At Smaɛel: mazal ur yekfi ara wugur n lexṣas n waman

Γas ma yella di tegrest i nella, meεna ur sliken yimezdaɣ n tɣiwant n At Smaεel, tadayra n Yiderginen, tawilayt n Bgayet seg wugur n lexṣas n waman. Yuɣ lḥal, ɣas ma yella uɣen tannumi seεεun ugur-a deg unebdu, lameεna aseggas-a ula di tegrest ur sliken ara deg-s.

Γef leḥsab n tnagiwin n kra n yimezdaɣ, d tiɣin i d-ttaɣen aman n useqdec, imi ttεeṭṭilen nezzeh i wakken ad d-uɣalen. Rnu i waya, mara d-uɣalen ur d-tqamen ara ula i tarda n tfekka.

I yisalli, amedya di taddart n At Tεisiwt, ttagmen-d aman n tissit seg tala-nsen ( Tala n Uregrag ). Imi, ijeεbuben anda i d-ttruḥun waman ur ṣliḥen ara, ččuren d ṣṣdiḍ.

Ad d-nesmekyi belli, tala-a teggug nezzeh ɣef yixxamen-nsen, daymi i sεeddayen wid ur nesεi takerruṣt lmeḥna taberkant i wakken ad d-ṣṣiwḍen tiqerεatin n waman s axxam-nsen.

Di taggara, yeggeḍ-aɣ-d yisalli belli tettheggi-d tɣiwant n Tṣexriwt akked tin n At Smaεel aḥerraz n waman ( château d’eau ) ameqqran. Deg-s dɣa, ara d-ttmiren waman ara d-awin seg lεenṣer Azegza.