Udayen, Ḍimma d wayen-nniḍen.

Udayen deg Lezzayer asmi tella ddaw n Yiεetmaniyen, ttidiren s leεnaya i asen-yettak udabu imir-nni ; ta, ttlaεin-as ḍimma. Ḍimma, d leεnaya i ggaren i wid iwumi ttlaεin « Ahl Lkitab », wid n udlis, at udlis. D imasiḥiyen neɣ udayen. Maca, wi, ilaq ad qeblen ad idiren ddaw udabu ineslem, ad t-qadren, ad setεerfen dakken d netta ara ten-isedduyen.

Ttḥettimen i wudayen kra n yiselsa akken ad ttwaεqalen. Gedlen-asen ad lsen iselsa s yinit addalan (acku d init n yiselsa n twacult n nnbi) akked uzewwaɣ (acku d init n tekbabt n Ṭurk). Rnu ɣer waya ur ilaq ara εellen tacacit, agennur amellal akked ubernus amellal. Ttaǧǧan-asen anagar iselsa iberkanen s lekmam d iɣezfanen. Abernus-nsen, s tuget, d azegzaw (bleu). Arabini (le Rabbin) Abraham Cahen, yura-d dakken deg Ldzayer yella d azegzaw aqesḥen, ma deg temnaḍt n Titteri yella d aɣiɣdan aqesḥan. Deg Qsenṭina, ttaǧǧan-ten, kra n wakud akken, ad lsen ibernyas, igennuren akked kra n yisebbaḍen yettkanzin ɣer wid ttlusun waεraben. Maca rnan kra kan ugin-asen ; da, akken i as-d-tenfeḥ kan i lbey ara xedmen.

Udayen, imir-nni, ur ttlusun ara isebbaḍen anagar yiwet n tsekka iwumi ttlaεin « savate ». Ta, ilaq ad tili meẓẓiyet ɣef yiḍarren-nsen akken igerzan-nsen ad yettlasi lqaεa. Γef waya, ass n 13 duǧember 1788, ḥebsen deg Ldzayer tamanaɣt akk udayen i yugin ad ten-lsen akken-nni, fkan-asen 300 n tyita s ucelliḍ ɣef yigerzan-nsen.

Deg Lezzayer tamanaɣt, deg ubrid, ur ttizmiren ad awin imrigen yid-sen neɣ akanki iceεlen. Ttaǧǧan-ten ad awin yid-sen anagar tacemmaεt i yesnusuy ubeḥri deg tikelt ɣer tayeḍ. Seld 18.00, ur zmiren ad ffɣen siwa ma wwin-d turagt (autorisation) sɣur yimḍebren.

S umata, zemren ad sεun iɣyal neɣ iserdyan maca war ma sεan tarikt (selle). Ur d-yewwi ara ad sεun aεudiw acku yesεa ccan. Mi ara d-mmagren ineslem, ilaq ad t-ǧǧen ad iεeddi seg tama tayfust, ma d nutni ad ṭṭfen tama taẓelmaḍt, s tin n leqder. Sdat n lǧameε neɣ zzawiya, ilaq ad kksen arkasen-nsen. Ma teldi tewwurt, ilaq ad bernen iqerra-nsen bac ur ẓẓaren ara wid yettẓallan akken. Ma ur xdimen ara aya, ad ttwawten yerna mliḥ. S umata, udayen imir-nni, ttwaḥqaren myiḥ. Ur ttezzin ara akk deg yidgan anda ttezzin yinselmen anagar deg wulzuzen (leswaq). Deg taliwin, ilaq ad ǧǧen ad zwiren yineslemen anagar ma zwaren nutni ɣer dinna.

Mi ara tekker gar wuday d yineslem, d lqadi ara tt-yefrun gar-asen yerna ilaq ad as-sudnen afus-is. Awal n wuday, yesεa azal ɣas yenkeṛ yineslem-nni ayen i d-yenna. Mi ara yili umennuɣ gar wudayen deg wayen yerzan arcal, inebran, tukkest (héritage), d arabini ara izerfen gar-asen sdaxel n lǧameε-nsen (synagogue). […]

Deg wayen yerzan ccreε, deg yal tamdint, sεan wudayen win i ten-id-yettgensisen (représenter). Wa, d Dday i t-id-yettextiren, ttlaεin-as « Muqaddem ». Tamlilt-ines (son rôle), ad idbel (administrer) s yisem n Dday udayen i yettidiren dinna. D netta i yettaṭṭafen idrimen n tebzert akked wid n tẓeṭṭaḍt (taxe).

Σisa Cennuf.
Les Juifs d’Algérie, 2000 ans d’existence.
Sb : 28-29.
Yerra-t-id ɣer tmaziɣt : Σabdennur Ḥamiṭuc.