Tadiwennit akked Mass Faris GUESLEM, anelmad n tmaziɣt di tesdawit n Bgayet « ilemẓiyen n tura bnan akk tirga-nsen ɣef yinig ɣer tmura i irebḥen. Ma d nekk…..»

Ilmend n warraz amezwaru i d-yewwi ussan-a, ungal-is, d kra n tlufa nniḍen, yerra-d Mass Farid Gelsem i yisteqsiyen-nneɣ s tumert.
Ha-t-aya wayen iɣef nemmeslay.

Aɣmis isaḥliyen : di tazwara ad ak-iniɣ d amerbuḥ warraz amezwaru “Muḥend Akli Ḥaddadu” i d-tewwiḍ deg teẓrigt tis 04 nn ugraw n udlis.
Send ad nebdu tadiwennit-nneɣ, mmeslay-aɣ-d fell-ak, d anwa-t Mass Farid Gueslem?

Farid Gelsem: tanemmirt a Mass ɣef userbeḥ, tanemmirt daɣen i uɣmis Isaḥliyen i d-yefkan tagnit i tdiwennit-a. Dɣa d tagnit i wakken ad snemmreɣ tidukkliwin iqeddcen i tutlayt d yidles n tmaziɣt, gar-asent tidukkla AGRAW n Uẓru n At Ccmini ɣef uqerruy-is Smaεil Uddan (aselway) akked Nadir Uddak (amaray amatu).
Farid GUESLEM d ilemẓi i izedɣen deg Xeṛṛaṭa. D anelmad deg useggas wis sin di tesdawit n Bgayet deg taɣult n Tutlayt d Yidles n Tmaziɣt (Tasnalest.Sεiɣ yakan agerdas deg taɣult  takrura (Chimie). D amaru, sεiɣ yiwen n wungal i d-yeffɣen deg wamber 2022, ungal umi fkiɣ azwel “Tiɣri n tlelli”, yes-s daɣen i wwiɣ arraz amezwaru “Muḥend Akli Ḥaddadu” di teẓrigt tis rebɛa.

Γef wakken nwala tesεiḍ yakan agerdas deg tekrura (chimie), d acu i ak-yeǧǧan ad ternuḍ agerdas deg taɣult n tmaziɣt, s tiseddi deg taɣult n tesnalest n tmaziɣt (anthropologie du monde amazigh)?

D tidet, uqbel ma ad ɣreɣ tamaziɣt deg tesdawit, lliɣ sεiɣ yakan agerdas deg taɣult n tekrura (chimie). Rray-ayi i ddmeɣ iwakken ad rnuɣ ad ɣreɣ deg taɣult n tutlayt n tmaziɣt ; d leḥmala i sεiɣ i tsekla, daɣen bɣiɣ ad qedceɣ deg wayen akk icudden ɣer tutlayt-nneɣ, ama d tasekla, ama d amezruy neɣ d timetti… ɣef waya daɣen i ferneɣ ad ḍefreɣ taɣult n tesnalest i icudden ɣer tmetti tamaziɣt neɣ taqbaylit, aya s usirem ad nesnerni aswir n tmetti-nneɣ s tukksa n wuguren ideg nettidiri, anida ad d-naf tifrat, ladɣa s ttawil s n tsekla.

Mmeslay-aɣ-d ɣef wungal-ik “Tiɣri n tlelli” d wamek i icudd ɣer tmetti?

“Tiɣri n tlelli” d ungal anda εerḍeɣ ad d-fkeɣ tamuɣli-ynu ɣef kra n yisental i icudden ɣer tmetti, ad d-bedreɣ gar-asen: ṭṭar, ḥerraga, miḥyaf n tmeṭṭut deg Tefriqt, rrebrab… Saεid i yellan d ilemẓi i yeddren deg temnaḍt n Leqbayel, yebɣa tilelli, tilelli-nni i icudden ɣer tsarut i d-yeddan deg wungal. Yunag ɣer Fransa iwakken ad ibeddel tudert-is, ad inadi ɣef tsarut i yettwakren deg Tefriqt. Abrid n tsarut akked uzɣunẓer (racisme n Lurup) yeǧǧa-t ad ikemmel abrid-is ɣer Ṣṣumal, tudert dihin ɣas iberdan-is n lmut, acu kan yufa tudert-is di tmurt n ur nesɛi tudert. Hatan s umata wungal “Tiɣri n tlelli”… Ur ḥemmleɣ ara ad d-mmelsayeɣ fell-as s waṭas (yettaḍsa), uriɣ-t, ǧǧiɣ-t i yimeɣriyen ad d-mmeslayen fell-as, akken ad waliɣ yal yiwen amek i t-yefhem.

