Tasleḍt n usefru n tezlit “Tudert-nni” n Lewnis Ayt Mengellat (sɣur Muḥend-Akli Ǧwaher) :
Tasleḍt taseklant
Tasleḍt n umedyez (asefru) n tezlit “Tudert-nni” n Lewnis At Mengellat, i d-isuffeɣ di 2017, sɣur umedyaz-amaru Muḥend-Akli Ǧwaher:
Amedyez: “Tudert-nni”
Ad k-awiɣ di targit-ik (A) 7
D afus ad ak-ṭṭfeɣ (B) 5
Wiss ma ad tεeqleḍ iman-ik (A) 7
Mi ara k-ssiwḍeɣ (B) 5
Ad k-awiɣ s ayen teǧǧiḍ (C) 7
Seg wass-n ar ass-a (D) 5
Ad teẓreḍ ayen iwumi ur tecfiḍ (C) 7
Wali-t di tnafa (D) 5
Ad k-awiɣ ad d-temmektiḍ (C) 7
Amek tekkreḍ ma teɣliḍ (C) 7
Ayen truḍ, ayen teḍṣiḍ (C) 7
Γas ma tettuḍ-ten (E) 5
Ayen i ak-d-yegran d ccama (D) 7
Ad twaliḍ ansi d-yekka (D) 7
Mi ara tfehmeḍ ssebba (D) 7
Ad sefḍen dayen… (E) 5
Zemreɣ ad ak-d-awiɣ (A) 5
Ayen i ak-yehwan di targit (B) 7
Ad ak-d-ṣewṛeɣ ddunit (B) 7
N wayen iεeddan (C) 5
Ad ak-d-smektiɣ (A) 5
Targit ad k-terr ɣer temẓi-k (D) 7
Ad ak-d-ssekneɣ ussan-ik (D) 7
Amek akk i vdan (C) 5
Ad ak-d-ssekneɣ asaru (E) 7
N temẓi-k amek i k-tesru (E) 7
Ad twaliḍ lḥif, zzhu (E) 7
I k-id-iṛebban (C) 5
Ayen tevɣiḍ as-tecfuḍ (F) 7
Ayen i ɣef i tεemdeḍ tettuḍ (F) 7
Mi ara d-takiḍ ad teḥluḍ (F) 7
Seg wayen i ak-εebban (C) 5
Zemreɣ ad ak-d-awiɣ (A) 5
Ad ak-d-ssekneɣ amek i tleḥḥuḍ (A) 7
Di ṣṣveḥ n temẓi-k (B) 5
I wedfel, agris, aluḍ (A) 7
I ijerḥen iḍarren-ik (B) 5
Ad ak-d-ssekneɣ adrar ccfu (C) 7
I ak-yesḥefḍen (D) 5
Ṣṣveṛ d urfaḍ n uqeṛṛu (C) 7
I k-id-yessekkren (D) 5
Teṛwam ɣas ma telluẓem” (E) 7
Γas ma teεyam tveddem (E) 7
Deg-wen yevda-d usirem (E) 7
Kečč tizyiwin-ik (B) 5
Wali yemma-k di tnafa (F) 7
Amek i tquvel axxam, lexla (F) 7
Γas akken; si zzman teḥfa (F) 7
Tuṛǧa kan levɣi-k (B) 5
Zemreɣ ad ak-d-awiɣ (G) 5
Ad teẓṛeḍ; wiss ma tecfiḍ (A) 7
Mi d-yewweḍ Uṛumi (B) 5
Tedleḍ ass-n ur d-tecqiḍ (A) 7
Di tlava n temẓi (B) 5
Tamegḥelt mi tt-twalaḍ (C) 7
Teɛǧev-ik; tecveḥ (D) 5
Maεni temẓi tesseɣlaḍ (C) 7
Ur tefhimeḍ ṣṣeḥ (D) 5
Lxuf, lvaṭel i-d-yevdan (E) 7
Twalaḍ-ten mi d-ḍṛan (E) 7
Ǧǧan-d i wid i d-yegran (E) 7
Ǧǧan-d lateṛ-nsen (F) 5
Ad ak-d-ssekneɣ yir ussan (E) 7
Msetvaɛen d yir uḍan (E) 7
Ad teẓṛeḍ lḥif i ten-iẓḍan (E) 7
Kečč tḥeḍreḍ-asen (F) 5
Zemreɣ ad ak-d-awiɣ (A) 5
Ayen i ak-yehwan di targit (B) 7
