Tajmilt i umaru Ḥmed Nekkar di temkarḍit tagejdant n Tizi Wezzu

Di temlilit i d-tga temkerḍit tagejdant n Tizi Wezzu di tfaska n tɣuri s wurar, di ttiεad i d-tga ussan iεeddan i lmend n wass agreɣlan n llufan, tella-d tejmilt ɣef Umaru, amsiẓreg, acennay d umedyaz Ḥmed Nekkar.
Di tejmilt-a ḥedren aṭas n wid i t-issnen d wid i t-iqerben. S lmendad n wid i t-issnen, d wid merra i t-iqerben, gan-as yiwet n tejmilt ɣef wayen ixdem i teqbaylit seg wasmi meẓẓi armi i t-tewwi tmettant ur nebni fell-as.

Iwakken ad d-nesmekti, Ḥmed Nekkar ilul deg useggas n 1955, 13 di Meɣres. Ittwaḥbes deg useggas n 76 ɣef ddemma n Tmaziɣt mi ufan ɣur-s kra n tesɣunin n tmaziɣt. D argaz amḥaddi, yefka akk tudert-is akken ad d-teffeɣ si tillas tmeslayt-is, tin iɣef inneεtab akken iwata. Illa d aεeggal n ugraw “ifgulen” d awal i d-yewwi si tmacaɣet i ibɣan ad d-yini ayen idreg zzman.
Ifka akud-is mi yella d aselmad n uẓawan, yerna iga aṭas n tmedyezt i yuɣalen d tizlatin.
Yura ugar n 10 n  yidlisen s teqbaylit, gar-asen:
1. Adlis n Tγuri / Ahmed NEKKAR
2. AKRURAN. / Ahmed NEKKAR
3. Alis di tmura n tirga / Ahmed NEKKAR
4. Apprendre Tamazight maintenant. / Ahmed NEKKAR
5. Aẓeḍḍa n tissist. / Ahmed NEKKAR
6. Ger zzebra d yifdisen. / Ahmed NEKKAR
7. Inebgi n Ṛebbi. / Ahmed NEKKAR
8. Tibḥirt n temhargiwt. / Ahmed NEKKAR
9. Tuddert ger zzebra d yifdisen. / Ahmed NEKKAR
10. Yugar ucerrig tafawet. / Ahmed NEKKAR i yewwin arraz n Mulud At Mεemmer deg yiseggasen n 90 i d-tettheggi imir-n tfidiralit n tdukliwin timaziɣin.

