Tadiwennit akked tmarut-tamedyazt Dalila Qeddac Ccix : « zik tameṭṭut tessuffuɣ-d iḥulfan-is s timawit kan neɣ s wunuɣen i tessunuɣ deg uqellal neɣ deg uzeṭṭa ass-a…»
Di tdiwennit-a i d-newwi akked tmarut-tamedyazt Dalila Qeddac Ccix, nesqerdec ddeqs n temsal, ama d ayen yerzan tira, tasekla, tilufa n ddunit n wayen nniḍen.
Nesteqsa-tt, terra-d i uncad-nneɣ s tumert.
Aɣmis isaḥliyen : Nessen Dalila Qeddac d taselmadt n tutlayt tamaziɣt, d tamarut-tamedyazt. Mmeslay-aɣ-d ugar fell-am?
Dalila Qeddac: Dalila, d tamsedrart am yal tameṭṭut taqbaylit…Ahat irmad teqdec, qedceɣ-ten akka am ulqaḍ n uzemmur, azeṭṭa, amgar, tugmin, takessawt, azdam…annect-a smerseɣ-ten mi lliɣ meẓẓiyeɣ ar yimawlan. Ayen- niḍen tenniḍ-t-id.
Turiḍ ddeqs n yidlisen, ama d tullisin, isefra, neɣ d ungalen. Amek i yebda umecwar-im n tira, d acu-ten yiεewwiqen i kem-id-imagren?
Asmi lliɣ d tamecṭuḥt ttaruɣ taqbaylit s yisekkilen n taɛrabt ladɣa isefra d yiḍrisen ideg d-ttalseɣ ayen swayes ttḥulfuɣ. Ruḥ a zzman, as-d a wayeḍ armi d-ufiɣ iman-iw d taselmadt n tutlayt tayemmat. Deg yiseggasen imezwura, nectaq iḍrisen ara nesɣer i yinelmaden, iḍrisen yeččuren d isental iwulmen asemmud n ugrud. Cfiɣ aḍris i uriɣ d amezwaru d tabrat i uzneɣ i yinelmaden. Imir tuɣ tella tayunt anda ɣer taggara anelmad ad yizmir ad yaru tabrat ama d tin n menwala neɣ d tanedbalt. Mi d-yuweḍ wakud n yikayaden ur ufiɣ aḍris ara sqedceɣ dɣa uriɣ-t akken yeffeɣ fell-i. Deg usenfali s tira, inelmaden, ad yi-d-rren ɣef tebrat… Cwiṭ cwiṭ, nniɣ acimi ur keccmeɣ deg unnar n tira ladɣa imi llan wid yi-yessebɣasen ama d imawlan neɣ d imeddukkal anda yella ula d amaswaḍ mass Kebir… Dɣa adlis i uriɣ d amezwaru d ungal Aɛwin d umud n tullisin Tawenza…
S yisem-im d taneggalt gar tneggalin tiqbayliyin i yennernan iseggasen-a ineggura. D acu i d abaɣur i d-terna tmeṭṭut i tsekla-nneɣ?
Ahat ayen i d-yellan d tiẓrawin ɣef tsekla mi tella d timawit ad naf tugget d tameṭṭut i tt-iḥerzen ama d timucuha ama d isefra ama d timɛayin… Ula d ass-a xas tɛeṭṭel tmeṭṭut akken d-tekcem s annar-agi n tira maca iban kan abaɣur agejdan ara d-ternu d asnerni n tsekla d ulkam n wayen d-ǧǧan yimarawen-nneɣ. Ma yella zik tameṭṭut tessuffuɣ-d iḥulfan-is s timawit kan neɣ s wunuɣen i tessunuɣ deg uqellal neɣ deg uzeṭṭa ass-a ayen din ad t-id-tsenfali di lkaɣeḍ yerna wer ma teffer nnekwa-s.
Ungal ” tissirt ” i d-tessuffɣeḍ deg useggas n 2022, d win yehwan nezzeh i yimeɣriyen. Ales-aɣ-d cwit fell-as?
D tidet! Umreɣ ayen din imi yeɛǧeb imeɣriyen. Llan ula d wid i as-igan taɣuri akka am: Uqemmum Naser, Lyas Belɛidi, Lɛerbi Yeḥyun, Cabḥa Ben-Gana, Ɛelǧiya Buhar… Ungal Tissirt, d inig n Menzu amejjay d-yekkren di taddart n Tizubget ɣer Fransa, ɣer Tbatnet, ɣer Libya… U yal tikkelt d acu i d ineḍruyen ara yeḍrun yid-s ger rrebrab d lexdeɛ d tmettant d twizi… Tugna yellan sufella ahat d awzul i wayen yellan deg ugens.
