Tadiwennit akked umaru-aneɣmas Aḥsen Maric: << Yella-d wasif gar uɣerbaz d umyaru, aya nesḥissif mliḥ fell-as >>
Deg tdiwennit-a newwi-d awal s tehri akked umaru-amedyaz Aḥsen Maric, nesteqsa-t yerra-d s tumert i yesteqsiyen-nneɣ.
Ḍefret adewenni-nneɣ yid-s.
Aɣmis Isaḥliyen : Nessen Aḥsen Merric(MARIC) d amedyaz, d amaru, d aneɣmas, d aselmad. Mmeslay-d i yimeɣriyen-nneɣ ugar fell-ak?
Aḥsen Maric: Meqbel ad iliɣ d ayagi irkel, lliɣ d win i iḥemmlen idles s umata, ḥemmleɣ aṭas rradyu tis snat, d nettat i yillan d aɣerbaz n tudert akked yidles, akken ḥemmleɣ ad ɣreɣ idlisen aṭas, mlaleɣ aṭas n yifennanen.
Bdiɣ ttaruɣ deg useggas 1984 asmi lliɣ di tesnawit n larebεa n At Yiraten. Bdiɣ sselmadeɣ tafizikt di Ctember 1988, sseɣreɣ daɣen 10 n yiseggasen informatique, ma d tura akka aql-i d amciwer n ttrebga deg uɣerbaz alemmas. Uriɣ di tɣamsa deg waṭas n yeɣmisen, bdiɣ 1991 akken la ttaruɣ tura daɣen. Urareɣ di 4 n yisura, xedmen daɣen d amekvafu di radyu di fransa, di tiliẓri tv4 , guraya tv akked berbère tv ar ass-a. Xeddmeɣ daɣen inadiyen deg yidles-nneɣ imawi, jemεaɣ-d aṭas n lecɣal, ukreɣ-ten-id i tatut d lmut. Xedmeɣ daɣen cameraman photographe…Ttarraɣ-d εecra tesyar deg yiwen ulemsir akken qqaren.
2) Γef leḥsab n wayen i neẓra, Mass Merric d aselmad n tfizikt, meεna tayri-s i usefru tezga yid-s. Dɣa yebda yessefray imi yella d anelmad. Yella waya?
Tayri n yidles d tsekla tezwar tafizikt s waṭas, imi tedda-d ula deg yidammen-iw, werteɣ-d annect-a sɣur jeddi Σli n Sεid Dendan i yellan d amedyaz. Asefru amenzu uriɣ-t asmi lliɣ di tesnawit deg useggas wis sin. Ḥemmleɣ tafizikt, uɣaleɣ sselmadeɣ-tt, ma d ul-iw yextar idles s umata, rriɣ-tt i tira n yedlisen. Xas ma aṭas n wid i yi-d-yessizrigen idlisen iyi-d-yessutren ad d aruɣ tiktabin n tfizikt, ugiɣ, nniɣ-as d idles-nneɣ i yezwaren, aṭas i izemmren ad aɣ-ifat. Dɣa lhiɣ-d yiss seg ul.
3)Γas aḥric n tfizikt yexḍa i tira, meεna anadi-inek ɣef tmussni yesnerna tamussni-k deg yal taɣult. Amek armi tesdukkleḍ gar uselmed d tira?
Annar usnan n tfizikt aṭas iyi-d-yerna akken ad igerrez tira-w, timuɣliwin-iw d wuswir-inu. Win ara imeqqten isefra-inu ad yefhem belli d aya i sselmadeɣ. Yerna aṭas n yimeɣriyen iyi-t-id-yennan. Tuget n yimyura imeqranen di ddunit d wid yellan deg unnar usnan. Mi ara tḥemmleḍ ur tεettbeḍ ara, ad tafeḍ akud i kulci. Nekk d ttakreɣ-d akud seg yiḍes-iw.
4)Ddeqs n yidlisen i d-tessufɣeḍ ama s tutlayt tamaziɣt, ama s tutlayin-nniḍen. Yaḍra melmi i tebda temεayt-ik akked tira?
