, ama sdat n wid n uswir alemmas, neɣ d wid n tesnawit. Lameεna ar ass-a mazal ur d-iban tiqqit.

D ayen i yeǧǧan iselmaden n Bgayet xedmen asunded ass-a sdat tenmehla n usegmi. Anda i ssuturen ad mtawan yizerfan-nsen akked yiselmaden n yiswiren-nniḍen.

Γef leḥsab-nsen, ulac amgerrad gar-asen, ula d igerdasen, d ayen i yeksab wa, i yesεa wayeḍ, neɣ ahat xir. Ihi acimi i mgaraden deg lexlaṣ, akud n uṣeɣri, d yixeddimen-nsen daxel n uɣerbaz.

I yisalli asunded-a ur d-yelli ara di Bgayet kan, maca ula deg kra n twilayin-nniḍen. Rnu i waya, iselmaden-a εewwlen-d d akken, ma ur d-rrin ara wid teεna temsalt i wayen ssuturen, ad kecmen deg usended war tilas.