Ad ak-d-ṣewṛeɣ ddunit (B) 7
N wayen iεeddan (C) 5
Ad ak-d-smektiɣ (A) 5
Targit ad k-terr ɣer temẓi-k (D) 7
Ad ak-d-ssekneɣ ussan-ik (D) 7
Amek akk i vdan (C) 5
Ad ak-d-ssekneɣ asaru (E) 7
N temẓi-k amek i k-tesru (E) 7
Ad twaliḍ lḥif, zzhu (E) 7
I k-id-iṛebban (C) 5
Ayen tevɣiḍ as-tecfuḍ (F) 7
Ayen i ɣef i tεemdeḍ tettuḍ (F) 7
Mi ara d-takiḍ ad teḥluḍ (F) 7
Seg wayen i ak-εebban (C) 5
Zemreɣ ad ak-d-awiɣ (A) 5
Ad ak-d-awiɣ tteswiṛat (A) 7
Ara k-id-yesmektin (B) 5
Arrac, irgazen, lxalat (A) 7
Afus, tiɣṛatin (B) 5
Ad ak-d-ssekneɣ iman-ik (C) 7
Mi teddiḍ yid-sen (D) 5
S leɛlam gar yifassen-ik (C) 7
Kečč d yeṛfiqen (D) 5
Ad ak-d-awiɣ targit-nni (E) 7
N wasmi yeffeɣ Uṛumi (E) 7
Qlil wi’ iḥeḍṛen ur yecfi (E) 7
I lfeṛḥ n wass-n (D) 5
Amek ass-agi tenneqlav (F) 7
Amek alarmi lḥeqq iɣav (F) 7
Qesden i tjaddit ad trav (F) 7
Wa d ayen-nniḍen (D) 5
D taqsiṭ-nniḍen (D²) 5
Zemreɣ ad ak-d-awiɣ (G) 5
Lžayer teǧǧa twaɣit (A) 7
D tacevḥant tesveɣ! (B) 5
Asmi akken i nenwa ddunit (A) 7
Teḍṣa-d ar ɣuṛ-neɣ (B) 5
Arrac ǧǧan ssiraǧ (C) 7
Ṛɣant tbewwaḍin (D) 5
La ttḥewissen am yifeṛṛaǧ (C) 7
I itevɛen tisekkrin (D) 5
Leεnaya n udrar tewweḍ (E) 7
Ur yeǧǧi ḥedd ad t-yerkeḍ (E) 7
Wa ur izad ɣef wayeḍ (E) 7
Neḥla mi nuḍen (F) 5
Ad ak-d-ssekneɣ amek i texṛev (G) 7
Tidet amek i tt-yenfa lekdev (G) 7
Leɛqel mi yuɣal yeslev (G) 7
Wa d ayen-nniḍen (F) 5
D taqsiṭ-nniḍen (F²) 5
Zemreɣ ad ak-d-awiɣ (A) 5
Ayen i ak-yehwan di targit (B) 7
Ad ak-d-ṣewṛeɣ ddunit (B) 7
N wayen iεeddan (C) 5
Ad ak-d-smektiɣ (A) 5
Targit ad k-terr ɣer temẓi-k (D) 7
Ad ak-d-ssekneɣ ussan-ik (D) 7
Amek akk i vdan (C) 5
Ad ak-d-ssekneɣ asaru (E) 7
N temẓi-k amek i k-tesru (E) 7
Ad twaliḍ lḥif, zzhu (E) 7
I k-id-iṛebban (C) 5
Ayen tevɣiḍ as-tecfuḍ (F) 7
Ayen i ɣef i tεemdeḍ tettuḍ (F) 7
Mi ara d-takiḍ ad teḥluḍ (F) 7
Seg wayen i ak-εebban (C) 5
Zemreɣ ad ak-d-awiɣ (A) 5
Ad k-awiɣ di targit-ik (A) 7
Ad d-nẓuṛ tayri (B) 5
Asmi akken i d-tedla s ul-ik (A) 7
Teffɣeḍ-d si temẓi (B) 5
Asmi akken i as-tehdiḍ (C) 7
Asefru amenzu (D) 5
Waqil ass-n ur teẓriḍ (C) 7
Ul yevda la icennu (D) 5
Tayri tekcem di ṛṛuḥ-ik (A) 7
Yal tiɣmeṛt di tudert-ik (A) 7
Tezdeɣ ula di tili-k (A) 7
