Amaynut di tira taqbaylit: ad d-yeffeɣ ussan-a ungal amaynut n tmedyazt-tamarut Liza Serik

Akka d kra n wussan ad d-yeffeɣ wungal n tlemẓit Liza Serik, yelli-s n Mεatqa, Tizi Wezzu. Ungal-a azwel-is “Tasfift tessefsi tussaft”, ad d-yeffeɣ ɣer teẓrigin IMTIDAD.
Liza tesεa anagar 19 n yiseggasen, tura ungal-a mi teqqar deg tesnawit, aseggas-a dɣa i d-tewwi akayad n lbak. Ad d-nesmekti, tilemẓit-a d tamedyezt i yewwin aṭas n warrazen, gar-asen arraz wis sin deg tfaska n Udrar n Fad.
Ansuf s umaynut, afud igerrzen i tmarut deg unnar-is amaynut n tesrit.

Hatan wayen i d-tenna tmeskart ɣef wungal-is:

“Tussaft xas ma qqaren tessaggad,
acu kan tikkwal tessenfalay-d acḥal d tasusmi, tin akken ur nettmeslay i lebda …
Ihi, Tikkelt-a tussaft  is d-gliɣ d tin i yessefsin tasfift n wakud akken ad awen-d-ssawḍeɣ isalli n tuffɣa n wungal-iw amezwaru s uzwel “Tasfift Tessefsi Tussaft” ɣer Teẓrigin Imtidad deg wussan ara d-iteddun…

Tanemmirt tameqqrant i s kra n win i yi-d-yefkan afus n tallelt… i ibedden yid-i
Ladɣa…
I yimdukkal d temdukkal i yi-yellan ɣer yidis akken i lebda ur ɣelliɣ. Ladɣa i yiεeggalen n ugraw n yimedyazen ilemẓiyen n Temεatqa d Mass Samir, i  yi-yellan i lmendad seg usebter amezwaru armi d taggara. I twacult-iw s umata, ladɣa baba d setti i ibedden tama-iw i lebda. I yitri n tsekla taqbaylit : MOUAISSI Nedjmeddine i iεetben yid-i ama deg useɣti ama deg yiwellihen. I Mass TARBOOCH Brahim, i yi-ixedmen tawlaft n tduli, d anaẓur yuklalen asebɣes d leqder. I Mass BILEK Hamid d ALDJAHMANI Firas d teẓrigin Imtidad i yi-yefkan afus n tallelt. Tanemmirt i Dr. KHERMANE Akli i yellan d amsuji deg sbiṭar n Wad Ɛisi, d yifremliyen i yi-yefkan afus n tallelt. I tsekla taqbaylit d kra n win irefden imru s tayri d lebɣi akken ad tennerni.”

ITRI