Tasekla tacawit : kraḍ n wungulen i d-yernan i temkarḍit n tira tamaziɣt

D ayen yessefraḥen nezzeh imi tira s tutlayt tamaziɣt simmal tettnerni. Ladɣa ma nwala belli d tilawin-nneɣ i ireẓẓen leqyud, ttarunt s tektiwin-nsent, kecment amaḍal n tira seg teggurt-is tawessεant.

Yuɣ lḥal kraḍ n tneggalin ticawiyin i d-yessufɣen ungalen d imaynuten ussan yezrin. Sin deg-sen d asnulfu, wis kraḍ d tasuqilt.

Amezwaru d ungal n Massa Ɛica Malim ” Aicha Malim” umi tefka azwel ” tayri ineqqen ” i d-yeffɣen s ufus n tallelt n uɣlif n yidles d tẓuriwin.
Ungal-a tbudd-it tmarut i tyemmatin d wid yuḍnen dɣa tenna:
<< ad t-ssekkiɣ i yal tayemmat ičuččen
tayri ula tettwaker-as,
i yal amaḍun n ssilikuẓ deg Wawras,
u deg umaḍal sumata, yellan werɛad yettfafa ɣer tmeddurt,
yessgaẓẓaḍ ɣer-s dima,
ula yella deg yimi n tmettant>>.

Wis sin d ungal ” tikerket n yixallufen ” i d-tessuffeɣ tmedyazt Massa Ult Gana. Deg ungal-a, tewwi-d ɣef yiwet n teqsiḍt i yeḍran deg tilawt deg useggas n 1936 n yiwet n teqcict tucbiḥt i iḥuza waṭṭan nettat mazal-itt d tacawrart. Ungal-a ḥeḍru-d ad yili deg tnedlisin ɣef leḥsab n wayen i d-tberreḥ tmarut.

Ma d wis kraḍ d adlis ” l’ étranger ” n Albert Camus i d-tessuqel tselmadt Taziri Duwaxa ” Thaziri Douakha” i tcawit s uzwel ” Imezdi ” i d-yeffɣen ɣur teẓrigin adlis bellezma.

Ad d-nesmekti belli sin n  yedlisen deg-sen ara  yilin di rreḥba n SILA seg 25 armi d 4 wambir 2023. Win n Massa Ɛica Malim akked win n Massa Taziri Duwaxa. Ili-ken ihi di ttiεad.

Nekni seg tama-nneɣ nessaram-asent afud igerrzen deg leqdic-nsent ɣer sdat.