Almi k-tessaḍen (E) 5
Ass-agi tveddel ṣṣifa (F) 7
S twacult akked dderya (F) 7
Terra-d fell-ak talava (F) 7
Si tid i icevḥen (E) 5
Zemmerɣ ak-dawiɣ (G) 5
Ad k-zzuɣṛeɣ di tnafa (A) 7
Ad k-id-yesmektin (B) 5
Γef yiɣennayen n uzekka (A) 7
N sevεa u settin (B) 5
Ad teẓṛeḍ iman-ik yid-sen (C) 7
Am kečč i ttargun (D) 5
Am kečč wwin-d tirga-nsen (C) 7
A tent-id-cnun (D) 5
Yal wa amek i as-teffeɣ targit (E) 7
Wa tesru-t; wa tessefṛeḥ-it (E) 7
Maεni fkan i Teqvaylit (E) 7
Amkan di tafat (F) 5
Γas azekka mačči nsen (G) 7
Fkan-d seg wul ayen ssnen (G) 7
Kkren-d wid yumnen yis-sen (G) 7
Ad aẓen ɣer zḍat. (F) 5
Zemreɣ ad ak-d-awiɣ (A) 5
Ayen i ak-yehwan di targit (B) 7
Ad ak-d-ṣewṛeɣ ddunit (B) 7
N wayen iεeddan (C) 5
Ad ak-d-smektiɣ (A) 5
Targit ad k-terr ɣer temẓi-k (D) 7
Ad ak-d-ssekneɣ ussan-ik (D) 7
Amek akk i vdan (C) 5
Ad ak-d-ssekneɣ asaru (E) 7
N temẓi-k amek i k-tesru (E) 7
Ad twaliḍ lḥif, zzhu (E) 7
I k-id-iṛebban (C) 5
Ayen tevɣiḍ as-tecfuḍ (F) 7
Ayen i ɣef i tεemdeḍ tettuḍ (F) 7
Mi ara d-takiḍ ad teḥluḍ (F) 7
Seg wayen i ak-εebban (C) 5
Zemreɣ ad ak-d-awiɣ (A) 5
* Tazwara:
Si tɣuṛi d tmesliwt n umedyez-a n tezlit “Tudert-nni” n ‘Lewnis At Mangellat’ diɣ seg uzwel ivan-d usentel d akken d “adertaniman” (autobiographique), ayen iyi-yewwin s telweɣ d tikti iwatan s yinig n tnafa “targit” ideg yunag umaru i wakken ad d-yales tubbit-nni i tt-yecvan di tewzel, ayen iyi-yerran s uḥercew d tuzzya n tikta almi amseḍfeṛ mi yuẓa yezzi!
* Amedyaz d tuffɣa n umedyez:
– Amedyez-agi n tezlit “Tudert-nni” yeffeɣ-d di tefsut n 2017 Yevrir, yettwassen seg imir ar ass-a xas yelḥa ugar n wallaɣen ɣef yimeẓẓay.
– D amedyaz acennay “Lewnis At Mangellat” i d-yettmeslayen deg umedyez n tezlit; ayen i d-yefkan ttvut ɣef waya: yettmeslay i yiman-is: (Ad k-awiɣ di targit-ik, zemreɣ ad k-awiɣ, ad ak-d-ssekneɣ amek i tleḥḥuḍ, ad teẓreḍ wiss ma tecfiḍ, kečč tizyiwin-ik…)
* Amedyaz d (t)wiyaḍ deg umedyez:
– Amedyez-agi n tezlit yesduqqes-d deg-s iḥulfan n lemɣiḍat ɣer wayen yezrin ur d-nevrin siwa di tira n yimedyaz: (Ad ak-d-ssekneɣ asaru n temẓi-k amek i k-tesru…), Aseg n umeslay deg umedyez d asḥisfan s yiḥulfan n wayen i t-yeǧǧan ur t-yuṛǧan.