Tewwiḍ arraz n Belεid At Ɛli n tullist deg useggas n 2021- 2022 s tullist ” tineggas “. Amek i tḥulfaḍ?
D iḥulfan yeskikiḍen afrayen, d iḥulfan ur yezmir yiles ad -yessusru tumert imi dɣa yerfed isem n umaru Belɛid At-Ɛli yuran ungal amezwaru s teqbaylit (Lwali n udrar). Dɣa d tagnit ad snemmreɣ iɛeyyalen n tsbeddit Takanadit Tiregwa.
Deg wayyuren ineggura, teddreḍ tarmit n waṭṭan amcum. Ma yehwa-ya-m amek armi i tfaqeḍ s yes-s?
Mazal ar tura di tirmit-a yennemraten aṭas maca mreḥba s tikci Ṛebbi! D aqelluẓ yettnernin deg yiff ayeffus iyi-d-yesfaqen yella kra maca tamejjayt ur as-tfaqeḍ ara di tazwara armi ttixdeɣ.
D adrar n yiḥulfan, n tayri d usḥissef i d-yemmaren sɣur yimaziɣen anda ma llan imi slan tuḍneḍ. Akken qqaren di ṭṭiq i d-yettban werfiq. D acu-t uḥulfu-m imir-nni?
Di tazwara, rewleɣ i umaḍal n yizeḍwan inmettiyen imi nwiɣ dayen terza-d lmut. Asmi d-uɣaleɣ zuzreɣ-d ayen yeḍran yid-i…Merra Imaziɣen bedden-d ɣer tama-w ama s ddeɛwat neɣ s lǧib neɣ s wer-ttuggad. Llan wid d-yettalsen ɣef tid yellan am nekk jjant, llan wid yuḍnen am waṭṭan-iw ttalsen-iyi-d tirmit-nsen… Tidet kan am tgeldunt i ḥulfaɣ i yiman-iw… Tanemmirt tameqqrant i kra n win d tin ur yi-neǧǧi di tegnit-a n leḥrirs…
D acu-ten yiwellihen i tzemmreḍ ad tefkeḍ i tmeɣriyin-nneɣ ɣef wayen yerzan aṭṭan-a, neɣ s unamek-wayeḍ iwellihen n usḥulfu ?
Ilaq ad tettqaraɛ iman-is ladɣa mi ara tsuccef… Akken ara tḥulfu i kra n umgired ad tazzel s amejjay yerna ilaq ad teṭṭef xersum kraḍet n tidma (leryuy) i wakken ur tettwakellax ara. Ula d argaz ur ilaq ara ad yestehzi di tezmert-is acku aṭṭan-a simmal yettnerni di tmetti neɣ deg umaḍal akken yella…
Zemreɣ ad am-fkeɣ isem lal n tebɣest, imi ɣas tuḍneḍ terẓiḍ ɣer At Smaεel, yerna tewwiḍ arraz n tmeṭṭut d win n Kaysa Xalifi di tfaska n Udrar n Fad n useggas-a. Ḥku-aɣ-d ɣef termit-a ?
Ih! Di tazwara yugi urgaz-iw imi d tamuḍint maca imi yeẓra d tin yettrin tifaskiwin yecban tigi, yeǧǧa-iyi. Ttuɣ aṭṭan-iw ladɣa mi mlaleɣ d tarwa n Wat-Smaɛel. Umreɣ s warraz i yi-yernan azal ladɣa winna yuwin isem n Kaysa Xalifi ad fell-as yeɛfu Wuzmir. Ddeqs n yidlisen i yi-d-yettunefken maca mazal ur ɣriɣ ula d yiwen… Ay acekk-itt tarwa n taddart-a. D tagnit anda mlaleɣ tawacult n Rabḥi Ɛellawa d yisdawanen d yimeɣriyen d yimedyazen, yal wa s yisem-is. Sḥasfeɣ imi nudaɣ ɣef umaru Mhenna Xalifi ur t-ufiɣ ad t-yerḥem Ṛebbi…
Tanemmirt-im, awal-im n taggara?
Tanemmirt i kunwi i yi-yefkan tagnit-a! Afud igerrzen! Aɣmis Isaḥliyen, yedder u mazal ad yidir… Aḥuddu aḥunnu, ttḥadarem tadawsa-nwen!
Testeqsa-tt Tiziri