USMA-JSK ( 1-0 ): d tagnit-nniḍen i ṣruḥen Yilemẓiyen n Leqbayel

D tagnit-nniḍen i sṛuḥen Yilemẓiyen n Leqbayel ass-a deg wannar n Ɛumar Ḥemmadi,di Lezzayer. Ayagi imi, xeṣren timlilit-nsen sdat n terbaεt n USMA.

Yuɣ lḥal ama d tarbaεt n JSK, ama d tin n USMA, xeṣrent di snat timliliyin-nsent tineggura.

Γas ulamma mtawant tegnatin s umata gar snat n trebbuyaε, lameεna ur ṣṣawḍen ara yinaddalen n Denis Lavagne ad skecmen iswi deg ucebbak n Zimamuc. Ma yella d inaddalen n Munir Zeɣdud, wwin-d iswi amezwaru di dqiqa tis 48, sɣur umyurar Belqasmi.

Ad d-nesmekti dakken, timlilit-a tekcem deg wass 26 n talɣuɣa ( 26e journée du championnat de Ligue 1 ).

I yisalli, timlilit-a d tis 79 gar snat n trebbuyaε. Deg-sent dɣa, terbeḥ JSK 27, s yiwet kan d zzyada ɣef USMA i irebbḥen 26.

S ugemmuḍ-a i xedment ass-a, tarbeεt n USMA teqqim deg umḍiq wis ukuẓ( 4 ), s 59 n tenqiḍin. Ma yella d JSK, teṭṭef amḍiq wiss ṣa (7) s 52 n tenqiḍin.

War ma nettu, tarbaεt n JSK mazal-as snat n temliliyin mazal ur tent-turar ara.