JSK: iberreḥ-d Cosider melmi ara iheggi wannar amaynut n Tizi Wezzu

Ussan-a kan i d-ffɣen yisallen ijdiden yerzan lecɣal n ukemmel d ussamed n wannar amaynu n JSK.

Dɣa, deg wawal n wid i d-yettmeslayen s yisem n termist Cosider, i yeṭṭfen lecɣal n usekfu, ad yettunefk wannar-a sey-a ɣer 12 n wayyuren. Yella-d umtawa-a ddurt-a yezrin gar yimdebbren n termist n yiqeddicen izuyaz, Tanmehla n Yilemẓiyen d Waddal akked lwali n ugezdu n Tizi Wezzu.

Ad d-nesmekti dakken llan ḥebsen lecɣal n wannar-a n Tizi Wezzu teɣzi n sin n yiseggasen aya. Armi dɣa yettwasefsex ugatu (contrat) i yemmuggen akked termist Heddad. Ɣef wakken i d-tuwwi tɣamsa n Zzayer, imir-nni tella terḍel Tenmehla n yilemẓiyen d waddal azal n 12 n yimelyaren n dinar i usekfu n lecɣal.

Yuɣ lḥal, yezga-d deg wul n temdint n Tizi Wezzu wannar-a amaynu n terbaεt n Yilemẓiyen Inaddalen n Tezwawt. Ad yesεu tizemmar n usnubget ara yawḍen ɣer 50 000 n yimnezzhen.

Yetturaǧu tura melmi ara yili usenseb n yisem-is, imi tuget n Yizwawen bɣan ad as-yettunefk yisem n uɣewwaɣ Meεtub Lwennas.