Deg wungal “Tiɣri n tlelli”, awadem yewweḍ alammi d Fransa yuɣal-d ɣer Tefriqt (ɣer Ṣṣumal). Mi ara nettwali ilemẓiyen n tura (tuget) targit-nsen ad inigen ɣer tmura n Lurup, ladɣa Fransa ; maca “Saɛid” (awadem agejdan n wungal), ur yufi ara iman-is dinna (deg Fransa),  ssegzi-yaɣ-d aya ilmend n wamek i tettwaliḍ taluft-a n yinig?

D tidet ayen i d-teqqareḍ, nettwali ilemẓiyen n tura bnan akk tirga-nsen ɣef yinig ɣer tmura i irebḥen. Ma d nekk ttwaliɣ timura-ayi deg-sent rrbeḥ d tudert yelhan, ttawilat llan, aswir n leqraya deg tesdawiyin yuli… acu kan, ayen yettnadi umdan s tidet yettili sdaxel-is, ɣas akken yeffer ; yezga yeqqaz deg yiḥulfan-is. Mi ara tḥussed ayen txedmeḍ, ɣas yelha ad ak-ḥesben d amdan seg uswir wis sin, ma yelha ad as-inin wayi nneɣ, d nekkni i t-ijemεen, i t-yesseɣren, amedya nettwali-t deg imyuraren n ddabex uḍar, yal mi ara texser kra n terbaεt taqbuct, imferrǧen qqaren ssebba d aberkan-ihin, neɣ iwacu i tessurarem wihin n Lezzayer neɣ n tmura-nniḍen ur nelli nsen. Ur as-ttakken azal iwulmen i uberrani i ten-ixulfen.

D acu-t usirem-inek ɣef tmaziɣt, tutlayt d yidles?

Idles d llsas n yal timetti, ma yetwaḥrez ad aẓen ɣer sdat, ma ǧǧan-t ad asen-yeεreq ubrid. Sɣa m nemmeslay ɣef tmetti taqbaylit neɣ tamaziɣt s umata, ad d-naf nesεa idles d amerkanti, anda amdan deg temnaḍt-a yezga iqeddec, ama i umdan, i uɣersiw, i twennaḍt, atg.  Yebna idles i icudden i wayen i as-d-yezzin s tektiwin i d yeddan d zzman. D ayen ur nezmir ara d-nebder deg kra n tefyar, ilaq-as aṭas n wakud i wakken ad d-nessefruri ayen akk i as-d-yezzin.
Ma d tutlayt, ssarameɣ ad tennerni tmaziɣt, ad ilin isnulfuyen iseklanen daɣen. Nekk ssneɣ aṭas n yinelmaden i izemren ad d-arun, sεan tiktiwin yelhan, aɣanib yecbeḥ, acu kan tkukrun ad ddmen imru, ssarameɣ ad sεun tabɣest, ad d-dehmen annar n tira.

Efk-d awal-ik i wid iqeddcen ɣef tutlayt d tsekla tamaziɣt. Rnu-d awal i uɣmis “Isaḥliyen”?

– Ferrḥeɣ aṭas mi ara ttwaliɣ neɣ mi ara ttemlileɣ wid iqeddcen i tutlayt d yidles, ɣas akken aṭas deg-sen ur sεan ara ttawilat. Ad asen-iniɣ tanemmirt s waṭas. Dɣa ad d-iniɣ tanemmirt i uɣmis Isaḥliyen i d-yefkan aṭas i tmaziɣt, ama d ayen yeεnan isallen i aɣ-d-yessawaḍ s teqbaylit, ama d ayen yeεnan asnulfu d leqdic i yettilin i tutlayt d yidles amaziɣ.

Yessasten-it Itri, 27/07/2023