Tadyant(aḥric 5):Ma tuɣaleḍ ɣer deffir qerriḥ, ma telḥiḍ ɣer sdat qerriḥ, ma teqqimeḍ tḥesleḍ

Tikwal ad nettnadi ɣef yixef n lxiḍ ur t-nettaf ara. Teεreq-aɣ taggara d tazwara. Imir-n i tettiwεir teswiεt tettiqsiḥ fell-aɣ. Acḥal n tikkal i neεweq deg ubrid-nneɣ, amek i nexdem mačči akken, ma nebɣa ad nelḥu ɣer sdat nettwaqreḥ nettwaṭṭef s waktayen d yismektiyen. Ma nebɣa ad d-nuɣal ɣer deffir ur nettizmir ara, dayen ifut wayen ifuten, yerna ula d tuɣalin-nni ahat ad aɣ-tkemmel. Acḥal tewεer tegnit-nni, ad tebɣuḍ ad treqqεeḍ kra n tlufa, ad d-terreḍ ayen akken i k-iruḥen d wayen i k-yeǧǧan, meεna ur tettizmireḍ ara. Mačči d ayen yellan deg ufus-ik, neɣ umi tessaweḍ tmuɣli-k.
Amek ihi ara txeḍmeḍ? Tuɣalin ɣer deffir ulamek, tikli ɣer sdat ulac. Ad as-tiniḍ ihi ad qqimeɣ deg umkan-iw ahat ad afeɣ iman-iw. Aḥlil i win yurǧan talwit deg tɣimit. Yak qqaren kker tafeḍ, qqim ulac. Ih, d tiɣimit i d tawaɣit, mara tgerseḍ, ad tettwaqerḥeḍ ugar, di lawan-nni i seεεunt yir tiktiwin nnuba-nsent.
Ah a tid i d-rezzun ur nenwi ur nebni fell-asent,  ttruzunt asirem, skawayent adif, ssimlulent idammen.
A lḥif-ik a win yefkan ttiεad i buhguh ad yesbekkiw ad yeqqar kan ah buh.
Ma zzint-ak-d tqeftin afeg snulfu-d afriwen axater ma teṭṭef-ik tugdi ad ak-yessebleε waluḍ.
Tugna-yik n daxel ur tt-sseεnat i yiwen, tecbeḥ neɣ tecmet eǧǧ-itt kan d ayla-k, acku telḥiḍ neɣ teqqimeḍ yiwen ur d-as-iḍaε deg-k.

Sɣur: tafukt n yiḍ