Amaynut di tira taqbaylit: ad d-yeffeɣ deg ussan i d-iteddun udlis ” lmed taqbaylit ” n Farid Benmuxṭar

Γef leḥsab n wayen i d-iberreḥ deg usebter-is Facebook, ad d-yeffeɣ udlis amaynut n Farid Benmuxṭar deg 21 yennayer i d-iteddun. Adlis-a, d win umu yefka azwel ” lmed Taqbaylit Apprendre le kabyle”, ihi d azwel-is i d anamek-is.

Ad d-nesmekti belli, Mass Farid d win iqeddcen nezzeh ɣef tutlayt taqbaylit, d tmaziɣt s umata. Yuɣ lḥal, netta i yellan d amaru, d amnadi deg wannar n tesnilest ( linguistique ), Mass Benmuxṭar d ameɣnas, d aneɣmas, d aselmad daɣen di tesdawit n Paris 8.

Seg tama-nniḍen, ur yelli wagi d adlis-is amezwaru, imi yella yessuffeɣ-d yakan yiwen s wazal-is, umu yefka azwel ” Le code switching en Kabylie “.

I yisalli, adlis-a ara d-yeffɣen ussan-a, yesseqdec deg-s tarrayt tatrart n uselmed. D ayen ara iεawwnen nezzeh wid yebɣan ad lemden tutlayt taqbaylit.

Ma yella d tuffɣa-ines, ad d-yeffeɣ di teẓrigin Yoran Embanner, di tmurt n Fransa. Am akken ad yili daɣen di tnedlisin, akked wadeg n umaru; www.yoran-embanner.com, d Fnac, Amazon d wiyaḍ.

Aredmani, d leqdic ara d-yawin war ccek abaɣur i tutlayt tayemmat. Ma d wid i d-yefkan afus deg-s ɣef leḥsab n umaru; taduli d Mass Muḥend Tilmatin; unuɣen sɣur Ǧamel Ɛlilat.

Nukni seg tama-nneɣ, nessaram-as afud igerrzen i Mass Farid Benmuxṭar.