Meqqran

Meqqran iḥemmel nezzeh ad iɣer ungalen imsaltuyen. Si zik netta yeqqar tawsit-a n tsekla. Yiwen wass, igzem-itt di ṛṛay: ad yaker ɛemmi-s rnu ad t-ineɣ; akken ad yawi ayen yesɛa d idrimen. Ɛemmi-s yeddenger.

Ixemmem akken iwata i taluft-a: ur ilaq ara akk ad yeɣleḍ, neɣ ad d-yeǧǧ kra n lǧerra ara t-id-yesbanen d amakur. Ibɣa ad ig aya s sshala, ad yawi akk idrimen i yellan deg uxxam war ma faqen-as, imi d netta kan i yesɛa ɛemmi-s yezmer ad iɣellet deffir n tmettant-is. Yeṭṭef ddeqs n wussan: iheyya-d akken iwata, yuɣ-d ttawil s wacu ara yaker rnu ad ineɣ. Yuɣ-d anda ulamek akk ad t-icukk wabaɛiḍ yebɣa ad yaker. Iɛeyyen-d iḍ d ssaɛa melmi ara yeẓdem.

Yewweḍ-d yiḍ-nni. Yeldi ṭṭaq n yiwet n texxamt war ma yesla-yas ḥedd, imi yuwi-d ttawil iwulmen i waya. Yekcem. Tafat n tiziri tɛawen-it ad iɛqel abrid sdaxel n uxxam. Netta yeẓra anda itteffer ɛemmi-s idrimen-is, niqal ad yer srid ɣur-sen! D acu, mi ixemmem, yufa: ilaq ad inadi kra, akken ad d-yesbin d imukar ur nessin axxam i igan annect-nni. D tin i yeḍran, yesferfed akken iwata, yuker-d akk idrimen i yezmer ad yeddem yid-s, yerna yiwen ur as-yesli… Ɛeddant saɛtin mi yeqqel s axxam-is. Ibeddel iselsa-s, yekcem ar wusu zun ur yečči, ur yeswi; ur yukir, ur yenɣi. Netta yeẓra ur t-ttcukuten ara yimsulta, dacu iɛell leḥsab-is: idrimen i d-yuker yerra-ten s anda-nniḍen, ur ten-yuwi ara s axxam-is. Akken i as-yesseḥseb tazwara, ur ilaq ara ad yecceḍ.

Taswiɛt kan yesla i usṭebṭeb ɣef tewwurt! “Ihuh, ur ɛad ya uwḍen-iyi-d yimsulta!” Yekker, yerra iman-is iduqqes-d seg yiḍes. Yeldi tawwurt: —Mass Meqqran Uleflay? —Ih, d nekk. —Sutren-aɣ-d ad ak-nawi yid-neɣ, hatan ttbut. —Ad iyi-tawim! Iwac, d acu i yellan ɛni? —D tukkerḍa. Tukreḍ ɛemmi-k, netta yella iṭallay deg-k, yessusem imi yuggad ad as-txedmeḍ kra, mi teffɣeḍ, yusa-d iccetka fell-ak. Meqqran tuli-t tewreɣ. Ɣas akken iheyya akken iwata, yeɣra acḥal d ungal amsaltu, yettu ayen ur d-yuwi ad yettu: yettu mi ara ifakk tukkerḍa ad ineɣ ɛemmi-s, akken ur yettili ara unagi. Meqqran, akken kan i yeṭṭef idrimen deg ufus-is, yettu aḥric-nniḍen deg uɣawas-is!

Tullist n Fredric Browen, yerra-tt-id ar teqbaylit Mouaissi. N. Azwel-is anaṣli “Fatale erreure.