Tukkist seg ungal ” tafsut d tinigit ” n Mass Nadir Saxri.

[…] Ma yella d lmal-nniḍen, abeεda tiɣeṭṭen akked wulli, imezdaɣ n Ulma am yimezdaɣ n tmurt n Leqbayel s umata, akken ad ddsen taksawt n lmal-a, xeddmen ayen iwumi qqaren : « Ajemmaε » neɣ « Nnuba n lmal ».
Yal axxam yettekka deg-s s yiwen n yixef, sin neɣ ugar. Asmi ara d-taweḍ nnuba-s, ad yefk ilemẓi n uxxam-nni neɣ ad yefk ameksa s lijara akken ad yeks i uxxam-nni lmal n taddart. Win yesεan ixef ama d taɣaḍt neɣ d tixsi ad yeks azal n yiwen n wass, win yesεan sin n yixfawen ad yeks azal n sin n wussan, win yesεan kraḍ n yixfawen ad yeks azal n kraḍ n wussan …atg, alamma tezzi-d fell-as nnuba tamaynut.
Ameksa neɣ imeksawen iwumi d-tewweḍ nnuba, ttekkaren zik send tafrara n wass, anagar ussan n lḥebsan : ussan n uɣelluy n ugeffur, adfel neɣ ussan n lεid. Imeksawen, ad neddhen umbεed ad εeddin ɣef yixxamen seg usammar ɣer umalu, seg unẓul ɣer ugafa n taddart, ad d-kken izenqan n taddart yiwen yiwen. Alma, deg-s kuẓ n leḥwari, yal lḥara s uzniq-is : Lḥara n Yirzi, Lḥara Talemmast, Lḥara n Teqwirt, Lḥara n Ugni. Yal axxam iɣef d-kkan ad yebru i lmal-is. Wa, yesεa taɣaḍt ; wayeḍ, d tixsi d warraw-is.
Taɣaḍt neɣ tixsi, ma yella turew neɣ d ussan-is ad tarew ur tetteddu ara d ujemmaε ; tin, yurwen ilaq-as ad teεlef timẓin idehnen s zzit n uzemmur ad ternu ad tezdel deg waddaynin kra n wussan akken ad teḥlu ; tin, ara d-yarwen ur ilaq ara ad teddu d ujemmaε ma ulac ad tt-cekkḍent tɣeṭṭen-nniḍen ad teɣri, ɣef waya tlaq-as lemḥadra. Iɣid neɣ izimer, asmi ara d-lalen alamma lhan, tteṭṭḍen tamaẓẓagt n yemma-tsen. Mi ara lhun laqen-asen i yiɣiden-nni neɣ i yizamaren-nni yisudal i yiqemmucen-nsen neɣ tacekkart ad ɣummen yes-s tamaẓẓagt n taɣaḍt-nni neɣ n texsi-nni akken ad yeḥbes tuṭṭḍa deg yiffan n yemma-s. Akka taɣaḍt neɣ tixsi ad tejmeε ayefki tameddit n wass.
Ulac axxam deg taddart ur nesεi ara ulamma yiwet n taɣaḍt abeεda i tuẓga n uyefki. Taɣaḍt, tettwanas at uxxam, ha-tt-an deg waddaynin, at uxxam ad swen ayefki. Ma tella tin yessuṭṭuḍen, tuḍen deg uxxam-nni neɣ iruḥ-as uyefki, tezmer xerṣum ad as-tefk i mmi-s ayefki n taɣaḍt akken ad yerfed iman-is wa ad yelhu. […]
Nadir Saxri.
D tukkist seg wungal : Tafsut d Tinigit. Sb : 52-53.

Sɣur: Abdenour Hamitouche