Amaynut di tira: Taqsiḍt n Muwgli tuɣal-d ɣer teqbaylit

Ilemẓiyen Iqbayliyen n wass-a cfan-d s Muwgli i walan d unuɣen yettewliwilen (dessins animés) acḥal aya tura. Taqsiḍt-a dɣa, i d-iḥekkun ɣef yiwen n uqcic i yettidiren akked wuccanen, neɣ aɣsiyen, tuɣal-d ussan-a iεeddan ɣer tutlayt taqbaylit.

Yerra-tt-id ɣer teqbaylit Amaruyidir s yisem-is n tẓuri, Ɛmer Ɣezzali s yisem-is n tidet. Teffeɣ-d dɣa ɣer Teẓrigin Imal s uzwel n “Tanqist n teẓgi”.

Ma yella d asaḍ (héros) n teqsiḍt-a deg ulqem-a (version) n teqbaylit isemma-as umsuqel “Mayas” deg kraḍ n yiḥricen-is: “Mayas d yigulaz”, “Mayas d yibkan” akked “Mayas d wuccayen n useqdar”.

I warrac-nwen, tzemrem ihi ad tafem taqsiḍt-a yelhan deg waṭas n tnedlisin n Tmurt.