Tadiwennit akked Tmaziɣt Musawi << i yiselmaden n tmaziɣt, sbeddet lqedd-nwen, tzuxxem ternum , imi.......>>

Di tdiwennit-a nenced Massa Tamaziɣt Musawi i tdiwennit, dɣa terra-d i yesteqsiyen-nneɣ s tumert.
Tamaziɣt Musawi d amedya n tmeṭṭut taqbaylit tuḥrict tuḥdiqt. Γret tadiwennit-a ad tt-issinem ugar.

–Aɣmis isaḥliyen: Nessen lidya daou d taselmadt n tmaziɣt, d taqeddact deg yiẓedwan inmettiyen i ubaɣur n tutlayt-nneɣ. Mmeslay-aɣ-d ugar fell-am?

Tamaziɣt Musawi: tazwara isem-iw mačči Lydia Daou.  Ddmeɣ isem n yelli. D tarewla ɣef rrɛic n lɣaci. Isem -iw n tidet Nadia Moussaoui. D taselmadt n tmaziɣt deg tesnawit n Ɛelyan Ḥmimi deg tesnawit n Ccerfa. Tubiret.

Ttwassneɣ deg yiẓeḍwa inmettiyen s yisem Tamazight Moussaoui, imi d taselmadt n tmaziɣt yerna ḥemleɣ nezzeh idles-nneɣ.
Bdiɣ 3 n yiseggasen ayagi leqdic-iw deg yiẓeḍwa inmettiyen-agi, tazwara bdiɣ s uselmed  deg youtube , ssakin kecmeɣ-d ɣer Facebook s tmucuha, inzan, tira n tmaziɣt, iwakken ad ssiwḍen yimḍefren ad d-qqaren s tmaziɣt, wa AD lemden yid-i awalen imaynuten.

–Γef leḥsab n termit-inem deg uselmed n tutlayt tamaziɣt. D acu-t wawal-im ɣef uswir n uselmed-is ass-a?. D acu-ten uguren i tesεam kunwi s yiselmaden?

Ayen yeɛnan aselmed n tmaziɣt yuẓa ɣer sdat, imi aṭas n waɣiren anda i tettwaselmed tmaziɣt ass-a . Aṭas n yinelmaden i tt-yeqqaren daɣen. Ayagi akk d abaɣur. Uguren i d-nettmagar d ugur yerzan  tamaziɣt s ufran ma ad tt-tesɛeddiḍ deg yikayaden unṣiben neɣ xaṭi ( facultative), limmer ad tili ( obligatoire) , ad tesɛu azal ugar.

–D acu i tettwaliḍ kemm d tifrat akken ad tennerni tutlayt ugar?

Ihi, tifrat akken ad tennerni tutlayt -nneɣ ilaq ad tili d tunṣibt s tidet deg myal taɣult, iwakken ad rren lwelha ɣur-s medden i merra.

–D acu-ten yiwellihen i tzemmreḍ ad d-tefkeḍ i yiselmaden-nneɣ n wass-a s yisem-im d taselmadt?

Iwellihen i zemmreɣ ad d-fkeɣ i yiselmaden n tmaziɣt, sbeddet lqedd-nwen, tzuxxem ternum , imi tesselmadem tutlayt n tyemmat. Ɣur-wat d anwa i awen-yettkellixen s yisem n tutlayin tiberraniyin d tutlayin n tussna , kunwi mazal -iken deg taqbaylit. Ḥṣut , ur yezmir yiwen ad d-yali ɣef uzagur-ik ḥaca ma tekniḍ. Nekkni ur nettruẓu , ur nkennu

–Ahat ula d iẓeḍwan inmettiyen rnan-d abaɣur-nsen seg yiwet n tama i tutlayt. D acu tenniḍ?

D tidet , iẓeḍwa inmettiyen d abaɣur i teqbaylit, imi nkeččem akk s ixxamen n yimaziɣen, ssibninen awal, lemden deg yixxamen s yiɣimi.

–Ddeqs-aya kemm tqeddceḍ deg yiẓeḍwan inmettiyen. Ḥku-yaɣ-d amek i am-d-tusa tikti?

Tikti tusa-yi-d deg wussan n Corona , akman, ixeddim ulac, dɣa bdiɣ leqdic deg youtube .

–D acu i tasga n diri deg yiẓedwan inmettiyen?

Ayen n diri deg yiẓeḍwa inmettiyen, jemɛen myal amdan, qeccuc, meccuc, win ifehmen d win ur nefhim, uḥdiqen d wudɣilen, ihi ad tedmuḍ ɣef kullec alabeɛda taruẓi n yifadden

–S yisem-im d tameṭṭut taqbaylit, d acu i tzemmreḍ ad asent-tiniḍ i tlawin i ur nesεi taflest deg yiman-nsent, neɣ i tid yebɣan ad d-banent ad qedcent meεna ttkukrunt?

Ad d-iniɣ i tmeṭṭut taqbaylit, kker ɣer lecɣal-im, mi tesɛiḍ asenfar, xdem-it War akukru, ṭṭef deg nnif-im, ur smuzgut i yiwen, ṭṭef deg ubrid n teqbaylit, qqen allen-im, tesɛuẓgeḍ ɣef yir awal.

–Tanemmirt imi i d-terriḍ i yisteqsiyen-nneɣ. Awal-im n taggara?

Taggara , ad d-iniɣ tanemmirt -nwen, afud igerrzen ula d kunwi deg leqdic-nwen. Tamaziɣt tuḥwaǧ akk arraw-is, yak wa d acu-t wafud ara d-yernu i tutlayt -nneɣ.

Temmug tdiwennit sɣur: tafukt n yiḍ