Tadyant-iw akked tira tebda deg uɣerbaz alemmas akked yiselmaden-inu n taεrabt, tafransist akked teglizit. Zgiɣ ttawiɣ-d igemmaḍ ifazen. D nutni dɣa iyi-d-yennan asmi ara timɣureḍ ad teffɣeḍ d amyaru. Imir-n ur zmireɣ ara ad amneɣ belli d ayen ara d yeḍrun.
Ma d asefru amenzu i uriɣ, uriɣ-t di tesnawit abderrahman el illuLi deg useggas wis sin aseggas n 1984, seg yimir-n ar ass-a mazal-it yettazzal, la yessibrik tiwerqtin s yisefra, timsaεraq timucuha, innan, inzan, ungalen. Ineggura-agi urεad iten-kfiɣ.
Talɣejjit n tudert-iw di tira tella-d asmi i d-ffɣen yisefra-yiw di marikan di tefsut 2005.
5)Tettwaxdem tsuqilt i tuget n yidlisen-ik i tutlayin-nniḍen, ama d taεrabt, tarumit, neɣ d taglizit. D acu i ak-d-yerna waya s yisem-ik d amaru?
Tasuqqilt tleddi-d tiwwura i umyaru akken ad t-issinen di lberrani, akken daɣen ad t-issinen imeɣriyen nniḍen yessexdamen tutlayin-a di tmurt-nneɣ ladɣa imi qqaren-tent di rebεa yeswiren n leqraya. Aya d ayen iyi-sferḥen mliḥ imi ḥemmleɣ tutlayin irkel, yeǧǧa-yi daɣen ad issineɣ ugar di tsekliwin agi d tmura- nsent.
Mussaneɣ ugar di tmura, kesbeɣ imeddukal n yimru, akked imeɣriyen iberraniyen.
Ffɣen-d yisefra-yiw deg tmenya n yedlisen anda i kkan waṭas n yimedyazen n umaḍal, u yella wanda ala nekk i yellan d azzayri ama di fransa neɣ di marikan.
6)Γef leḥsab n wayen i teddreḍ, d aniwa-ten yidlisen yettnuzun s ṭṭaqa, s wacu tutlayt i ttwarun?
Tuget n yidlisen-inu εawdeɣ-asen-d asizreg gar 3 alama d 6 n yiberdan ladɣa s tmaziɣt akked tafransist d teglizit.
Idlisen i yettnuzun s waṭas d idlisen n tmaziɣt akked tafransist ad t-id-tetbaε teglizit syin ɣer-s d taεrabt. Aya daɣen ɣef leḥsab n temnaḍin anda i rezzuɣ, tisdawiyin, tifaskiwin akked reḥbat n yedlisen.
7)Deg yidlisen-ik tgemreḍ-d ddeqs seg tgemmi timawit-nneɣ. Ama d inzan, timseεraq….. Dɣa d leqdic i yessran i ddeqs n unadi. Ansi i d-tettawiḍ isallen ugar?
Nek d win i iḥemmlen ad yinig, leḥḥuɣ ɣer tfaskiwin, rreḥbat n yedlisen, timeɣriwin tidelsanin akken tikwal qessdeɣ imɣaren d temɣarin mi ara yessefk lḥal. Tikwal leqqḍeɣ-ten-id kan akka deg awal, d acelqef i ten-id-ccelqafeɣ. Tamnaḍt n leqbayel, ferruɣ-tt-id akken iwata. Acku leqdic agi yeṭṭef-iyi 38 n yiseggasen n unadi. Jemεaɣ-d daɣen innan, timucuha, awalen d yisefra iqburen. Ayen akk ẓriɣ yesεa azal sseḥbibireɣ fell-as akken ur aɣ-yettruḥ ara. S yissen akk ara tidir tutlayt-nneɣ.
8)D acu-ten wuguren i k-d-imagren ?
Uguren qwan, acku mi ara k-tili lḥaǧa deg wul tiwḍin ad tawḍeḍ. Ugur amezwaru leɣla n lkaɣeḍ, ugur n uzuzer n yedlisen di tmurt s lekmal d tuffɣa-nsen ɣer lberrani. Aɣbel n tnedlisin ala yettenqasen u daɣen qlil-it wid yettaken azal i udlis, amaru-ines neɣ imeɣri.