Irna yerra-d adlis n Lwennas At Lewnis “le rebelle” ɣer teqbaylit.
Ḥmed Nekkar yemlal d waṭas n yimura dɣa seg-sen wid i d-ifkan tinagiyin-nsen ɣef wamek i t-ssnen.
Seg wid iḥedren di tejmilt i as-yuɣalen, yella Mass Ḥarkat d amaru amsiẓreg, d aselmad, yexdem d Ḥmed aṭas, dɣa d netta i d inebgi agejdan n tejmilt. Yules-d ayen akk iεac Ḥmed yid-s mi llan sselmaden akken: “…Ahat zemreɣ ad d-iniɣ d akken armi iḥemmel taqbaylit i iḥemmel ad yeg aẓawan, ad isselmed aẓawan deg uɣerbaz. Nekk daɣen sselmadeɣ ayen nniḍen deg uɣerbaz, maca neddukel akken ad neg yiwen umecwar deg uselmed n wayen i nḥemmel. Ḥmed, ikka-d nnig n wayen tettraǧu deg-s teqbaylit. Nekka akken deg yiwet n tdukla i d-nga iwumi nsemma “Tala n tussna”. Din daɣen iga amḍiq amezwaru i wayen akk icudden ɣer tmaziɣt.”
Maǧid Umniya daɣen yefka-d tinagit-is s imeslayen-a: “…Nekk zedɣeɣ deg yiwet n temnaḍt ideg yesεa tanedlist, din i t-mlaleɣ i tikkelt tamezwarut acku bɣiɣ ad d-ssuffɣeɣ adlis s teqbaylit… Nniɣ-as ur d-ttaruɣ ara s tutlayin tiyaḍ, imi yal tutlayt tesεa arraw-is. Nekk qesdeɣ ad d-aruɣ s teqbaylit, maca ur ssineɣ ara. Dɣa ufiɣ-d Ḥmed di lmendad, iεawen-iyi akken ad ssiwḍeɣ ad d-ssuffɣeɣ ayen uriɣ, s teqbaylit. Ihi yettaǧǧa ccɣel-is akken ad d-yelhi yid-i. Ih, yettaǧǧa ccɣel yesεa akken ad yi-d-imel kra n tarrayin swayes ara ssiwḍeɣ ad snekmaleɣ isenfaren-iw.”
Nnayer, mmi-s n ḥmed, yenna-d awalen-a: “Ḥmed, Baba, illa d amedyaz ilemẓi send ad yili d Ameskar. Ittwaṭṭef ɣer lḥebs deg 12 yennayer 1976, ihi yella d lwaḥid d Mass Saεid ferrat iwumi ara fkeɣ awal.”
Mass Saεid Ferrat illan deg yiwen ugraw n ccna anida i d-yefka tinagit-is ɣef umecwar-nsen amẓawan d wayen akk i d-fursen deg wayen iεnan ccna. Ha-t-an wayen i d-yenna: “ihi, nekk lḥiɣ-d amecwar ɣezzifen d Ḥmed imi akken i neɣra deg uɣerbaz alemmas deg wat Iraten, syin nezger ɣer tesnawit akken ayen ittusemman imir-n “école normale”, d acu kan, netta, ḥebsen-as aseggas imi yettwaṭṭef sɣur iǧadarmiyen ɣef ddemma n teqbaylit imi isεa assaɣ yerna ttemyarun akked Tkadimit tamaziɣt illan di Fransa. Syin nekk, sin n yiseggasen seld akkin, ffɣeɣ d aselmad anida nniḍen, dɣa imlal d yiwen umeddakel nniḍen, mass Buεraba ḥmed, dɣa akken i d-xelqen agraw-a n yifguren. Ihi, akka i d-yenna mmi-s, Nnayer, seld ad yili d amaru, yella d win i d-islalen Agraw-a n ccna iwumi ifka isem n Yifguren. Aya aṭas ur t-neẓri ara, ihi awal-a ifguren issagad ladɣa di tallit-nni. Afgur i d-yekkan seg umyag fger yeεni ɣebbi illa d awal n tmacaɣt. Ḥmed ibeddel-as yerra-t d Ifguren iwumi yefka anamek n “yimbuṣa” neɣ wid ibuṣṣan. Nga ihi asekles amezwaru deg yiεeẓẓugen i newwi nessers-itent di Rradyu tis snat anida tella terbeεt ismuzguten i ccnawi imaynuten, ɣef Uqerru-s imir-n d Crif Xeddam. Si tmanya n tezlatin, wwin kan snat acku tizlatin-nni d timḥaddiyin. Neẓra aqerru n tesqamut-a dɣa inuda ad igzu anamek n yisem-a Ifguren, dɣa Crif xeddam iruḥ am win ur yeεǧib ara. Dɣa inna-d ad neṭṭef kan snat n tezlatin. Tiyaḍ ur ttwaqeblent ara. Nnan-aɣ-d kunwi tkecmem di tsertit, aya ur yettwaqbal ara. Nesεa yiwen uɣanib akked Idir. Ihi, d tizlatin timḥaddiyin, ɣef yidles, timetti d wayen akk i aɣ-yerzan s Iqbayliyen d imaziɣen s umata. Nesḥasef d akken mi slan Medden i yisem ifguren, aya issagad. Nessekles daɣen deg ustudyu n Racid d Fetḥi di Talamsan deg yiseggasen n 80. Iwakken ad tt-id-nessufeɣ, necrew tidi merɣen. Γas akken nenneεtab, ur nessaweḍ ara ad naweḍ imeẓẓuɣen d wulawen. Nga tasfift tayeḍ di Fransa anida telḥa s lmendad n Malika Dumran.  