TADYANT: aḥric 3

 Ad nebdu tadyant n wass-a, s yiwet n teqsiḍt i yesεan anamek i win i tt-yegzan.

 Deg teẓgi anda i ttidiren yiɣersiwen, yemyagar-d uɣyul d yibki, ttmeslayen akken ɣef ddunit d yinezgumen-is, yekker yibki yenna-as i weɣyul: am kečč tura ay aɣyul, ad tafeḍ tezzegzu taɛebbuṭ-ik s yimɣan-agi izegzawen i tesseblaεeḍ myal ass. Yenṭeq weɣyul yerr-as: meεna leḥcic-agi ur d azegzaw, d aberkan.

 Yekker yebki yettaḍsa fell-as iluεa-t : aha berka-k aqejjem. Aɣyul yerna iwekked-as i tikkelt-nniḍen belli imɣan ini-nsen d aberkan, yerna yeṭṭef deg wawal-is. Awal i wawal, yekker umennuɣ ageεmir gar-asen, armi yewweḍ ssut n ccwal-nsen ɣer yiɣersiwen nniḍen. Imir-n yuzzel-d ɣur-sen yifis yesteqsa-ten ɣef wacu yellan. Mlan-as sin n yexsimen tadyant-nsen, dindin war aεeṭṭel yewwi-ten ɣer ugelliḍ n teẓgi iwakken ad tt-yefru gar-sen.

Imi wwḍen wid ur nemsefham ɣur yizem, yeḥka-as yifis taqsiḍt-nsen. Seld axemmem d umeyyez, yeḥkem yizem gar-asen, yefka lḥeq i weɣyul, ma yella d ibki yessuffeɣ-it seg teẓgi, iceyyeε-it ɣer tniri i useggas s lekmal.

Zrin wussan d wayyuren armi i yekfa useggas yuɣal-d yibki ɣer teẓgi. Ibki meskin ur yegzi ara acimi i yeḥkem yizem mgal-is, ɣef waya i iruḥ qbala yesteqsa-t ɣef tmentilt n wayen i yexdem. Izem agellid yerra-yas : nekk ur sḍelmeɣ aɣyul imi iban ssuq-is, sḍelmeɣ-k kečč i yettmeslayen yid-s, yerna tefkiḍ-as tagnit ad ak-d-imudd rray-is.

War ccek tadyant-a i awen-newwi, teḍra-yawen i kunwi ugar n yiwet n tikkelt. Teẓgi-nneɣ nekkni d timetti ideg nettidir. Ma yella d imdanen, d iɣersiwen n tmetti i yesεan allaɣ. Acḥal d tikkelt i tkecmeḍ deg udewenni kečč d welbeεḍ, tefkiḍ-as tagnit i umeslay d umbadal n tektiwin, meεna imi telḥam cwit deg wawal tufiḍ-t yeqqers ur yesεi iqqiḥ deg uqerru-s, tigzi-s d tilemt teḥbes kan sdat wallen-is, yerna ugur anda yella, d wihin gedged i yebɣan ad yesεeddi fell-ak tiktiwin-is, ɣas ulamma yeẓra yeḥsa belli ur d sswab wayen i d-yeqqar. Sres-it d ablaḍ, ddem-it d wayeḍ,  ɣas yettyeqqen belli d tikti-k neɣ d awal-ik i d tidet, akken yugi ad yebru i tmuɣli-s.

Acḥal d win i tsaεfeḍ d win umu tefkiḍ afus n tallelt deg wakud anda i as-yessra. Lawan ideg tezzi tdewwer ddunit, teqleb taḥbult udem-is, yeggeḍ-d lawan anda i as-tessriḍ kečč, yezzi-ak-d s uεrur, yerra iman-is amzun ur k-yessin.

 I winna umu teḥkiḍ lbaḍna, terriḍ-t am gma-k, teccetkiḍ-as ayen i k-iqerrḥen, temliḍ-as ayen i k-yessferḥen, yuɣal d netta s ttimad-is i d iɣes n tmiǧǧa-k. Yeẓra imir-n anda ara ak-d-yefk tiyita, d aniwa i d amkan i k-yetteqraḥen ugar. Niqal temliḍ-as akk iberdan ansi ara ak-d-yekcem i tɣerɣert n wexxam.

S ugzul n wawal, di ddunit ur ttak i yiwen azal ugar n wayen i yuklal.