Iɣil Ɛli: ddeqs n yinelmaden i yuḍnen aṭṭan n Corona deg tesnawit n Ɛeggun Muḥend Lyazid

Seld tafugla n yennayer, ddeqs n yinelmaden i yeqqaren di tesnawit n Ɛeggun Muḥend Lyazid n Yiɣil Ɛli, i yettwaḥuzan s waṭṭan n Corona. Ad d-nesmekti belli, ɣas ulamma llan wid igan tikmamin, yerna εerḍen ad ǧǧen listeε gar-asen d yimdukkal-nsen. Meεna, deg tfugla-a, llan wiyaḍ ur gan takmamt, ur qudren ambaεad gar-asen.

Γef leḥsab n yisallen i aɣ-d-yewwḍen, llan deg-sen ula d wid yeẓran iman-nsen uḍnen, meεna rran-tt d tamsalt n turart, usan-d ɣer tfugla-a, kecmen gar yinelmaden-nniḍen. D ayen i yeǧǧan aṭṭan-a, yeṭṭerḍeq srid seld tafugla n yennayer i gan ass n amhad ( jeudi ) yezrin.

I yisalli, yetturaǧu ad tettwabelleε tesnawit-a deg ussan i d-iteddun, imi amḍan n wid ihelken deg-s d ageεmir. Ula d ibabaten n warrac dɣa, d ayagi i ssuturen, acku ugaden ɣef warraw-nsen yeqqaren dinna.

Seg tama-nniḍen, deg uṣaḍuf, ma yella iban-d belli llan wid ihelken deg uɣerbaz, ilaq ad yesseḥbes unemhal deg-s taɣuri ma drus 10 n wussan. Ayagi, ḥalama ḥlan wid yuḍnen, neɣ iban-d belli ur llan wiyaḍ yettwaḥuzan.

Di taggara, ɣas ulamma ar tura mazal ur d-iban ma yella ad kemmlen deg tesnawit-a taɣuri neɣ xati, imi mazal ur d-ssuffɣen yemḍebbren-is rray i refden deg unejmuε i xedmen. Lameεna, aḥader d ayen ilaqen nezzeh, ladɣa imi liḥala ur d tin yeṣṣefraḥen.