Tiɣri i tikkin deg umsizwer uzzig n Lwennas Meεtub

Gren-d yisebtar n wungalen Asdawan, Iḥulfan akked Imehbal tiɣri-nsen tis sa (7) i tikkin deg umsizwer uzzig i ran d tajmilt i Lwennas n At Lewnis.

Ilmend n waya dɣa, ssuffɣen-d ulɣu, ha-t-aya d acu i d-yusan deg-s:

« I kunwi iḥemmlen Lwennas n Ayt Lewnis, ggaren-awen-d tiɣri yisebtar n wungalen Asdawan, Imehbal d Iḥulfan i umsizwer uzzig (concours spécial) deg teẓrigt-is tis 7, ilmend n usmekti arẓagan n tmenɣiwt n unaẓur d umdan igerrzen ».

Ma yella ɣef uṣaḍuf n tekkin deg umsizwer-a, yewwi-d ɣef yimtekki ad d-yaru aḍris imserreḥ akken i d-berrḥen:

« Aru-d aḍris imserreḥ s tezwawt (taqbaylit), neɣ s walbaɛḍ n tutlayin timaziɣin nniḍen, ɣef Lwennas n Ayt Lewnis d umennuɣ i d-yewwi (am tejmilt) ur yettɛedday 25 n yijurriḍen tazneḍ-t-id ɣer tansa-a: asdawan2014@gmail.com ».

Di taggara, seld taɣuri d teṣleḍt n tesqamut n yinezzurfa, ad d-ffɣen yigemmaḍ ass n 30 di yulyu. Akken i d-nnan deg ulɣu-nsen:

« M’ara ttwaktazlen yiḍrisen sɣur tesqamut n yinezzurfa i ara isennden ɣef semmus n yisfernan (tira, aḥulfu daxel uḍris, tikti tamaynut, taɣara n usenfali, aswir n tutlayt), kraḍ n yimezwura ara d-yufraren s yiḍrisen ifazzen, icebḥen, ad asen-ttunefken warrazen ɣef uqeddic-nsen. Daɣen zemren ad d-ffɣen yiḍrisen-nsen deg kra n yiɣmisen n teqbaylit!
Azemz aneggaru n uceyyeɛ d ass n 10 deg yulyu 2021. Ma d igmaḍ ad d-ttwafesren ass n 30 deg yulyu.
Afud igerrzen! ».

« Ad aruɣ tutlayt-iw, ad rreɣ tajmilt i uzamul ».