Tazmert: issin amahi n tuččit n lemleḥ d kra n yiwellihen i tezmert-nwen

Qqaren yimezwura-nneɣ, tuččit war lemleḥ, am wexxam war timeṣleḥt. Ihi akken i d-yeqqar yinzi-a, tuččit ur tettibnin ma yella d tamessast.

Rnu i waya, tissent ( lemleḥ), d win ilaqen i tezmert n tfekka-nneɣ. Lameεna, tuččit-is ilaq ad tesεu tilisa, ur tεedday ara i uṣaḍuf.

Γef leḥsab n Tuddsa Tamaḍalant n Tezmert ( OMS), ur ilaq ad iεeddi wemdan i 5 n Yegramen n lemleḥ (NaCl) deg wass. Neɣ s unamek-wayeḍ, ur ilaq ad yečč deg wass ugar n teflut n tamecṭuḥt ( tiflut n lqahwa ) n lemleḥ. Ayagi imi, zzyada-s di tfekka yettdurru tadawsa-s.

Γef leḥsab n Tuddsa Tamaḍalant n Tezmert ( TTT), ddeqs n waṭṭanen i d-yettnulfun seg tuččit n lmelḥ s zzyada.

Ama d uguren n wul, ladɣa i wid yesεan yakan aṭṭan n wul (Insuffisance cardiaque). Ineggura-a, yewwi-d fell-asen ad ssenqasen nezzeh lemleḥ.

Seg tama-nniḍen, tissent tessalay nezzeh addad n yidammen ( hypertension ) n wemdan. Yuɣ lḥal, ɣef sebba n waya yezmer ad yemmet yiwen ma ttreḍqen-as yiẓuran-is.

Am akken i d-twekked Tuddsa Tamaḍalant n Tezmert belli, win yestuqquten seg tuččit n lemleḥ, yezmer ad bellεen yiẓuran n uqerruy-is, ad yemmet s uṣraε.Neɣ dayen umu neqqar AVC ( accident vasculaire célébral ).

Aredmani, ula d axenẓir n lkerc (estomac) yezmer ad t-yesεu wemdan ma yella seg wid iḥemmlen lemleḥ.

Di taggara, llant tɣawsiwin i d-yesbeyyinen belli tuččit-ik tesεa zzyada n lemleḥ, dɣa newwi-awend kra deg-sent

1) Yettcuffu uεebbuḍ, neɣ yeččaray d lgaz

Imdanen itetten tissent s buhan, sεan ugur n uεebbuḍ icuffen, ɣef leḥsab n tɣuri i yexdem yiwen n weɣmis n tezmert n Marikan.

2) Tissit n ddeqs n waman

Amdan i yezgan yeffud, d win i yesṭuqquten tissit n waman, lmeεna-s tuččit-is tesεa lemleḥ, neɣ teɣɣenter s Sudyum ( Na).

3) Yezga deg ubduz

Win yesṭuqquten lemleḥ, xeddment nezzeh tgeẓẓal-is i wakken ad kksent zzyada-a se- tfekka-s. Daymi dɣa i yezga yettekcam ɣer webduz.

4) Ma yella tesεid imukan deg tfekka-k cuffen

Amedya ɣef waya, d ticuffiḍin i yettilin s ddaw n wallen, neɣ d iḍarren yezgan cuffen. Ayagi anamek-is, amdan-nni yessṭuqqut lemleḥ.

Tazmert d agerruj, ttḥadaret iman-nwen.