Amaynut di tira: terna-d Dalila Qeddac-Ccix ammud n tullisin d amaynu ɣer ulzuz

Tsuffeɣ-d imalasen-a iεeddan tmarut Dalila Qeddac-Cix adlis d amaynut n tullisin s uzwel n Tasraft n tnifift.

Iffeɣ-d udlis-a taggara n yunyu 2021 ɣer Teẓrigin El Amel. Deg-s tuwwi-d isental yemgaraden ɣef tmetti s umata d wayen i tettidir.

Nesteqsa-tt ɣef umaynut-a aseklan, terra-aɣ-d: « Tasraft n tnifift, d adlis i d-yeffɣen akken kan (yunyu). Adlis-a, d ammud n tullisin ideg d-uwwiɣ timsal icudden ɣer tudert: ama ɣef tdukkli d tegmat, ama ɣef lḥif d usirem, ama ɣef leqraya. Ulseɣ-d ula ɣef kuruna. Tikkelt-a, tella tullist ideg rriɣ azal ula i yimeɛdar ».

Ad d-nesmekti dakken Dalila Qeddac-Ccix d taneggalt (romancière) i d-isuffɣen yakan deg 2019 ungal s uzwel n “Aɛwin”, dima ɣer Teẓrigin El Amel. D tamedyazt daɣen, imi tesres-d deg ulzuz (ssuq), aseggas-a n 2021, ammud n tmedyezt. Ɣef wammud-a dɣa tenna-aɣ-d: « suffɣeɣ-d ammud n tmedyezt i d-yuwwin ɣef yisental n tudert d tmetti, semmaɣ-as Ssmaḥ ssmaḥ a baba ».