Tiwizi taqbaylit: tennulfa-d tbezzart i tiɣin n tmucuha i warrac Iqbayliyen

D aṣenfar s wazal-is i d-yexdem ugraw n kra n yimyura Iqbayliyen, i ubaɣur n warrac n Tmurt Taqbaylit i yenḍerren seg yijajiḥen n tmes yezrin.

Deg-s dɣa, εewwlen-d ad ferqen tiqṣiḍin yettwarun s tutlayt n tyemmat i yigurdan i yessεeddan ddeqs n tuggdi d lḥif, seg wayen i tga tmes deg tudrin-nsen, di ɣuct yezrin. Iswi n leqdic-a, d asekcem n tumert i wulawen-nsen, abeεda, imi amaḍal n teqṣiḍin, d win yeččuren d asugen, d win ḥemmlen yegruden, deg-s i ttafen iman-nsen.

War ma nettu, tigawt-a “Adlis i yal agrud Aqbayli” d tin ara yessbeɣsen arraw-nneɣ, ad kecmen deg wannar n tɣuri, ladɣa taɣuri s tutlayt taqbaylit.

I yisalli, ilmend i waya, berrḥen-d ɣef tbezzart (cagnotte) i wakken ad d-jemεen tadrimt i tiɣin n tmucuha-a.

Ad d-nesmekti dakken, deg uḥric-is amezwaru, 1500 n tmucuha ara d-aɣen sɣur yimeskaren-nsent ; Mhenni Xalifi d uletma-s Sabrina akked Akli Muhubi (ad d-fken nutni daɣen amur d tikci sɣur-sen).

Seg tama-nniḍen, deg uḥric n tbezzart-a wis sin, llant ula d timucuha ara d-ssuffɣen kra n wussan ɣer sdat. Tineggura-a, d tid ara ferqen i tdukkliwin n Tmurt Taqbaylit.

Ihi, i kra wid/tid yebɣan ad kkin, ad kecmen s assaɣ-a ( https://www.cotizup.com/arrac-iqbayliyen ), ad afen ugar n yisallen s tezwawt d tefransist.

Ma yella d wid/tid ur nezmir ad kkin, ad zuzzren xersum isalli-a.