Awal ɣef unaẓur Estas Tonne s teqbaylit

Estas Tonne, d ameskar, d amẓawan. Ilul ass n 24 yebrir, aseggas 1975, di tmurt n Ukraine n tura.

Yekka sḍis n yiseggasen netta ilemmed tagiṭart taklasikit. Maca mi tunag twacult-is ɣer tmurt n Israyil yeǧǧa alemmud-ines.

Deg useggas n 2002, mi yella di Marikan, yeqqel ɣer tgitart. Din i yezdi akked d uvyulunist (violoniste) Michael Shulman. Kkan-d akkit i New York, slan-asen yimdanen, walan-ten akken di sin yid-sen, ladɣa deg usmekti n tedyanin n 11 ctembeṛ 2001, deg umṛaḥ “Union Square”.

Dɣa seg useggas n 2002, inig yettak-ik i wayeḍ, Estas ixeddem ibarazen (concerts), yekka-d amaḍal i merra, “Marikan, Miksik, Isṛayil, Lhend, d Luṛup. Tirmitin (Expériences) i d-yewwi seg usikel-ines sya ɣer da, snernant aswir-ines, fkant-as ad yettwassen s uɣanib-ines (style) anḍan (varié).

Yettwanced ɣer waṭas n tfaskiwin tigreɣlanin, gar-asent: Buskers Festival Stadtspektakel di Landshut n tmurt n Lalman. Aufgetischt Festival! d Saint-Gall n tmurt n Swis. No Mind Festival deg useggas n 2013 di Ängsbacka, di tmurt Suyid… D waṭas n tmura-nniḍen.

Deg useggas n 2015, yettunefk-as warraz n “Cosmic Angel” di tfaska n “Cosmic Ciné” imi yekki s usaru-ines “Internal flight”. Tafaska-a d tin i d-yeḍran di Myunix.

Deg useggas n 2016, Estas TONNE ixdem sin isiklen (tournées). Amenzu deg tefsut, di tmura n Luṛup, wis sin deg lexṛif deg tmura n Asiya. Akken daɣ i yekki deg ddeqs n tfaskiwin, di Luṛup diɣen.

Estas Tonne, yettiki deg ibarazen, isaragen, tifaskiwin i d-yettilin deg iberdan, yuga, d wayen nniḍen. Akken daɣ i yetteki deg yisenfaṛen yemgaraden n yisura. Kra ffeɣen-d, wiyaḍ mazal.

Anaẓur Estas Tonne, d win yeskelsen aṭas n yiḍebsiyen n uẓawan. Tugget-nsen tzemrem ad ten-tafem deg Bandcamp neɣ deg usmel-ines unsib.

Asaru “Internal Flight” n Estas Tonne:

Yiwen seg yibarazen n mass Estas Tonne:

Sɣur Mmi-s n Yilel