Tajmilt i Mass Amar Abdun, mmi-s n taddart n At Smaεel

Tennezlaz taddart n At Smaεel Bgayet s tmettant n yiwen seg warraw-is, i yeṭṭfen amkan lεali deg ulawen n yimezdaɣ n taddart-a akken ma llan. Mass Abdun Amar ( Abdoune Amar) i yellan yehlek ussan iεeddan, yettdawi deg sbiṭar n Xerraṭa, yeggeḍ leεfu n bab igenwan ass n acer 04 mayyu 2025 yezrin, deg lεemr-is anagar 47 n yiseggasen.

Tamettant n Dda Ɛemar teɣli-d ɣef yimezdaɣ am ssiεqa, imi yiwen ur yenwi fell-as, yeǧǧa-d ccema d tbuqqilt deg ulawen n twacult-is, arraw-is d wid akk i t-yessnen. Ayagi imi yella d amdan i yettqadaren wiyaḍ, d win i yettεawanen s wayen yezmer ladɣa isdawanen n temnaḍt n At Smaεel, d win yesmuzguten, d win iεerrḍen ad tent-yeffru mara mmcubbkent, d argaz yettaken lɣerḍ ama i umeqqran, ama i umecṭuḥ, d win yezgan yecmummeḥ ɣas ma tikwal ul yeččur.

Dda Amar d bu yiles ḥlawen, s yes-s ikcem ɣer wulawen n medden. Netta i yellan d asenselkam ( informaticien ) di tsedawit n Bgayet, yennuɣ d ddunit armi yeggeḍ ɣer lebɣi-s. Γas ma yella seg yimeεḍar n tfekka, werǧin yebra i usirem, neɣ yeḥseb iman-is d ameεḍur. D anemgal yella seg yigeεmura n wallaɣ i yesεan tigzi taεlayant, yessaweḍ yes-s yeṭṭef amḍiq-is n uxeddim di tsedawit n Bgayet. Kra win i t-yessnen iḥemmel-it yettqadar-it, imi yella d amedya n tebɣest i wiyaḍ.

Rnu i uxeddim-is, yella daɣen d aεeggal di tdukkla tinmettit n yimeεḍar ” tiɣri”, dinna yettak afus i yimeεḍar s wayen yezmer. Mačči anagar imeεḍar i iḥemmel ad iεawen, meεna kra win yesεan ugur deg uselkim-is neɣ yebɣa kra n yisalli yeεnan tasenselkimt ad yerzu ɣur-s.

<< cfiɣ asmi kecmeɣ i tikkelt tamezwarut i tesdawit, d netta i yeṭṭfen akaram-iw ijerred-iyi, d awezɣi ad t-ttuɣ wass-nni imi yemla-yi-d akk ayen ilaq ad xedmeɣ, yefka-yi-d ula d iwellihen ɣef ddunit, yekkes-iyi akk tuggdi-nni i lliɣ sεiɣ. Ula d azmummeg-is d ddwa >> i aɣ-d-tenna S.M i yellan d tasdawant di tesdawit n Bgayet.

Di taggara, yeqqim-aɣ-d kan ad ak-d-nini sgunfu di talwit timezgit, ad teqqimeḍ deg ulawen-nneɣ i lebda.

Sɣur : tafukt n yiḍ