Tadawsa: acimi yenqeṣ nezzeh ufmiḍi n tarrawt tagamant

Deg tallit-agi ideg nella, amur ameqqran n tlawin i yellan s tadist, rebbunt s ucerreg ( césarienne ). Γas ulamma, ttawilat n tarrawt tagamant ur xuṣṣen ara tura. Lameεna, tura i tetuqqet nezzeh tarrawt s ucerreg.

D anemgal n tlawin n zik, i yellan ur sεin ara ttawilat, meεna rebbunt deg yexxamen war ma yeḥḍer ula d amsujji ( ṭṭbib ).

Taluft-a tejbed-d awellih-nneɣ, daymi i nεemmed nexdem adewwenni akked kra n tyemmatin. Deg-sent dɣa, tid yeṭṭfen i tallit n zik, d tiyaḍ n tallit n tura. Seg tama-nniḍen, nesteqsa ula d kra n yimsujjiyen ɣef tmentilt n tarrawt s ucerreg i yernan nezzeh ladɣa deg yiseggasen ineggura.

Ha-t-aya d acu i aɣ-d-nnan:

Tiyemmatin n zik, nnant-aɣ-d belli, ɣas ulamma ur sεint ara ttawilat, lameεna ttheggint-d iman-nsent deg wallaɣ-nsent i tarrawt tagamant, imi zik ur ssinent d acu d aparaṣyun. War ma nettu, zik qessiḥ fell-asent teswiεt seg myal tama, ttwassnent tlawin s tebɣest, d leεqel s wacu ttmagarent timsal, d ayen i tent-yeǧǧan ur ttwalint ara tarrawt tagamant d ugur.
Ma yella d tamuɣli n yimsujjiyen deg waya, wekkden-aɣ-d belli tilawin n zik ur ḥebbsent ara lecɣal d tikli, d ayagi i tent-yettεawanen rebbunt war ugur. Imi, tleddi lwalda-nsent akken iwulem i wakken ad d-yeffeɣ deg-s llufan.

Ma nemmeslay-d ɣef tlawin n tallit-a, tuget-nsent ttagadent tarrawt tagamant, imi deg-s leqriḥ d leεteb. Yuɣ lḥal, llant tid i as-yeqqaren i yimsujjiyen bɣiɣ ad cerrgeɣ srid. Rnu i waya, tilawin n tura mti llant s tadist ttḥadarent iman-nsen ur ttḥerrikent ara mliḥ, d ayen i yettaǧǧan lwalda-nsent ur tleddi ara.
Ula d imsujjiyen dɣa d ayen i aɣ-d-nnan, d akken amur ageεmir n tlawin n tallit-a teqfel lwalda-nsent. Neɣ ɣas ulamma teldi mačči d wayen iwulmen i wakken ad d-yeffeɣ llufan.

Ad d-nesmekti belli, ɣas ttwalint tlawin acerreg d tifrat, lameεna ttweṣṣin yemsujjiyen ɣef tarrawt tagamant. Ayagi imi, amihi n tmettant n tmeṭṭut mara terbu s ucerreg, yugar win n tarrawt tagamt. Rnu, ɣas ulamma deg tneggarut-a yettili deg-s leqriḥ, beṣṣeḥ kra n wussan kan ad iruḥ. Ma yella d acerreg yettaǧǧa-d i tmeṭṭut leqriḥ i lebda, ama d win n weεrur, neɣ d win n uεebbuḍ.