– Yettmeslay umedyaz deg umedyez i yiman-is akken i d-nniɣ yakan aya d ayen i ivanen s uzwel d usentel n umedyez ideg iheddeṛ i yiman-is deg umedya: (Kečč tizyiwin-ik, Ad k-awiɣ di targit-ik Ad k-id-yesmektin Ɣef yiɣennayen uzekka n sevɛa usettin, Am kečč i ttargun…)
– Yettmeslay-d umaru deg umedyez s “Nekk” : (Ad k-awiɣ…) i “Kečč” iman-is : (Targit ad k-terr ɣer temẓi-k….), maɛna deg umedyez-a llan yimettekkiyen-nniḍen deg umedya : (Wali yemma-k di tnafa : “Nettat”, Ɣef yicennayen n uzekka : “Nutni”, Teṛwam xas ma telluẓem : “Kunwi”, Yal wa amek i as-teffeɣ targit : “Netta”…) : Am temẓi am tyemmat mmutent zrint si tura xas ma ddrent di tira, tazwara n uvrid aseklan tagara wiss wi tt-ilan!?, lḥif xas d ayen n dir deg yiseɣ i yessidir, targit tcebbu-d di tidet ma yella nevɣa-tt ad tt-naweḍ tettaɣ lekdev ma yella nenɣa-tt s uclag.
* Akud/tallit :
– Deg umedyez n tezlit-a amaru iveggen-d tallit mi d-yewweḍ Uṛumi!! daɣen n temẓi-s si ccfaya-s neɣ seg usnulfu n tira-s : talufanit-is almi d imi yewweḍ d ilemẓi mi t-tezzuzen tayri almi i as-yura “asefru amenzu” dɣa din mi yedda di tazwara n uvrid-is n ccna di “Sevɛa usettin”.
– Akud yessexdem umaru deg yifyar yemgarad ; d imal, d imira yugten d yizri iɣeṛ iteqqen imi yettmeslay-d ɣef yizeryan-is, iḥulfan i t-icudden ɣer yal d tallit seg wakuden-a mgaraden am uḥulfu n ” lemmer d usḥissef si tama d tumert si tama-nniḍen ” deg wakud n yimira, aḥulfu-nniḍen icudden ɣer yizri ” d tuqqna n lemɣiḍat imi ur d-itezzi, d tumert mm tifrat i t-yemlan i tafat ass-a ” aḥulfu yeqqnen ɣer yimal ” d wissen d wamek imi ayen urɛad ur d-nelli yella kan d asteqsi! “
* Imeḍqan d teswiɛt:
– Iwehha-d deg umedyez imeḍqan n tidet d wid n usugen :
— Wid n usugen: “Ad k-awiɣ di targit-ik, Wali-t di tnafa, Tayri tekcem di ṛṛuḥ-ik, Yal tiɣmeṛt di tudert-ik, Tezdeɣ ula di tili-k…”
— Wid n tidet: “Ad ak-d-ssekneɣ adrar ccfu: Tamurt Taqvaylit, Amek i tquvel axxam lexla, Lžayer teǧǧa twaɣit !…”
— Imeḍqan i d-yettwavedren deg umedyez n tezlit-a sɛan adeg ameqṛan deg usentel n umdyez imi akken yuɣ akud i yuɣ imeḍqan n yimir.
— Taswiɛt tettwanna-d deg umedyez n tezlit-a deg wamek tella d lemri ideg yettmuqul umaru ussan d yiseggasen yezrin s wazal meqqṛen i igan amedyez-a daɣen yella d azamul n tudert-nni i d-yedder umaru deg yizri n tilawt, s usmekti-s, s targit urgant tira-s.
