Amaynut di tira: tsuffeɣ-d tmarut Silya Mula ungal-is amenzu

Yennerna-d ussan-a kan ɣer temkarḍit n wungalen n teqbaylit umaynut nniḍen i tura tmarut tilemẓit Simya Mula. Tefka-s azwel i wungal-a, i d-yeffɣen ɣer Teẓrigin Aframed, « Seg tallast ɣer tafat ».

Ɣef umaynu-a aseklan, tenna-aɣ-d massa Silya mi tt-nesteqsa: « Seg zik yakan, ttaruɣ isefra , iḍrisen, d acu ur asen xeddmeɣ ara ccan. Ttcerrigeɣ-ten, ttḍeyyireɣ-ten. Armi d asmi i uwwḍeɣ ɣer tesdawit, i bdiɣ ḥerrzeɣ ayen xeddmeɣ. Ayen yerzan ungal-a, uriɣ-t asmi lliɣ d tasdawant, di 2018 gedged. Aseggas-inu aneggaru deg tesdawit. Tidet kan, d awezɣi nwiɣ ad kecmeɣ deg wannar-a, maca yuwweḍ-d wass, atan iwala tafat ».

Terna tenna-d daɣen ɣef wayen tḥulfa: « Aḥulfu-inu, ferḥeɣ aṭas m’ara ttaruɣ s tutlayt-inu n tyemmat. M’ara ttaruɣ s tmaziɣt ttḥussuɣ s yiwet n lbenna i yiman-is ».

Silya Mula d mm 28 n yiseggasen. D yelli-s n Sidi Ɛic, tettidir deg Tifra.

Yuɣ lḥal, ussan-a ad yebdu ad yettnuzu wungal-is deg buhan n tnedlisin i wid yebɣan ad t-ɣren.