Layla Ben Sdira (1903-1982)
Leïla Marguerite Georgette Ben Sedira, tlul di Ldzayer tamanaɣt ass n 17 furar 1903. D tin ur d-nettadder ara ass-a di tmurt-nneɣ, la di rradyu, la di tliẓri. Ur d-nettmaktay anwa-tt, ur nesselmad ilemẓiyen-nneɣ agerruj i d-teǧǧa.
D tamezwarut di Ldzayer i yettwassnen di taɣult n udyaẓawan (opéra), tewwi cciεa-ines di Fransa gar 1929 d 1939. Asmi yekker ttraḍ agreɣlan wis sin, terra-tt tmara ad teḥbes maca asmi ifuk umennuɣ tuɣal-d ɣer ccna di taɣult-is. D tin i yennumen tettɣenni deg udyaẓawan n Reims, di Fransa, yerna tella seg wid i d-εerḍen akken ad ḥeḍren adeccen n umezgun deg 1931, tɣenna-d imir-nni yiwen n usekkir (acte) n « lakmé ». Layla Ben Sdira, tella daɣen seg wid i yessnen ad uraren apyanu (piano), win i tt-yettwellihen d Camille Saint-Saëns.
Tella daɣen d tamẓawant tameqqrant. Iεǧeb-as mliḥ uẓawan n zik, d aya i tt-idemren ad turar win n lqern 17 akked win n 18. D yiwet seg yicennayen imeqqranen i yettwassnen di tmurt n Fransa imir-nni. Deg udyaẓawan n Ldzayer i tebda ahanay-ines (spectacle), uɣalen tteεraḍen-tt ɣer dinna acku tettwassen mliḥ. Di lawan-nni, adyaẓawan n Ldzayer, d win i yesεan lqima di Fransa.
Temɣur-d di Ldzayer tamanaɣt, tuɣal teɣra aṭas aẓawan (la musique) ardeqqal tebda ccna deg udyaẓawan amellaɣ (opéra-comique). Maca imir-nni, di tlemmast n lqern wis 20, mačči anagar nettat i yellan ; llan wid yettwassnen mliḥ fell-as, i imucaεen ɣur ugdud am Germaine Feraldy akked Emma Luart, war ma nettu wid i imucaεen deg umaḍal am Fanny Heldy d Gabrielle Ritter-Ciampi ; yerna, wi, cennun di taɣult i teḍfer. Anect-a bac ad nẓer dakken ɣas llan wid yettwassnen fell-as maca tessaweḍ ad d-tekkes adeg gar-asen war leεḍil. Tteεraḍen-tt-id acḥal n tikkal, tecna ula d Chaliapine i yettwassnen seg yimeqqranen.
Maca, ladɣa deg 1934, teɣli-d tezɣent (crise) ɣef udyaẓawan amellaɣ, aṭas i t-yeǧǧan. D aya i tt-idemren ad tbeddel cwiṭ abrid maca ur teǧǧi ara adyaẓawan, tkemmel ccna-ines di Paris neɣ di tmura-nniḍen. Tfures tagnit akken ad telmed iḥricen-nniḍen n uẓawan, tettarra ddehn-is mliḥ ɣer win n Fransa d Ṭelyan n lqern wis 17 d 18. Agdud i as-yettḥessisen, yuɣal yettihriw yerna tuɣal tteεraḍen-tt di yal tama. Tesεa assaɣ d ameqqran d temẓawant Claude Crussard akked ugraw Ars Rediviva ; d wi i d-yerran azal-is, lawan-nni, i uẓawan n zik akken ad t-isssinen medden. Iseggasen, ttεeddayen ; amahil-is, irennu. Tuɣal tettwassen mliḥ di rradyu, ama di Fransa, Ldzayer neɣ Swis (Suisse).
Jeddi-s, Belqasem Ben Sdira (1845-1901), yella d asdawan ifazen di Fransa ; yesɣaray taεrabt, yuɣal yesɣaray asaḍuf (droit) di Ldzayer tamanaɣt. D Camille Saint-Saëns i as-islemden amek ara tewwet apyanu. Asmi d-turar i tikkelt tamezwarut sdat ugdud, tella tesεa 10 n yiseggasen. Asmi tesεa 17 n yiseggasen, truḥ ɣer Paris, tettwaqbal deg « Conservatoire National » anda i yella d aselmad-is Lazare-Lévy (1882-1964) … Layla Ben Sdira, tella d tamaslaḍt (membre) deg udyaẓawan amellaɣ armi d yunyu 1932. Turar aṭas n temlilin (rôles) ; ula d tin n Lakmé turar-itt-id ass n 13 mayu 1931 ; tella d yiwet si tcennayin deg « Masques et Bergamasques » n Gabriel Fauré… Γas akken tmugger uguren deg ubrid-is maca tkemmel ccna ɣef usayes (scène) almi d asmi yekker ttraḍ amaḍalan wis sin … Layla Ben Sdira, tecna i tikkelt tamezwarut akked ugraw n Ars Rediviva i d-yennulfan deg duǧember 1935 ; d tulawin kan i yetturaren deg-s.
Tettekki aṭas n tikkal akked Claude Crussard d Ars Rediviva, tessekles yid-sen kra seg ccna-nsen … Deg 1936, tewwi arraz n « Grand prix du Disque ». Tecna kra n tezlatin n Albert Roussel, Ernest Chausson, Jean-Michel Damase, Pierre Capdevielle. Nenna-d daɣen dakken d tin i yettwassnen aṭas deg rradyu ama di Fransa ama di Swis. Aɣmis n Los Angeles Times, yudder-d akk ayen i texdem ; yerra-tt seg wid i yettwassnen deg umaḍal, deg taɣult n udyaẓawan am Maria Callas, Victoria De Los Angeles, Janet Baker, Kathleen Ferrier d wiyaḍ.
Deg tagara n yiseggasen n 1950, tefra-tt di rray-is ad tesselmad ccna. Timsirin-is, tetteg-itent deg tmudrut-is (appartement) deg Rue des Beaux-Arts, di Paris anda temmut ass n 1 yunyu 1982. Tettwamḍel deg tjebbant (timeqbert) n Saint-Nom-la-Bretèche, deg utaram n Paris.
Σabdennur Ḥamituc. D aselmad di tesnawit n Busaεa Σabderreḥman, Adekkar