Amaynut di tira: tsuffeɣ-d tmarut Sabrina Xalifi Ḥimi adlis-is amenzu

Ass n 14 furar yezrin i d-tsuffeɣ tmarut tilemẓit Sabrina Xalifi Ḥimi asnulfu-is aseklan di Teẓrigin tiliktrunikin lulu, s uzwel n « Ameyyez ». Seld taqsiḍt i d-tuwwi i warrac imecṭaḥ, tsuffeɣ-itt-id deg useggas n 2020, d ammud n tullisin i tsamed tmarut-a yelli-s n tɣiwant n Ayt Smaεel, Agezdu n Bgayet.

Tuwwi-d deg-s taḥawact n semmus n tullisin i d-yettmeslayen ɣef ddeqs n yisental i icudden s umata ɣer yicqirrwen n umdan akked tudert.

Dɣa, nezmer ad nɣer abruy-a n yiwet n tullist, i d-tesres di tduli: « Zwiɣ taqendurt-iw seg yiciwi, wehhiɣ afus-iw i wudem-iw, ḥessbeɣ acḥal i iɣez zzman d iḍerfan. Tuɣ-it akk tekmec armi ttḥulfuɣ s yiḍuḍan-iw ad as-tiniḍ d isennanen i ttḥazen. Ẓẓleɣ akken d tinnegnit taswiɛt, selleɣ i ssut n yisurifen deg berra. Ḥsiɣ d Sekkura i d-yerzan i ɣur-i am leɛwayed ».

Ad d-nesmekti dakken Sabrina d uletma-s n tmarut Kaysa Xalifi i aɣ-yeǧǧan deg useggas n 2018.

Di leεḍil ad teεreḍ tmeskart ad d-tsuffeɣ adlis-a ula di Tmurt, zemren si tura wat yinig ad t-id-aɣen si tansa-a n lulu (https://www.lulu.com/fr/fr/shop/sabrina-xalifi-%E1%B8%A5imi/ameyyez/paperback/product-gejp68.html?page=1&pageSize=4).