Taɣuri n wungal “Taɛekkazt n lejdud” sɣur Neǧmeddin Mwayessi

Walit da taɣuri i iga mass Neǧmeddin Muɛisi (Mouaissi) i wungal “Taεekkazt n lejdud” n tmarut Naεima Benεezzuz.

Taɣuri n wungal “TAƐEKKAZT N LEJDUD”

✅ Azwel : Taεekkazt n lejdud
✅ Tamarut : BENƐEZZUZ Naεima
✅ Tawsit : Ungal
✅ Tiẓrigin : Buskin (Boussekine)
✅ Aseggas n usiẓreg : 2021 (25/06)

🚺 Tameddurt n tmarut :

BENƐEZZUZ Naεima, tlul deg useggas n 1982, d yelli-s n taddart n Yiεezzuzen deg Bgayet. Werǧin tekcim s aɣerbaz. Tuɣ-d abrid n tira s yisefra, syin tuɣal ɣer tira n wungalen, ungal-is amezwaru d win i ilan azwel “Tudert n tmara”, yeffeɣ-d deg useggas 2019.

📝 Agzul n wungal :

Ungal i ilan 159 n yisebtar, ferqen-t ɣef 12 n yixfawen. Deg-s tamarut tettales-d ɣef udrum iwumi tsemma “Ǧǧiɣkili”, d adrum i yeṭṭfen deg lasel d wansayen.
Bufrasen, d ameqqran n udrum, d targit-ines i t-yewwin ɣer tεekkazt n ddheb, taεekkazt n lejdud, taεekkazt i d-yefkan aman …
Seld Bufrasen, yekker-d Wakli, win i yebɣan ad yessefti tawacult-is, dɣa d annect-nni i yeḍran, seld mi i d-yesεa aqcic amezwaru, din i tebda ttejra-s tettimɣur, tessimɣur iferran-is deg udrum i wumi ṭṭfen leḥkem, anida i iḥekmen s leεdel, ssawḍen adrum-nsen yufrar sdat n yiderma-nniḍen …
Tismin d uɣullu, am waḍu sseɣlayen iferran n ttejra n Wakli, kra yewweḍ yeɣli, kra yeɣli ur yewwiḍ, fell-asen εewwlen ad ten-snegren …
Ssengaren deg-sen yiwen yiwen, seg Ɛebdelqader alammi d Remḍan …
Iswi-nsen ad ṭṭfen leḥkem, i wakken ad sselḥun adrum … Leḥkem ṭṭfen-t, adrum sselḥan-t, maca sselḥan-t ɣef yir iberdan …

✅ Tutlayt i tessemres tmarut d tafessast, anida i-tessemres amawal i yettwasnen deg tmetti taqbaylit, am wawalen i yecban : lasel, tajaddit, tala, tibḥirin, adrum …
✅ Isental iɣef d-tewwi tmarut d wid i icudden ɣer tjaddit, lasel, nnif, tirrugza, tadukkli, lexdeε, tismin, tayri …
✅ D asmedyez i tesmedyiz tmarut deg uɣanib-ines, anida mi ara yeqqar yiwen deg wungal-a zun d tamedyazt i yeqqar s wanya i d-yettuɣalen deg yal taseddart, d ayen i irennun tahuski i wungal, anida i as-tefka udem aseklan akken iwata.
✅ Aglam yuget deg wungal-a, ama d win n umdan neɣ d win n umkan, d ayen ara yaf uselmad n tmaziɣt ad t-yessemres deg uɣerbaz, ama d tikci deg temsirin, neɣ deg yisental n yikayaden.

✅ Akken ttwaliɣ deg wayen i d-tules tmarut BENƐEZZUZ Naεima, deg wungal-a, yettkanzi ɣer wayen i aɣ-yeḍran nekni s yimaziɣen, anida adrum n “Ǧǧiɣkili” rriɣ-t ɣer “Tmazɣa”, ma yella d taεekkazt n lejdud, rriɣ-tt ɣer wayen i aɣ-d-ǧǧan yimaziɣen-nneɣ imezwura. Ayen i yi-iǧǧan skanaziɣ tadyant n wungal-a ɣer wayen i aɣ-yeḍran d wayen i aɣ-iḍerrun, d ayen i nettwali imir-a ; deg wungal-a taεekkazt-nni n lejdud tella seḥbibiren fell-as yimezwura akken ma llan, akken i seḥbibiren yimezwura-nneɣ ɣef wayen akk i icudden ɣer tumast-nneɣ (ansayen, tutlayt …), s zerri n wakud d ubeddel n tsutwin, taεekkazt tettwaker, tettwaker sɣur yiberraniyen, akken daɣen i teḍra i wansayen-nneɣ d tutlayt-nneɣ, ɣef tukerḍa-ayi ur susmen ara yimezdaɣ n udrum, maca mačči akken ma llan, imi kra kan i d-yefkan tirwiḥin-nsen i wakken ad d-rren taεekkazt i yettwakren (anagar Remḍan, i wid i yeɣran ungal-a), akken daɣen nekni s yimaziɣen, kra kan n uɣref i d-yekkren ad yennaɣ ɣef tumast tamaziɣt, anida iɣerfan-nniḍen, kra uggaden, kra fkan afus !
Taεekkazt teqqel-d, maca s yir tuɣalin, akken i d-teqqel tutlayt-nneɣ s yir tuɣalin … ! (wayi ad yeqqim d rray-iw d wayen i ttwaliɣ).

Ɣer taggara, ad ǧǧeɣ wid ur neɣri ungal-a ad afen aya s timmad-nsen.