Ussan-iw, ass amenzu

Azul fell-awen! Akken yeqqar bab n uxxam. Alih, ad tt-id-bduɣ sya, ɣef wakken ssneɣ taqbaylit, ladɣa tin nneɣ, tin n yiqzaḥ, ur fhimeɣ ara iwac i as-rennun “fell-ak, fell-am, fell-awen” i wazul! Mi ara as-sleɣ, ssuguneɣ-d “azul-nni” sufell n yiqerra n wid umi t-nenna! Maɛlic.
Xilla n tlufa i d-iguǧǧen s aqerruy-iw segmi rsent tqejjarin-iw deg uxxam-a! Cfiɣ ass amezwaru – ur ɛad yewwiḍ wayyur mi d-ffɣeɣ si tɛebbuḍt n yemma nekk d setta n watmaten-iw – bdiɣ selleɣ i tmaɛayin n yimdanen i yi-d-yezzin.
Tamezwarut i yi-iceɣben, selleɣ ttɛayaren yes-i wid i ten-yecban (medden): ay aqziḥ, a mmi-s n teqziḥt, ay aqjun… dɣa lemdeɣ-d ismawen-iw-nniḍen: aqjun, aberhuc, aydi, ar taggara! Ufiɣ sɛiɣ ddeqs n yismawen.

Taluft-a n usemmi, d taluft gar tlufa n medden; dacu mačči ass-a ara d-nemmeslay fell-as, ar d-yas wass-is.

Ihi, nniɣ-awen, tamezwarut, uhmeɣ amek i ttlaqaben medden wiyaḍ (medden-nniḍen) s yisem-iw! Fehmeɣ am akken diri-yi, axaṭer alamma nnuɣen i asen-qqaren akken! Anagar deg twuɣa i d-beddren isem-iw.

Ma yella bedren-t-id war imenɣi, ssegrayen-as-d awal “ḥaca-k”! Awal-a, mi nudaɣ ad t-fehmeɣ, ufiɣ qqaren-t mi ara d-bedren isem-iw, neɣ mi ara d-inin isem “aɣyul”.

Aɣyul-a yemgarad fell-i cwiya: ɣas yesɛa rebɛa n tqejjirin, ɣezzifit ɣef wayla-w, timeẓẓuɣin-is daɣen ɣezzifit yerna beddent. Ula d tutlayt-is temxalaf ɣef tin-iw, maɛna fehhmeɣ-t… s yiḥulfan. Dacu kan, aɣyul-a, yettbin-iyi-d d leɛbed lɛali meskin, werǧin ẓriɣ-t yexdem kra n diri neɣ yerfa neɣ yenna-d “haw” akken qqareɣ nekk tikkwal ara rfuɣ neɣ ara luẓeɣ.
Yezga yettɛawan bab n uxxam i aɣ-ijemɛen.
Ad d-qqleɣ ɣer wawal “ḥaca-k”, ih, nniɣ-awen mi d-ufiɣ awqed i t-qqaren, fehmeɣ d awal ur nelhi. Ur ẓriɣ ara iwac i d-qqaren “ḥaca-k” i nekkni; ur nexdim kra n yihwah!
Akka i yella lḥal.

Tidet kan, yuɛer-iyi ad fehmeɣ imdanen-a…

Itri, 19/09/2024