Amawal n yinzan (Aḥric 3): issin 10 n yinzan seg temnaḍt n At Smaεil d yinumak-nsen

Deg yinzawal i d-yessuffeɣ Mass Sadeq Rebbaεi deg useggas n 2019, ugar n 800 n yinzan i sseqdacen deg temnaḍt n At Smaεel i d-yewwi deg-s, s usegzi d unamek-nsen.

Newwi-awen-d ass-a 10 deg-sen.

1) Aḥeddad ibeddu g yiɣil-is:
Awal-a heddren-t i win yebɣan ad ijerreb kra, imi ilaq-as ad d-yebdu deg yiman-is send sd ijerreb deg wiyaḍ. Neɣ war akellex, shat ɣef uzagur n win i-k-iqerben send ad tεeddiḍ ɣer win ur-k-yessin.

2) Akan iẓeṭṭ deg ucṭaṭ aneggar:
Yettuɣal-d yinzi-ya mara ttutlayen medden ɣef win yeṭṭef wusi s kra n waṭṭan ameqqran; mara yesselqaf, meḥsub d tanuffist-nni kan i as-yeqqimen ad d-teffeɣ.
Daɣen mi ara yili kra n lexsem nrɣ n uɣllif qrib ad yefru, qqaren-t yinzi-ya.

3) Aka ugeṭmir lkkan i yeεmir:
Qqaren-t ɣff umdan yemmden, yeččuren, i yesεan lqedd, maca war ibaɣuren axaṭer ur telli lefhama deg-s neɣ yid-s.

4) Akeccuṭ n trummet di k-yesderɣel :
Ttinin-t deg tegnit ideg yebɣa yiwen ad yestehzi deg wid i as-d-yettbanen xussen deg kra, netta dɣa deg wid-nni swaswa ahat i tella ccṭara d tirrugza. Acku yezmer deg win ideg ur teḍmiεeḍ tazmert i tella tebɣest d lhiba.

5) Akeyyal d aεeẓẓug:
Ttinin-t deg kra n tegnatin ideg beṭṭun neɣ ferrqen lxir- am deg ssuq- acku win yettektilin ur yesmeḥsis i wayen ttutlayen wid i as-d-yezzin, neɣ i wayen as-d-qqaren; yelha-d kan d ccɣrl-is.

6) Aktar yettukay-d sennig lkanun: Qqaren-t Ayt Smaεel mi ara d-yekk yihwah seg win i k-iqerben akked win seg ur teḍmiḍ ayen n diri; ama d gma-k, tameṭṭut-ik, d wiyaḍ.

7) Al di d-innerni d ss-nsemmi:
Yesmektay-d tignatin ideg ttutlayen medden send lawan ɣef wayen ur nelli εad gar yifassen-nsen, dɣa ad d-yenṭeq wayeḍ s yinzi-ya, imi awal aḥeqqani d ccɣel fell-as, ad d-yili asmi ara d-teḥḍer teswiεt-is.

8)  Aleqqim aleqqim, taẓallit teqqim:
Inzi-ya yesεa assaɣ akked wayen yellan sdeffir tudert, imi amdan yeṭṭafar ad yessali, ad yesnernicci n ddunit, dɣa itettu ad yexdem ɣef laxert-is s uhbaj i uhebbej deg wass-is.

9) A leεyal n gma, ɣur-m leεyal n gma-m:
Inzi-ya tenna-t yiwet n tlust i tmeṭṭut n gma-s, imi tekreh-itt, teḥqert-itt daɣen. Meḥsub tameṭṭut ireclen, ilaq ad tqader uletma-s n urgaz-is, neɣ talust-is, ad texdem amek ara tt-tessefreḥ nrɣ xersum ur as-tesluɣay ul-is.
Acku tameṭṭut-nni amek akken tebɣa nettat lxir sɣur tmeṭṭut n gma-s, i tebɣa tlust-is lxir sɣur-s.

10) Allah lḥed a tizi lḥed, imma d baba ul din ḥed, lxir ur t-ṭmiεeɣ de- ḥed:
Yesmektay-d yinzi-ya addad n umdan yellan d awḥid, yetteklen kan ɣef yiman-is, acku ulac win ara as-yeṭṭfen afus, ulac win ara ibedden ɣer tama-s.