Walit 50 n yismawen imaziɣen igerrzen maḍi
Découvrez 50 prénoms amazighs les plus beaux
Tuɣalin ɣer laṣel tbeddu seg tlalit n yiwen. Ihi yewwi-d ɣef myal yiwen deg-neɣ ad yeḍfer abrid n tjaddit. Seg wayen ilaq ad neṭṭef deg-s, d asemmi n warraw-nneɣ s yismawen-nneɣ Imaziɣen, Iqbayliyen.
Daymi i awen-d-newwi deg umagrad-a 50 n yismawen n warrac akked teqcicin i icebḥen nezzeh akked yinumak-nsen.
ARRAC:
Azwaw: d isem aqbur, anamek-is d Aqbayli bu tissas, neɣ d Aqbayli yesεan nnif d tirrugza.
Amaziɣ: neɣ Maziɣ, anamek-is d argaz ilelli( homme libre), bab n yiseɣ, neɣ d anaṣli.
Asalas: neɣ Salas, anamek-is d igejdi alemmas n wexxam.
Gaya: d isem aqbur, d isem n baba-s n Masensen (Masinisa).
Idir: d isem yellan ɣur Imaziɣen akk, d asfillet i tudert, seg umyag yedder.
Yugurten: D isem aqbur, d isem n ugellid Amaziɣ, wagi d mmi-s n gma-s n Mikawsen, mmi-s n Masensen. Anamek-is, d win ifazzen, neɣ d win i ten-yugaren
Masensen: yusa-d si Mass-nsen, neɣ agellid-nsen. Masensen (Masinisa) yeqqim d agellid ugar n 50 n yiseggasen, d netta i yezdin Tamazɣa.
Maksen: d isem n waṭas imsudmawen izrayanen n tallit talemmast. Yusa-d si amaksan ” aεdaw, acengu “.
Masin: si Mass-in neɣ Mass-inu ” agellid-inu “neɣ d talɣa tawezzlant n Masinisa.
Mennad: seg ” amennad “, win yettemnaden, win yettwalin ɣer sdat.
Meẓyan: mazal-it meẓẓi, neɣ d ameẓẓyan. Aṭas i t-yettakken i tarwa-nsen.
Aksil: d isem atrar, i yettwaseqdacen nezzeh iseggasen-a ineggura. Anamek-is d isem n yiwen uweqqas bu izrigen, yettcabi ɣer uɣilas.
Aylan: neɣ Haylan, d isem atrar, d amaraw n yiwet n tewsit yeddren deg ugafa n Merruk. Deg tmedyezt, aylan d aɣer : d lḥelya neɣ d aqezdir n wuzzal neɣ n weglim yettaṭṭaf ɣer yiɣil-is win yettnaɣen akken ad yeḥrez neɣ ad yeddari iman-is.
Ayyur: neɣ aggur (la lune). D isem-is i d anamek-is; d tafat, d ccbaḥa.
Itri: isem-a daɣen, d azamul n temlel d ccbaḥa. Maca yesεa anamek n cciεa d tefrarit.
Izem: d azamul n tezmert, n tebɣest, n tissas d tirrugza.
Asmil: d isem atrar i yettwasqeddcen nezzeh deg iseggasen ineggura, anamek-is d titrit n unagraw afukan neɣ ayen umi qqaren s tefransist (la comète).
Anir: d isem atrar ula d wa, anamek-ik d aneglus (ange).D win yellan d aseεdi, d uḥdiq.
Aflawas: ur yettwassen aṭas yisem-a. Anamek-is, d argaz yennecraḥen, neɣ iferḥen dima.
Yuba: Yuzzel mliḥ wawal-a ɣur twaculin Tizwawin d Tmaziɣin s umata. D isem n ugellid Amaziɣ
Yubasin: akken iban yisem, d Yuba wis sin. D agellid Amaziɣ i iḥekmen deffir n Yuba I.
Sifaks: d agellid n Yimaziɣen imasasilen, ɣef wakal yellan si Sirṭa ar tama n Wihran.
Asirem: neɣ sirem (espoir). Iban unamek-is. D ayen icudden ɣer wayen akk itekksen layas d leḥzen.
