FFƔEN-D YIGEMMAḌ N TEMSIZZELT N TSEKLA ƔER TESBEDDIT TIREGWA N KANADA (taẓrigt 2973-2023)

Banen-d yigemmaḍ n temsizzelt taseklant i d-tettheyyi tesbeddit Tiregwa deg tmurt n Kanada. Deg teẓrigt 2973-2023, aṭas i d-yufraren s yidlisen-nsen s yal tawsit.

Arraz “BELƐID AT ƐLI” i tullist (taẓrigt tis 10) yuɣal ɣer tlata n yimura:
1- Arraz amezwaru yuwi-t Mass Lyas BELƐIDI s tullist umi yefka azwel “Taεekkazt n lqaḍi”.
2- Arraz wis sin tuwi-t Massa Nasima XUXI s tullist umi tefka azwel “Ababaɣayu ilelli”
3- Arraz wis tlata yuwi-t Mass Tufiq ΓILAS s tullist umi yefka azwel “Taqinṭuct n yibekwa”

Arraz “Racid ƐELLIC” i wungal ifazen (taẓrigt tis tesεa) yuwi-t Mass Muḥend Akli SALḤI s wungal “Tiṭ d yileḍ, ayen d-qqarent tewriqin”.

Arraz “Ṭawes ƐEMRUC” i tmucuha n yigerdan (taẓrigt tis rebεa) yesεan gar 0 d 5 n yiseggasen tuwi-t Massa Lwiza KANAB s tmacahut umi tefka azwel “Ɣerduduc”.
Ma d tmacahut i yigerdan yesεan gar 6 d 10 n yiseggasen tuwi-t Massa Mizac s tmacahut umi tefka azwel “Aqcic bu tebɣest”.
Mass Rabeḥ ƐEMMAR yuwi arraz n tmucuha i yigerdan yesεan gar 11 d 18 n yiseggasen s udlis-is umi yefka azwel “Nnig ukanun”

Arraz n tesfifin n wunuɣen yuwi-t Mass Kamal BENṬAḤA, s tefɣelt umi yefka azwel “Tinhinan temmuger tafsut”.

Arraz “Furulu” i wungal n tmeddurmant (taẓrigt tis tlata) yuwi-t Mass Ɛli BELḤUT s wungal “Ajeǧǧig n ugudu”.

Arraz “MUḤYA” i tsuqilt (taẓrigt tis snat) yuwi-t Mass “Arezqi BUDIF”, s udlis umi yefka azwel “Tameɣwant seg yillel”.

Ayyuz i wid i d-yufraren, tanemmirt i wid yekkin, nessaram-asen afud igerrzen deg teẓrigin i d-iteddun.
Tanemmirt tameqqrant i tesbeddit TIREGWA i d-yettheyyin leqdic-a i d-yettakken tabɣest i yimura-nneɣ, rnu ssidiren tasekla-nneɣ.

ITRI