( Tiwlafin ).Sedduq: tuɣal tender tmes di teẓgi ( lɣaba ) n Uεeccuc

Teẓgi umu qqaren ” Aεeccuc “, d tin yeggugen ( ibeεden ) azal n sin n Yikilumiṭren ɣef wexxam n tɣiwant.

Seld imi tender deg-s tmes iḍelli, ṣṣawḍen yimezdaɣ ssensen-tt. Lameεna, d yiwen usinaryu i d-yuɣalen ass-a. D acu kan, times n wass-a teqwa nezzeh.

Γef leḥsab n yisallen i aɣ-d-yewwḍen, ɣas ulamma gren-d iman-nsen yiqeddacen n Uḥuddu aɣarim ( protection civile ),akked kra n yimezdaɣ. Maca ur ṣṣawḍen ad xedmen acemma sdat n ullebleb n tmes-a.

Daymi dɣa, i d-gren yimasayen n tɣiwant tiɣri i yimezdaɣ, akken ad d-mudden afus n tallelt. Ula d ttawil n tumnayt swejjden-t-id i wid yebɣan ad iεiwen.

Ad d-nesmekti belli, tiẓgi-a d amḍuq icebḥen s waṭas, i yeččuren d ttjur seg myal ṣṣenf. D tin i taɣbalut ( source ) n nnefs azedgan n yimezdaɣ n temnaḍt-a.