Amek i tthuddun yiẓeḍwan inmettiyen idles-nneɣ?

Deg yiseggasen ineggura uɣalen medden sεeddayen tuget n wakud-nsen deg yiẓeḍwan inmettiyen, ama d facebook, tiktok, instagram, you tube neɣ d wiyaḍ.
Amaḍal-a asugnan i win i yessnen azal-is, d adeg ideg yezmer yiwen ad yegmer ddeqs n tmussniwin, meεna i wid umu tedderɣel tefrit d amihi ageεmir i yetthuddun llsas n tmettiyen.

Ma neddem-d tametti taqbaylit d amedya, ddeqs n tlufa ay bedlen deg-s segmi i d-nnulfan yiẓeḍwan inmettiyen.

Tameṭṭut taqbaylit n zik tella d taḥerrazt n wansayen-nneɣ, ma d tin n wass-a tuɣal tenker-iten tettabeε ansayen n yiberraniyen, ama deg yiselsa, tuččit, tutlayt, neɣ d wayen akk i yexḍan i yidles-nneɣ.
Γef usentel-a dɣa yemmeslay-aɣ-d yiwen n yilemẓi : << ansi i d-kecmeɣ ad d-afeɣ yemma tettnezzih deg usawal-is, teṭṭafar tid i d-ixedmen sridat. Ula d axxam testehza deg-s, tikkelt tella tuččit, tikkelt ulac. Tewweḍ armi i twexxer fell-aɣ i wakken ad tnezzeh tividyutin-nsent. Ayen i yi-iɣaḍen ugar, d awalen i tuɣal teqqar-iten-id s tutlayin-nniḍen imi εerqen-as s teqbaylit se- unezzeh n tigi>>.

Rnu ɣur-s, tameṭṭut taqbaylit si zik tettwassen s nnif d tfenṭaẓit-is. Ass-a uɣalent  d ticeṭṭaḥin yetthuzzun ammas-nsent di tiktok, instagram d you tube.
Ur teḥbis lemḍerra n tedyant dagi, ula d tisutiwin i d-yekkren, glant s yes-sent ttabaεent ttεanadent deg-sent, jebbdent-tent ɣer wasif seld imi i tent-yewwi nutenti dayen.
Ur d-yegri usettḥi d sser n teqbaylit, ayagi akk s wayen umu semmant nutenti agmu (développement ).
Acḥal d tilemẓit i yeffɣen i webrid acku tettabeε timeεfunin i iεefnen, i yebɣan ad yesseεfen tiregwa zeddigen. Acḥal d ilemẓi i iruḥen d asfel n turart s wallaɣ i tturaren yes-sen.
Acḥal d tawacult yettwaferqen, imi yekcem ubabat deg ucebbak n tigi i yeznuzun iman-nsent s kra n yisurdiyen. Neɣ ɣef sebba n tyemmat i ibedlen abrid i d-telḥa d iseggasen-aya.

War ma nettu irgazen i yebran ass-a i tirrugza, serḥen i warraw-nsen d yissit-nsen xeddmen ayen  i asen-yehwan.
Anda-t leqder i yesεa zik ubabat, anda-tt tugdi i d-irebban tisutiwin, anda-ten wansayen i yezdin tiwaculin i yesdukklen tuddar?.
D aniwa ara nesseḍlem ass-a, d ababat neɣ d mmi-s.

Di taggara, yewwi-d ad d-nebder belli, ɣas ulamma uɣten wid d tid yeswaɣayen ilemẓiyen, llan wid i yessidiren asirem, xeddmen akken idles d tutlayt-nneɣ ad nnernin.
Dɣa d lwajeb ad ten-nesnemmer.
Ma yella seg tama n yimawlan, ilaq myal ababat neɣ tayemmat ad yettεassa arraw-is, akken ad iseggem tikli-s.