TAƔURI TASEKLANT I WUNGAL « TIṬ D YILLEḌ » N MUḤEND AKLI SALḤI

S wuẓru ẓẓayen i d-yekcem mass Muḥend Akli Salḥi ɣer tccemlit n lebni ugadir n tsekla taqbaylit. S wungal « Tiṭ d yilleḍ. Ayen i d-qqarent tewriqin » i d-yeffɣen ɣer tezrigin IMTIDAD.

D tasrit ur nesɛi zzman, ur iban anwa akal ideg teḍra, ur iban anwa i tt-id-iḥekkun neɣ wagi i d-iḥekkun la yettaru neɣ la yeqqar tiwreqtin. D amrar ɣezzifen yeččur d tiyersiwin icudden. Simal tettin yisebtar n udlis fettint tyersiwin tettban-d lbaḍna n teḥkayt. Lbaḍna tezzuɣur imeɣri, tetteẓẓu deg-s tawennafit alama yekfa taɣuri n wungal.

Aɣanib yufafen idehnen s tenfaliyin d tugniwin n tussnakyest. Imeɣri yewwi-d fell-as ad asent-iruḥ s tefdent akken ad yegzu anamek akken daɣen ad yestumen s wurar d ccbaḥa taseklant ibubb wungal. D aɣanib yettakken azuɣer i yimeɣri. Yessenddah allaɣ ad imyez akken ad yefhem lmeɛna n wawal.

Ungal « tiṭ d yilleḍ » yewwet-d tawwurt s rrkel yessegrawel tasekla taqbaylit. Yeqqel-d uqelmun ɣef tuyat, tuɣal zzit s aɛeqqa. Iseɣta tuccḍiwin i nɣil ṣeḥḥant armi i tent-id-newret d tanumi. Netteddu akken ddan waman armi yeɛreq nekk deg netta. Neqqen ɣer yigig n tjadit, lḥedd n umnar d nnif d lḥerma. Nesmeḥsis i ccnawi n yigenwan i d-innefḍen d anfaḍ ; armi uɣalent tlisa i ccnawi n wakal. Terzeg tekcem deg tiẓeḍt, yettwakbel usnulfu.

Unagal ṭiṭ d yilleḍ d iger amellal ideg ttnaɣen yisekkilen. Isekkilen imḥaddiyen yessawalen ɣer tatut ara imeḍlen tuḥsifin. Tatut ara ideggren amdan ɣer lǧefna n tnifift ; ad iruḥ di tatut umuḍin ur nebɣi ad yecfu. Seg tama nniḍen isekkilen ssawalen ɣer tkatut « ccfawat » yeqqazen di zzman xas ulama zzman-nni ur isefraḥ ur yettiḥnin ɣef umejjay amuḍin iwumi sxerben temẓi. Takatut d aɛrur n tatut, yal udem iɣunza wayeḍ, ayen yellan gar-asen am wayen yellan gar yilleḍ d tiṭ.

Ungal « Tiṭ d yilleḍ » d tasarut ɣer tira taseklant. Deg-s iwellihen ara isnekkren imeɣri ɣer tira akken ur yettili d ameksa « d nekki d netta » i ksan yimyura. S tira ara yekkes akukru d tugdi. Ad d-inulfu ucqirrew itteddun di nnmara i uḍad isewɛaden. Ad yekkes leqyud yurzen tira, leqyud i as-terra tjadit n wat ddan waman neɣ n yiɛessasen n ccnawi n yigenni. S wakka ara d-nulfunt tektiwin timaynutin ara d-isleqḍen imeɣriyen ɣer tɣuri ; mi ɣran adlis ad ak-innin rrnu-d wayeḍ.

Salḥi Muḥend Akli ur d-qqareɣ yewweḍ ɣer tqacuct imi win yewḍen ɣer tqauct i as-d-yeggran d tarusi. Meɛna zemreɣ ad d-inniɣ ineǧǧer-d targga tamaynut i tira taseklant. Ungal-is ad yili d amedya i yimyura yebɣan ad salin aswir i tira s teqbaylit.
Tira d ddwa i tiṭ iɣef yers yilleḍ armi i tt-ɣunfant wallen. Illeḍ ad yeɣbu, tiṭ ad as-d-tuɣal ccbaḥa-s.

Lyas BELƐIDI
ASS N 1U YUNYU 2022