Tadiwennit akked Racida Ben Sidhum: « Yewɛer usuffeɣ n yidlisen, maca…»

Yettunefk-as ɣasamek warraz ɣef wungal-is ”Icenga n talsa” sɣur Tenmehla n yidles n Tizi Wuzzu. Ɣef umaynut-a d wayen nniḍen i d-terra tmarut Racida Ben Sidhum i yisteqsiyen n uɣmis Isaḥliyen di tdiwennit-a. Ɣret!

Isaḥliyen: Awal d amecṭuḥ fell-am i yimeɣriyen-nneɣ…

Racida Ben Sidhum: Azul. Di tazwara ad awen-d-iniɣ tanemmirt imi iyi-tgam azal. Racida Ben Sidhum d tamarut s tutlayt n tmaziɣt. Kecmeɣ-d annar n tira s wammud n yisefra iwumi fkiɣ azwel “Keltuma yemma taεzizt”, deg useggas n 2018. Rniɣ-d ungal “lḥif d usirem”. Ur εeṭleɣ ara rniɣ-d ammud n yisefra ”ini-t-as i gma”. Rniɣ sin n yiseggasen suffɣeɣ-d ungal ”Icenga n talsa”. Mebla ma ttuɣ adlis iwumi xedmeɣ tasuqilt, n tmarut taṛumanit, tsuffeɣ-it-id di Rumanya.

Tuwwiḍ ussan-a arraz Ungal deg umsizwer i d-ttheyya Tenmehla n yidles n Tizi Wuzzu. Amek tmugreḍ isalli-a?

Lferḥ-iw s warraz mačči d ayen akk ara d-gelmeɣ, am nekk am yal amaru ara iwalin leεtab-is yeffeɣ ɣer tafat. Ayen akk i yi-yesfeṛḥen ugar imi yerfed isem n umaru amenzu i yuran s teqbaylit Belεid At Ɛli.

Tesqerdceḍ deg wungal-a yiwen n usentel ɣef tmetti d wayen i tettidir d yir tilufa. D timetti i kem-yuwwin ad taruḍ fell-as?

Timetti tewwi-yi, lebɣi-w yerna-d. Acku amaru yettili am lemri i wayen terfed tmetti; d tignatin i ddreɣ, d ccfawat n temẓi, diɣen d ccfawat i d-yettader wakud si tikkelt ɣer tayeḍ. Nekk fkiɣ-asent udem. Yezmer wayeḍ ad d-yemmeslay fell-asent amek i tent-yedder.

Turiḍ daɣen idlisen nniḍen, am tmedyezt. Meslay-aɣ-d fell-asen…

Tamedyezt d asurif-iw amenzu ɣer tira, amenzu d tajmilt i yemma akked tyemmatin meṛṛa. wayeḍ d izen i watmaten ɣas ma yella d nekk i ten-yuran i gma, maca ḥsiɣ belli yal tilemẓit ad d-taf iman-is gar yifyar.

Amek tga tmuɣli-m ɣef tsekla tazwawt s umata?

Ttwaliɣ-tt d tin yettnernayen; yal aseggas yettili-d umaynut. Tira tuɣ amḍiq yelhan, anadi deg unnar-a yessemɣer aswir. Ɣef waya ad d-iniɣ kan d ayen yessefṛaḥen wayen uɣur nessaweḍ.

Yaḍra llan wuguren i tettidirem kunwi s yimaruyen d tmaruyin?

Yal taɣult tesεa uguren-is. Ad d-meslayeɣ kan fell-i deg wuguren-a imi yal amaru d acu-t wugur i yesεa. Asuffeɣ n yidlisen yewɛer acku leɣla yeɣleb bab-is. Yewɛer fell-i usuffeɣ maca ilaq ad kemleɣ imi tutlayt d yidles-nneɣ uḥwaǧen-aɣ.

Aql-ikem daɣen tettkemmileḍ tizrawin n dukṭura di tsekla tamaziɣt…

Ih, akka. Tura aql-i deg useggas wis kṛaḍ. Ssarameɣ ad fakkeɣ deg wakud imi llan yisenfaren i riɣ ad ten-xedmeɣ mi ara fukkeɣ.