* Ameyyez aḥulfan:
– Ayen i d-iveggnen deg umedyez n tezlit-a tidet di tnilwin :
— Tamuɣli: “D tacevḥant tesveɣ, Amkan di tafat…”
— Rriḥa: ” Temẓi i iṛaḥen si tazwara almi d tagara n umedyez d nettat dɣa yid-s “
— Timesliwt: ” Deg uẓawan neɣ lmuziga n tezlit; Am kečč wwin-d tirga-nsen ad tent-id-cnun…”
— Tanalit: ” Amedyez yewwi amaru di targit-is mi as-yenna: ‘Ad k-awiɣ di targit-ik d afus ara ak-ṭṭfeɣ…”
— Aram aɛṛaḍ: ” Ayen yezrin i d-yezzin d asaru di targit tura tmedyezt di tnafa n umaru “
* Tuddsa:
Amedyez n tezlit-a yettwavḍa ɣef tmanya (8) n tṣeddaṛin, yal yiwet tesɛa sseṭṭac n tefyar :
-1- Taṣeddaṛt tamezwarut : tevda seg ufyir : “Ad k-awiɣ di targit-ik” alma : ” Ad sefḍen dayen ” d tazwara n umedyez iwumi ara semmiɣ : ” tazwagara n tudert-nni! “
-2- Taṣeddaṛt tis snat : d tazwara n tezlit tevda seg ufyir : ” Zemreɣ ad ak-d-awiɣ ” alma d afyir : ” Seg wayen i ak-ɛebban ” azwel ara as-fkeɣ i tṣeddaṛt-a : ” Targit i d-yerran temẓi “
-3- Taṣeddaṛt tis tlata: tevda si : ” Ad ak-d-ssekneɣ amek i tleḥḥuḍ ” alma : ” Tuṛǧa kan levɣi-k ” nezmer ad as-nsemmi : ” Tazwara n temẓi tayemmat d leɣvayen-is “
-4- Taṣeddaṛt tis ṛevɛa: tevda si : ” Ad teẓreḍ wiss ma tecfiḍ ” alma : ” Kečč tḥeḍreḍ-asen ” iwumi zemreɣ ad fkeɣ azwel : ” Tallit n ṭṭṛad “
-5- Taṣeddaṛt tis xemsa: tevda si : ” Lžayer teǧǧa twaɣit ” alma : ” D taqsiṭ-nniḍen ” iwumi ara semmiɣ : ” Asirem di layas “
-6- Taṣeddaṛt tis setta: tevda si : ” Ad ak-d-awiɣ tteṣwiṛat ” alma : ” D taqsiṭ-nniḍen ” asemmi-s yezmer ad yili s : ” Timunent yeɣṛin “
-7-Taṣeddaṛt tis sevɛa: tevda si : ” Ad k-awiɣ di targit-ik ” alma : ” Si tid i icevḥen ” ad as-semmiɣ : ” Keffu n tudert n temẓi s veddu n tudert ilevden n tayri “
-8- Taṣeddaṛt tis tmanya(taneggarut) : tevda si : ” Ad k-zzuɣṛeɣ di tnafa ” alma : ” Ad aẓen ɣer zdat ” iwumi ara semmiɣ : ” Asurref amenzu di ccna ” xas s weḥnunef maca afud ur yunef i tikli gar wass-a d yiḍelli.
* Taseddast (syntaxe) :
Amedyez n tezlit-a yesɛa 128 n yifyar yevḍan ɣef tmanya(8) n tṣeddaṛin akken i d-nniɣ yakan teɣzi-nsent gar 5 d 7 n tunṭiqin, yal yiwet amek tella d taveggant d tasteqsant neɣ d tawehmant…tifyar llant kra sekkrent kan tiyaḍ d tukrisin s yinumak-nsent deg umedya :
– Tifyar tuskirin : ” Arrac irgazen lxalat afus tiɣṛatin, S leɛlam gar yifassen-ik kečč d yeṛfiqen, Kkren-d wid yumnen yes-sen ad aẓen ɣer zdat…”
– Tifyar tukrisin : ” Ad k-awiɣ di targit-ik d afus ara ak-ṭṭfeɣ, Ad ak-d-ssekneɣ ussan-ik amek akk i vdan, Ad k-zzuɣṛeɣ di tnafa ad k-id-yesmektin…”
* Aɣaniv :
a) Tugniwin n uɣaniv (Les figures de style) : llant waṭas n tugniwin timdeyzanin deg umedyez-a am yemgerdan daɣen deg umedya :
– ” Ad teẓṛeḍ ayen iwumi ur tecfiḍ, Ayen truḍ ayen teḍṣiḍ, Amek tekkreḍ ma teɣliḍ, Tveddem ɣas ma teɛyam, Wa tesru-t wa tessefṛeḥ-it, Yir ussan msetvaɛen d yir uḍan, Targit ad k-terr ɣer temẓi-k, Di ṣṣveḥ n temẓi-k, Di tlava n temẓi, Teṛwam ɣas ma telluẓem, Ad twaliḍ lḥif, zzhu, Tidet amek i tt-yenfa lekdev, Teffɣeḍ-d si temẓi, Ad teẓreḍ lḥif i ten-yeẓḍan…” , “Ayen tevɣiḍ as-tecfuḍ, Ayen i ɣef i tɛemdeḍ tettuḍ, La ttḥewwisen am yifeṛṛaǧ itevɛen tisekkrin…”
b) Aktawalen alnamkanen (Les champs lexicaux les plus significatifs) : ” Ayen teǧǧiḍ, Seg wass-n ar ass-a, Tanafa, targit, Di tlava n temẓi, Ad ak-d-ṣewṛeɣ ddunit n wayen iɛeddan, Ad ak-d-smektiɣ…”
* Asentel (Ayen ɣef i d-yettmeslay umedyez) :
– Asentel asalas d adertaniman yemmeslay-d umaru ɣef tazwara n tudert-is si tlalit(temẓi) alma d asurref-is amenzu di ccna.