Amastan: d isem aqbur, yella ɣur itergiyen. Yusa-d seg umyag ” ḥudd, ihi amastan d amḥaddi
Amayas: neɣ Mayas, d yiwen uweqqas yettcabin ɣer uɣilas.
D isem n umeskar n wemyag ayes ” lḥu ” s lemxatla.
TIQCICIN:
Tasedda: d isem unti n yizem, d azamul n tebɣest. D tameṭṭut izemren ad tqubel kullec.
Tafat: mačči aṭas i t-yettakken ar tura yisem-a ulama ifaz. D azamul n ccbaḥa, ssfa d tezdeg..
Tafrara: Yettnemmik yisem-a tawala-nni mara d-yali wass, ad tbin tafat.
Tiziri: clair de la lune. Isem-a daɣen d gma-s n yisem Tafat. D azamul n ccbaḥa n tmeṭṭut s umata.
Tamilla: anamek-is d agḍiḍ am tetbirt, yeskanay-d ccbaḥa.
Tafsut: printemps, d azamul n ujuǧǧeg d thuski s unamek ummid.
Taninna: d yiwen n wegḍiḍ anumiy, d azamul n ccbaḥa n tmeṭṭut d ufaz-is gar tizzya-s.
Tayri: d isem-is i d anamek-is, Leḥmala, lebɣi, ccuq.
Yelda: yezmer yettnemmik yisem-a tameṭṭut yettgelliden. Meḥsub am tgellidt, tesɛa azal di tmetti-s.
Tifaggur: tif aggur neɣ tεedda ccbaḥa-s i tin n waggur.Yecbeḥ nezzeh yisem-a.
Damya: d yiwen seg yesmawen n tgellidt tamaziɣt Diyha (Kahina).
Tukyist: d tin yellan d tuḥdiqt, teččur d tekyes, rnu ɣer-s teḥrec.
Tilelli: liberté, d tin yellan d tilellit, am Tmaziɣin si zik n zik.
Tinhinan: Ti n Hinan anamek-is s tmaziɣt ” tin n yinigen neɣ tin yunagen, yettinigen neɣ daɣen tin iqiḍunen “. Akken i d-qqaren Itergiyen n Uheggar, d tamarawt-nsen.
Tanirt: d unti n yisem Anir i d-nefka yakan, d taneglust( ange).
Tumert: lferḥ, tamendit. D asfillet i tin ara d-yawin tumert, ad teεmer tumert tudert-is.
Maya: yekka-d yisem-a si tamaya” taɣect, neɣ seg umyag muyyet, umay” ḥmed “.
Mira: seg amiru neɣ amirew” tiɣin n wawal “, seg umyag mirew neɣ marew ” aɣ awal “.
Mirina: unti n mirin, isem n yiwet n tewsit tamaziɣt
Kahina: d isem i fkan Waεraben i tgellidt n Wawras yennuɣen mgal-nsen. Isem-is idetti d Dihya neɣ Damya.
Dasin: yella yisem-a ɣur yitergiyen. D uletma-s n Axamuk ag lhemma, amnukal(agellid) n Uheggar si 1921 ar 1941.
Dihya: akken i d-nura s ufella, d yiwen seg yismawen n Kahina yennuɣen mgal Aεraben asmi i d-kecmen Tamurt n Yimaziɣen.
Lunja: d isem n teqcict neɣ d tilemẓit yelhan, d tacebḥant. Nettaf-itt deg tmucuha n Yimaziɣen.
Numidya: d isem n yiwen n waẓi ahrawan n Tmazɣa i yeṭṭef Masininsa deg wagmuḍ akked Sifaks deg utaram.
Jeǧǧiga: seg ujeǧǧig, tajeǧǧigt. D azamul n ccbaḥa d ujuǧǧeg.
D ismawen-a i awen-d-nhegga ihi ma tebɣam ad ten-tefkem i tarwa-nwen.
I yisalli, tuget n yismawen-a d yinumak-nsen, nekkes-iten-id seg udlis n Kamal Naït Zerrad ” L’OFFICIEL DES PRÉNOMS BERBÈRES “. Dɣa d tagnit i wakken ad ten-nesnemmer ɣef leqdic-is igerrzen.
Walit daɣen:
Ḍefret-aɣ-d deg usebter-nneɣ n Facebook