Ilaq uεiwed n tmuɣli deg unnar-a am tmura tiberraniyin. Akken daɣen amaru yettuḍerref di tmurt-is. Qlil-it leqdicat daɣen am akken ur yelli ara di tmetti-ines, inelmaden n temnaḍt-is ur ẓrin ara belli yella. Leqdic-a i ilaq ad t-xedmen iselmaden n temnaḍt-nni akked uɣlif n tterbiga ula d tiddukliwin tidelsanin. Yella-d wasif gar uɣerbaz d umyaru, aya nesḥissif mliḥ fell-as.
9)Tkecmeḍ zik deg umaḍal n tɣamsa. Ḥku-yaɣ-d ɣef termit-ik?
Amaḍal n tɣamsa bdiɣ-t deg useggas 1991 deg Alger républicain, uriɣ daɣen deg le soir d’Algerie, El massa, la dépêche de kabylie, DNK, tangalt, …d kra n les sites deg l’ internet akken sεiɣ daɣen ablug-inu anda xedmeɣ kra n tdiwenniyin i kra n yicennayen d imedyazen. Ttaruɣ mi ara sεuɣ kan cwiṭ n wakud imi zgan ččan-iyi lecɣal. Aṭas n yemyura imaynuten i ttεawaneɣ akken ad d-ssufɣen idlisen-nsen. Rnu daɣen axxedim-inu di tiliẓri Berbère télévision, akked uɣerbaz.
10)Adlis-ik aneggaru i d-tessuffɣed deg-s ugar n 7020 n yinzan. D leqdic n ugar n 36 n yiseggasen. Acimi armi d tura i d-yeffeɣ? Mmeslay-aɣ-d ugar fell-as?
Akken qqaren almi d tura i d-yuwwa. Ugur amezwaru d tadrimt, wis sin akken ad tfakkeɣ s tira wa ad t-sseɣtiɣ, akken ad d-afeɣ daɣen imsizreg. D yiwen udlis i yellan deg wul yewwi-yi aṭas n lweqt d lǧehd maεna ferḥeɣ aṭas mi i-d-yeffeɣ. Aṭas iyi-cekren fell-as u yenza mliḥ. D yiwen n yijifer n yidles-nneɣ i d-menεaɣ si lmut imi tuget n yinza-nni sɣur yemɣaren i ten-id-jemεaɣ, mmuten tura.
11)Ur tettuḍ tawennaḍt d useḥbiber fell-as deg tira-k. Amek i tettwaliḍ tawennaḍt ass-a, d acu-ten yiwellihen i tzemmreḍ ad tefkeḍ i yiɣermanen-nneɣ akken ad ḥerzen tawennaḍt?
Γef twennaḍt jebdeɣ-d nnaqus acḥal-aya, imi uriɣ asefru agi deg useggas-nni 2008. Akken ad yaweḍ yizen wa ad iyi-d-slen ssuqleɣ-t ɣer tefransist, taεrabt akked taglizit u yeffeɣ-d di rebεa n yedlisen s tutlayin-a. D asefru I iεeǧǧben nezzeh i tmeɣnast Greṭa Temberg n tmurt n la Suède mussanen mliḥ deg umaḍal xas ma meẓẓiyet.. Tessenmer-yi aṭas ɣef usefru-a. Nezmer ad t-naf deg ugar n walef n imukan di l internet s 4 n tutlayin, akken ara d-yeffeɣ d tazlit akka ar zdat. Ad d-0yeddu deg u cd inu n yisefra ara d-yeffɣen gar-aɣ d kra n waguren..
Tagara-ya εawdeɣ ssufgheɣ-t-id s wunuɣen , rniɣ-as tugniwin i yeddan d wawalen i d-nniɣ. Ttekkaɣ yiss deg waṭas n tfaskiwin ɣef twennaḍt.
12) Ula d uraren idelsanen tefkiḍ-asen azal-nsen, yerna d ayen ḥwaǧen nezzeh warrac-nneɣ. Ahat umren s waya?
