Amaynut di tsuqilt: ur yettεeṭṭil ad d-yeffeɣ s teqbaylit udlis n Faḍma At Mensur “Histoire de ma vie”

Terra-d tmedyazt-tamsuqelt Nadya Benεmer ɣer teqbaylit adlis mucaεen n Faḍma At Mensur “Histoire de ma vie” i yeččuren d timsirin d yiḥulfan. Azwel i as-tefka s teqbaylit d “Amezruy n tudert-iw”.

Ɣef wawal n temsuqelt Nadya Benεmer i nesteqsa, ur yettεeṭṭil ad d-yeffeɣ i ulzuz udlis-a i yellan akka tura ɣur yimsaggazen (imprimeurs).

Dɣa, tenna-aɣ-d s umata ɣef udlis-a i d-theyya: « Bdiɣ tira n tsuqilt n “Amezruy n tudert-iw” n Faḍma At Mansur seg tutlayt tafransist ɣur tin n teqbaylit deg yebrir 2006. Llan tteffɣen-d yidrisen-nni i d-ssuquleɣ deg uɣmis Tafukt i d-tettheyyi tdukkla Numidya n Wehran yal ayyur. Maca send aya, lliɣ xedmeɣ fell-as yiwen n ufsir (exposé) ilmend n wass agraɣlan n tfaska n tmeṭṭut, ass n 8 seg wayyur n meɣres 2003, dinna deg wexxam n Numidya. Syin akkin, yeḥbes uɣmis Tafukt mi d-imuger kra n yiɣeblan, ḥebseɣ ula d nekk tira-nni, rriɣ-tt deg rrif acku ur sεiɣ ara aselkim i tira deg-s. Yerna kecment-d kra n tlufa di twacult-iw. D ayen i yi-yeǧǧan rriɣ-tt di rrif. Armi d iseggasen-a ineggura i uɣaleɣ ɣer ɣur-sen ».

Ugar n 70 n yiseggasen ihi segmi t-tura s tefransist tmeṭṭut-a Taqbaylit, Faḍma At Mensur, tusa-d tmeṭṭut nniḍen akken ad t-id-terr ɣer tutlayt n tyemmat; taqbaylit.