Amaynut di tsekla taqbaylit : tberreḥ-d tselmadt Ben Merabet Seεdiyya ɣef tuffɣa n ungal-is amezwaru.

D taneggalt nniḍen ara d-yernun i tneggalin tiqbayliyin i tt-yezwaren yakan. Tagi d Massa Ben Merabet Saεdiyya, i yettwassnen s yisem-is d taselmadt n tmaziɣt deg waɣir n Bgayet. Massa Seεdiyya d tin ara d-yernun ungal amaynut i temkarḍit n wungalen i d-yeffɣen yakan s tutlayt tamaziɣt (taqbaylit).
Ungal-is d win umu tefka azwel ” tudert taqburt d tudert tamaynut ” .

Ad d-nesmekti belli, Massa Seεdiyya asmi tella d taselmadt di Tbatent, tura yakan adlisfus n uselmed n tcawit, rnu i wammud n tullisin i tettheggi lawan-a.

Γef leḥsab n tnaga-is, gar-aneɣ kra n wayyuren iwakken d-yeffeɣ ungal-is amaynut s udem unsib.

D ayagi dɣa i d-iwekked Mass Saεid Cemmax deg teɣrabt-is n Facebook, netta i yumren s umaynut-a ara d-yernun abaɣur i tsekla taqbaylit tamaziɣt s umata.
Seg tama-nniḍen Mass Cemmax yesres-d tukkist seg ungal-a amaynut, attan dɣa di lebɣi-nwen:

Ddiɣ d tislit, asmi sεiɣ 18 n yiseggasen. Cfiɣ vava ur yeḥdir ara i tmeɣra acku di lɣerva i yettili. ḥevsen-iyi-d ula deg ulmud-iw yernu ḥerceɣ cfiɣ lweqt-nni vɣiɣ ad ffɣeɣ d tamejjayt n udawi n yiɣessan… maca tirga-inu ur ffiɣent ara rnu ɣer waya zeyneɣ sεiɣ tahuski dayen kan dɣa usmen fell-i rran-iyi ɣer lqefs n yiɣevlan d uḥebbar… armi meḍlen akk tirga-w.
Di taddart n tirga-w, yezdeɣ ul-iw win ḥemmleɣ, win vɣiɣ ad yili d zzwaǧ-iw, sermeɣ-t ad d-nesεu asirem akken maca ur t-uɣeɣ ara, akken yevda lwerd-inu ifessi ur iεeṭṭel din din yeqqur .
Nnevraɣ εawdeɣ tisulya sεiɣ-d arraw-iw, tenwam ḥulfaɣ i tmiqwa n lehna! yekker ṭṭrad daxel-inu asmi akken id-nnan ad tzewǧeḍ d leflani… ɣedren-iyi, xedεen-iyi….ɣaḍen-iyi warraw-iw id-ilulen war levɣi n tnefsit-iw… Terram-iyi d taɣawsa trehnem temzi-w am wakken ara trehneḍ kra n tferka… tenɣam-iyi armi kerheɣ iman-iw. Nevraɣ-d tikkelt tis snat, lexyal n win ḥemmleɣ, win vɣiɣ yeggan yid-i yettnekkar-d yid-i, uɣaleɣ d tacmat gar-asen, win iyi d-yemmugren ad as-yini ha-tt-an tina akken yenevran…!

Nekni seg tama-nneɣ nessaram-as afud igerrzen i tmarut deg umecwar-is n tira.