* Talɣa:
a) Amedyez-agi amek-is d vu tefyar
b) Bḍant tefyar n umdyez ɣef tṣeddaṛin akken i d-nniɣ yakan yal yiwet tesɛa 16 n tefyar.
* Adrum:
Adrum aseklan n umedyez-a d amezruyan d adertaniman, ayen i d-yettvegginen aya d azwel d usentel s timmad-is.
* Asenqed aseklan:
– Amedyez n tezlit-a “Tudert-nni” si tama iwatan deg-s d inig s usekti n targit ideg yekka s tira i waggaḍ ɣer wayen yezrin ur d-itezzin, leshala n tutlayt yettwasxedmen i swayes yekcem allaɣen n yakk tid d wid i as-yeslan neɣ i t-yeɣṛan, yessexdem umaru 6 n yiverdan awal ” Temẓi ” dɣa amedyez-a walaɣ-t d tajmilt-is imi tagara-s tella di tuffɣa si temẓi akken i d-yenna ! Yessekmec-d deg-s 17 n yiseggasen n tudert n temẓi ” si tlalit ar sevɛa usettin “.
– Si tama yennexṣuṣan walaɣ deg umedyez-a tazwara : ur yelli ara d tajmilt s wakken ilaq i tudert n tẓuri (ccna d tmedyezt-is) i d-yekkan azgen n lqeṛn maca i temẓi-s almi d imi tekfa s veddu n uvrid-is n ccna, yerra ɣer yidis neɣ ɣer rrif tama tamdeyzant deg-s almi yuɣal umedyez am tullist neɣ ungal wezzilen ” aya yella di tmenna-s : ‘ ur ḥemmleɣ ara tira n wayen ɣezzifen mliḥ am yedlisen, ḥemmleɣ asewzel dɣa uriɣ tizlit-a n tudert-iw mgal ma uriɣ adlis adertaniman ‘ amedyez-a lemri-s d asmekti s uḥissef deg wayen iɛeddan d tumert s yimira i t-id-yufan. Aseqmeḍ di talliyin (ur mseḍfarent ara tikta di kra n yefyar) d tutlayt itezzin din kan war ma yezger akkin neɣ ad yessemgared gar yimir d yimira, yezgel akud yewweḍ ; deg umedya :
– ” Ad teẓṛeḍ; wiss ma tecfiḍ
Mi d-yewweḍ Uṛumi ” yesteqsa dagi iman-is ma yecfa i tallit-nni n waggaḍ Uṛumi d akken yella idel di tlava n temẓi…maca netta urɛad ilul deg unekcum-is ama ɣer Lžayer neɣ tamurt Taqvaylit anda i d-ilul !
– ” S twacult akked dderya ” sakkin yuɣal ar ” Ad k-zzuɣṛeɣ di tnafa ara k-id-yesmektin ɣef yiɣennayen n uzekka…” yezzi ar 17 n yiseggasen di leɛmeṛ-is seld mi d-yewweḍ s twacult ! Tagara n umedyez tella-d s tazwara n uvrid-is n ccna.
* Tagara:
Amedyaz deg umedyez-a yessugen-d tudert wezzilen am targit s tnafa i as-igan tinigit neɣ amzun akken temẓi d taṣevḥit ma d tewser d tameddit !
Deg umedyez-a n tezlit : yesgurrej umedyaz yal tallit si tudert iwumi ur yecfi sumata diɣ yules-d tin urǧin yettu i d-yeddan di tili-s.
Tagara ad iniɣ s tesleḍt-iw d akken amedyaz : tikta s unadi i tent-id-yeqḍa almi s ccvaḥa i tent-yeẓḍa xas ma tella kra n tuccḍa d tunnḍa.
DJOUAHER Mohand Akli