Amaynut di tira: tsuffeɣ-d tmarut Naεima Benεezzuz ungal-is wis sin
Ilmend n usmekti n tmenɣiwt n unaẓur Lwennas Meεtub, i d-yettuɣalen yal 25 yunyu, tberreḥ-d tmarut Naεima Benεezzuz s tuffɣa n wangal-is wis sin i tzewwel “Taεekkazt n lejdud”. Yeffeɣ-d udlis-a ɣer Teẓrigin Busekkin.
Yuɣ lḥal, tamarut-a tilemẓit, yelli-s n Yuɛezzuzen, di Bgayet, d lall n sin n wungalen akka tura, imi tella tsuffeɣ-d yakan ungal deg useggas n 2019 s uzwel n “Tudert n tmara”.
Ta d tukkist d tamecṭuḥt seg wungal-a amaynut i d-yernan i temkarḍit tazwawt, d i tzemrem ad tafem si tura di tnedlisin:
« – Wissen ma ad afeɣ tiririt ɣur-m i usteqsi-inu i yuεren ! Ayɣer ara yettwakreh win akken i wumi kksen ayla-s ? Xedεen-t akk deg wayen i yesεa, rnan ugin ad as-fken lehna !
– Izem, lhiba-s teqqim, ɣas limer ad d-yers d aglim, yessaggad aεdaw ɣef lebεid ! Rnu ɣer waya, win akken i yukren, yezga yettibεid, yettaggad ad yuɣal wayen akken i yewwi ɣer bab-is, ma ifat ḍefren later-is. Yal mi ara t-tekcem tugdi, ad yessugut deg wayen n diri, i wakken ad yesker rrhi, ad as-yesseεreq dayenni, i win akken i yettwakren, d acu i yebɣa ad d-yini. »
Ɣret daɣen: