Amawal n yinzan (Aḥric 4): issin 10 n yinzan seg temnaḍt n At Smaεil d yinumak-nsen

Deg yinzawal i d-yessuffeɣ Mass Sadeq Rebbaεi deg useggas n 2019, ugar n 800 n yinzan i sseqdacen deg temnaḍt n At Smaεel i d-yewwi deg-s, s usegzi d unamek-nsen.

Newwi-awen-d ass-a 10 deg-sen:

1) A lεib-im a tigert gar tigratin, umma nekk aɣrum-iw akan g uqelmun

Qqaren-t i win ur nettseggim lecɣal-is, yerna ɣas ad t-yenhk win yessnen walbaεd ur yettḥessis. Am win yebɣan ad as-yini iḍur iman-is, iga-d ccuha i yisem-is, ma d winna i t-iwessan ur yeɣfil am netta.

2) A lxalat ay isetma ur xeddment ula imi, anta taseṭṭa ur ihuz ubeḥri:
Ttinin-h akken ad d-smektin tuget n medden belli tuccḍa, aɣbel neɣ lεib, ma yedder-iten yiwwas, ad ten-yedder ula d wayeḍ deg walbaεḍ n wussan. Meḥsub ur ilaq ad ihedder ḥedd ɣef wayeḍ, ad yestehzi neɣ ad yiḍs fell-as, acku ad td-tas teswiεt ideg ara yili deg waddad-n. D ayen yellan deg talsa, imi ahat ulac amdan ur nxus, ulac win ur neɣliḍ, ulac win ur neswaɣ…Daymi ur ilaq yimi deg waya.

3) Aman acḥal yebɣu yekk lḥal, ad qqlen i ubrid-nsen:

Ttinin-t ɣef uẓar i yettuɣalen dima ɣer lasel. Amedya, mara afen wid i beɣɣun ad salin ttraεi deg yimukan ansi llan ttεeddin waman, ama d iɣeẓran neɣ sdat isaffen. Am wakken ad ten-id-smektin, ad ten-wessin, acku aman am lasel dima ttuɣalen ɣer lasel. Qqaren-t s umata ad d-sfehmen belli ayen ur nelli deg umkan-is, ad d-yas wass ideg ara yuɣal.

4) Aman d laman:

Ttinin-t deg tegnit ideg neɣlen waman ɣef tfekka neɣ ɣef tɣawsa n umdan; imi ur tesεiḍ d acu-tt temḍerrit ara d-yekken seg-sen.

5) Amaẓuẓ yesseɣmay-d akaẓuẓ:

ttinin-t anagar ɣef luεara n umaẓuẓ deg twacult-is. Acku skud d amecṭuḥ-nsen i yella, yeẓra belli yettwaεaz s waṭas, daymi yesnefcic ɣef yimawlan, yessutur deg-sen ad as-xeddmen rray-is. Tikwal dɣa lefcuc-nni ttawin-d zzεaf daɣen.

6)Ameḥduq medden akk nnes, amexlul d iqqim weḥd-s:
Yettwabdar-d yinzi-ya ɣef sin n yimdanen i yemgaradeg di ddunit. Win n lεali ad t-ḥemmlen wiyaḍ merra ad t-tebεen, ma d win n diri ad t-ǧǧen akked lkerh-ines, dɣa ad d-yeggri i yiman-iskan, ad t-rren medden am uderwic.

7) Amek anka ay ifker, akka seg wasmi i d-nekker:
Ttinin-t mi ara yesteqsi umdan wayeḍ i yellan dima tεebba fell-as – d axeddim dima – imi ur yelli wacu ibedlen fell-as; d yiwet n lḥala s kra yekka useggas.

8) Amek tesεit ay teswit:

yeskanay-d amek tettwali tmetti bab n cci neɣ bab n tmussni, acku win yesεan ttaken-as azal ugar imi ẓerren-t d bab n leεnaya. Yezmer ad t-ḥwiǧen yewwas.

9) Amek teṭṭsent ay ttemwalant:
Qqaren-t mi ara walin sin εedlen di tektiwin, zdin taqerruyt, neɣ mi ara dukkulen s waṭas.

10) Amek ttciben ay ttεiben:
Ttawin-t-id asmi ara ẓren amdan yeddan deg leεmer, izegren i tewser, netta yettara iman-is meẓẓi, ibeɣɣu ayen i t-ifuten. Tugart ɣef tuzzuft – mi ara iεawed urgaz rrcel, yerna ixeddem tid n yilemẓiyen yellan deg tissal-nsen.