Tagara-ya arraw-nneɣ ckunṭḍen aṭas ɣer wallalen agi n teknulujit neɣ internet. Xemmeɣ ad d-afeɣ s wacu ara uraren s tkarḍiwin yerna daɣen zemren ad uraren tawacult irkel. Xedmeɣ-d akka ar tura 6 n wuraren s tkarḍiwin deg-sen timsaεraq s tmaziɣt ,tafransist, taεrabt d 3 nniḍen d innan n yiɣersiwen d twellaft-nsen d yinzi i d-ǧǧan, akked daɣen agemmay n tmaziɣt s usekkil amecṭuḥ d usekkil ameqran s tkarḍiwin anda yal asekkil yedda-d deg awal tella daɣen tewlaft–is.
13- Ur teqqimeḍ ara kan deg ujmaε n temsaεraq maεna terniḍ-d ula d asnulfu-nsent. Acḥal i d-tesnulfaḍ ?
Yelha ma nejmaε-d ayla-nneɣ maεna yelha daɣen ma nerna nesnulfa-d. Snulfaɣ-d ar ass-a 3500 n temsaεraq s tmaziɣt ssuqleɣ-tent ɣer tefransist, taglizit akked taεrabt.
Akka ar tura ssufɣeɣ-d adlis n temsaεraq i d-snulfaɣ s tmaziɣt, yeffeɣ-d daɣen s tefransist yessuqel-it uḍeggal-iw Hacene ZENINE, nessuqel-it daɣen ar taεrabt nekk d tmeṭṭut-iw. Yeffeɣ-d daɣen udlis nniḍen s yizwel LES DEVINETTES DE M. MARICHE i yessuqel Lwennas Améiane.
14-Ula d annar n uẓawan tefkεḍ-as azal-is daɣen ?
Mi ara tḥemmleḍ lḥaǧa, ad tkecmeḍ deg-s s telqey wa d-tḥemmleḍ akk ayen i tesεa d wayen is i as-d-yezzin.
Mbeεd mi i d-ssufɣeɣ idlisen, xemmeɣ daɣen ɣer wid ur nessin ara ad ɣren. Ssufɣeɣ-d aḍebsi (cd)n yisefra-inu s lmusiqa deg useggas n 2008. D amud-iw TAΣEZZULT-IW s lekmal. Deg-s 25 n yisefra s 6 n wallalen n lmusiqa anda i d-ttekkan inaẓuren imeqranen Idir BELLALI, Salem KERRUC, Said KERMAS, Djamal FARES, Husin LAKHEL. Deg useggas 2021 rniɣ-d aḍebsi wis sin TIDERRAY deg llann 33 n yisefra s setta wallalen n lmusiqa am umezwaru-nni.
Qedceɣ akked waṭas n yicennayen daɣen, fkiɣ-asen isefra-inu cnan-ten gar–asen: Ferruǧa, Σelǧia, Meriem Si Aḥmmed, Idir Bellali, Karim Si Amur, Remdan Mechache…
D ayen i iεeǧǧben mliḥ i wid iyi-ḥemmlen u d ayen iyi-ǧǧan ad gemneɣ ad d-rnuɣ iḍebsiyen nniḍen, ad xedmeɣ d yicennayen nniḍen gar-asen Meziane HARROUCHE
15- D acu i d isenfaren i tettheyyiḍ daɣen sya d asawen?
Adlis n temsaεraq id-snulfaɣ s tmaziɣt d tsuqilt-ines ɣer tefransist yessuqel-it Hacene ZENNINE aḍeggal-iw akked tasuqilt-ines ɣer teglizit daɣen.
Adlis n yinzan i d-jemεaɣ s uzwel “TAQBAYLIT S YINZAN “ Aḥric-is wis sin ara yesεun ugar n 7000 n yinzan daɣen.
Acd n yissefra-inu s lmusiqa i yexdem unaẓur-nneɣ Muḥ bugaci.
Amud n temsaεraq daɣen id-jemεeɣ ɣer yemɣaren i yesεan ugar n 1000 n temsaεraq.
16)Tanemmirt imi i d-terriḍ i yesteqsiyen-nneɣ. Awal-ik n taggara ?
Tuklalem a gma. Nekk yeqqaren tasɣunt agi-nwen d ayen yessefraḥen yal tikelt. Tanemirt-nwen s tussda. Afud iǧehden . Azul d aḥmayan i yimeɣriyen-inu d wid akk iyi-ḥemmlen.
Testeqsa-t Tiziri