(Tiwlafin).Aweqqas:yuɣal-as wazal i wadeg umu qqaren ” Cap Aokas”

Γas ma yella wadeg n tmerrit d umerreḥ, umu qqaren ” Cap Aokas “, seg yidigan icebbḥen nezzeh di twilayt n Bgayet. Imi, tessur deg-s tezzugzut n yidurar d ccbaḥa n waman n yilel, i yemlalen akken jmiε, wa yerna tahuski-s i gma-s. Lameεna, deg yiseggasen ineggura, uɣalent twaculin n temnaḍt-nni, ur zmirent ad farṣent ccbaḥa-a.

Ayagi imi, ɣef leḥsab n tnagiwin n yimezdaɣ, ur yezmir yiwen ad yawi tawacult-is i wemkan anda i yenneεdam leḥya d sser. Rnu i waya, ula d taɣellist ulac dinna. S unamek-nniḍen, uɣalent twaculin ttagadent amkan-nni.

Seg tama-nniḍen, ula d udem-is agaman acebḥan, cemmten-t tqerεatin n lbirra d ugudi i yellan deg-s.

Γef waya, i d-yekker yiwen n yilemẓi n temnaḍt-nni n Uweqqas, umu qqaren Sennun Meḥfuḍ, ixemmem ad as-d-yerr azal-is i wadeg-agi. Dɣa, yessuter ttesriḥ sɣur yemḍebbren n tɣiwant. Ineggura-a seg tama-nsen, fkan-as-d afus n tallelt.

Di tezwara, yebda deg usizdeg n wemkan-nni. Yuɣ lḥal, d ccɣel iεeṭṭlen, ɣas ulamma gren-d iman-nsen kra n yimezdaɣ fkan-as-d afus n uεiwen. Lameεna, ɣef leḥsab n tnagit n Mass Sennun, adeg-nni yella yemṣex nezzeh, ugar n 180 n yikumyan n ugudi i d-kksen deg-s.

Syin akkin, yessres deg-s ttwabel d ikurrsiyen i twaculin i d-irezzun, akken ad afent amek ara steεfunt dinna. Rnu i waya, ldint deg-s kra n tḥuna, i win yebɣan ad d-yaɣ taɣawsa. Ama d uẓẓim, lqahwa, aman, d wayen-nniḍen. Am akken i aɣ-d-wwḍen yisallen, belli, ula d tiẓgi yellan dinna, bɣan wid yekkin deg uṣenfar-a ad ttheggin sya ɣer sdat, i wakken ad yemɣur uṣenfar-nsen.

Ad d-nesmekti belli, imezdaɣ n temnaḍt-a s umata, umren nezzeh s ccɣel-a, ladɣa imi d adeg n umerreḥ d tukksa ɣef wul. Meεna seg tama-nniḍen, llan wid i mazal kukran (ugaden), imi amkan-nni yella deg-s umihi. Neɣ s wawal-wayeḍ, ttegririben-d deg-s yeblaḍen deg ccetwa. Γef waya, i llan wid iwalan belli, taldayt-is ur ilaq ad d-tili uqbel ad as-xedmen ttawilat n tɣellist ilaqen.