Nelḥa acu nelḥa, nerna-d yiwet n tesfift di Uled Fayet ɣer watmaten Turki. Dɣa d tizlatin ara tafem akka tura di BRTV akked iẓedwa inmettiyen. Syin nerra ɣer Fransa anida i nexdem taneggarut akked Rezqi Barudi, netta ittwassnen s wallal n “la baterie”. Nga ihi asemsawi i tezaltin tineggura ideg neḍmeε ad nessekles deg wagguren-a n 2024, lameεna tagnit ur aɣ-tt-tefki ara imi udem agejdan n ugraw iruḥ yeǧǧa-yaɣ. Ihi deg 2010 nhegga tasfift-a, iqqim-d kan uxeddim n Ustudyu, maca akka twalam ur aɣ-tettunefk ara tegnit. Di tallit-nni Illan unemhal amaynut n usegmi, mass Ԑisa Busama, i d-isbedden yiwet n tallilt n yiselmaden n uẓawan n Tizi Wezzu akken ad kkin deg tfaska taɣelnawt n ccna agrawan ideg ikka Ḥmed, Muḥ ssa, Ǧamel Ḥusini d wiyaḍ. Nettekka akken azal n tlata iseggasen ideg newwi araz amezwaru. Mi εeddan tlata iseggasen nni, yusa-d unemhal wayeḍ, Mass Nureddin Xaldi, d win ur nḥemmel ara ayen nxeddem, dɣa issefsex tallit-nni. Seg wass-nni, deg useggas n 2014, di lweqt ideg nezmer ad nkemmel ccɣel-nni, Ḥmed ildi Taẓrigt akken ad iseddu taqbaylit di lkaɣeḍ, yerna ad d-tekk akk ixxamen ma iwulem. Ahat limmer i t-id-nejbid cwiṭ seg umaḍal n tira d udlis, ahat mazal-it ar ass-a, imi isεedda kra n tallit qessiḥet d tedyant iɣef ur yebni anida yeḥkem fell-as ccreε s useggas n lḥebs d yiwet n leɣrama meqqren…. maca aya d tamijelt….”
Deg wid merra i d-yusan, llan iqerra n tmesriyin n udlis ama deg wat wasif, ama di Buǧima i d-yefkan tinagit-nsen, illa lmir n Buǧima, Mass Smaεil Buxerrub, i d-igan ula d netta tinagit-is ɣef wamek imlal d Mass Nekkar. Inna-d Imeslayen-a : “  d adlis i yi-semlalen akked Mass Nekkar, d leḥmala n udlis i aɣ-issemlalen. Teẓram aɣref ur neqqar ara ur yezmir ad ifrez imal, ur yezmir ara ad ixẓer ɣer sdat. Ihi, Ḥmed d ameɣnas, iteg lecɣal s leḥmala. Am wakka i t-id-nesla, ittwaḥbes ɣef ddemma n leḥmala i iḥemmel Taqbaylit-is. Ihi, ikcem deg unnar n udlis akken ad issider s wamek izmer aẓar-is d teqbaylit-is. Ayen i aɣ-d-issemlalen ass-a d ayen ixdem seg temẓi ar ass-a, dɣa nessaram d akken ayen i d-yeǧǧa ad yaɣ tiɣaltin merra n Tmurt akken aman n tussniwin i yellan deg yidlisen-is ad awḍen ɣer tebḥirin n wulawen n yiqbayliyen. Tamesrit n udlis i d-nga di Buǧima nga-tt-id s lqella d lεella, maca llan wid i aɣ-d-yefkan afud seg-sen Ḥmed Nekkar i d-yeqqaren yal tikkelt aql-in da. Tura ilaq-aɣ ad nettleqqim di ccfawat akken ur ntettu ara ayen xedmen wiyaḍ fell-aɣ.”
Terna-d awal Massa illan d tanemhalt n tmesrit n udlis n Buǧima awal-a: “Ḥmed d yiwen ittḥezziben, d asusam. Ayen ixdem di tmesrit n udlis ladɣa n Buǧima ur t-ntettu ara.”
Inebgi aneggaru d Mass Murad at weḥmed imi iḥder ula d netta di tejmilt-a i as-gan: “Tenna-d Massa yiwen n wawal am acekkit: d argaz asusam yerna ittḥezzib. Nekk ad d-iniɣ icuba imɣi yemɣin. Imɣi imeqqi war ma iga zzhir, war ma iga ẓdiḥ. Imɣi-a d imɣi n tussna, ideg tella lfakya. D iseɣ n twacult-is, d iseɣ n teqbaylit.”

Tekfa tejmilt s ubuddu n kra n warrazen i inebgawen igejdanen n tejmilt.

Yura-t-id Murad Mazri i weɣmis Isaḥliyen.