Tamarut Cabḥa Ben Gana i Uɣmis Isaḥliyen « Tasekla mačči d tamaynut ɣur tmeṭṭut taqbaylit…»

Nuwwi-d awal di tdiwennit-a tawezzlant akked tmarut Cabḥa Bengana ɣef tira-s d tsekla taqbaylit s umata. Yelli-s n Micli terra-d i Uɣmis Isaḥliyen s tumert. Ɣret-tt da:

Isaḥliyen: Turiḍ ar tura ungal Amsebrid. Awal d amecṭuḥ fell-as…

Cabḥa Ben Gana: Ungal amsebrid d ungal-inu amezwaru. Uriɣ-t gar 2008 d 2012 mi lliɣ di tesdawit, yeffeɣ-d uḥric deg-s di 2014 ar HCA. Yeffeɣ-d d ungal di 2019. Ddeqs n yisental deg-s, Amsebrid d taqsiḍt d-yunagen s tallit taqburt ɣer tallit tamaynut, si tsuta ɣer tsuta nniḍen.

Nessutur deg wid i terza taluft rray-nsen ɣef tsekla taqbaylit. Amek-itt tmuɣli-m kemm?

Melmi kan i d-neffeɣ si timawit nuɣal ɣer tira, la nettaẓ ɣer sdat cwiṭ cwiṭ, ladɣa deg yiseggasen-agi ineggura, zemreɣ ad d-iniɣ nuẓ aṭas. Ddeqs n wungal i d-itefɣen, mačči am zik, ladɣa tawsit-agi, d tamaynut ar tsekla-neɣ. Ma nmuqel reḥbat n yidlisen d-yettilin ama deg At Yanni, Buǧima, At Wassif… tasekla taqbaylit teṭṭef amkan, ama di tesmekta ( quantité) n yidlisen d-yeffɣen d yimura, ama d tasmekta n yimeɣriyen d-yettaɣen idlisen yettwarun s teqbaylit. Simmal tettimɣur temkarḍit-nneɣ simmal yettimɣur usirem-iw yid-s.

Ar tura 15 n tlawin i uran ma drus yiwen n wungal. Acu ara d-tiniḍ ɣef tiẓin-a?

Akken d-nniɣ di tazawara, melmi kan i nuɣal ɣer tira, limer aṭas-aya i nettaru, ahat aṭas n tlawin ara d-yarun, ugar n waya; rnu tasekla mačči d tamaynut ɣer tmeṭṭut taqbaylit, ama asmi tella d tasekla timawit ama tura mi tettwaru.

S yisem-im d tamarut, d acu-ten wuguren i d-yettmagar umaru Aqbayli deg tira neɣ deg usuffeɣ?

Di tirmit-inu, ayen yerzan tira ur d-mmugreɣ ara uguren, teqqim kan deg usuffeɣ ; ugur ameqqran d adlis ur yettaweḍ ara ar imeɣriyen, ɣer temnaḍin yakk, ama n Tmurt n Leqbayel ama di Lezzayer sumata.

Tsuffɣeḍ-d akked gma-m Masinisa, ayyuren iεeddan, ammud n tmedyezt. Meslay-aɣ-d fell-as …

Amud-agi n tmedyezt, nesdukel-d isefra-nneɣ, d atmaten, d argaz d tmeṭṭut, yal yiwen s yisental-is, yal yiwen s tmuɣli-ines. Yella wanda nettemcabi, yella wanda nemgarad ɣas yiwen n yidim, yiwet n tmetti. Ahat d izen; nezmer ad neddukel ɣas nemgarad. D izen ; tasekla ur yella kra n lɛib deg-s.

Testeqsa-tt: Tiziri.