Amaynut di tsekla taqbaylit: ” ungif i yeddan εeryan” d ammud n tullisin n Mass Abdelkarim Tahraoui

D ammud n tullisin i d-yeffɣen deg wussan iεeddan ɣer teẓrigin Talsa

-Taduli n udlis d imḍebber n teẓrigin Talsa i tt-ixedmen

– Ammud-a deg-s 7 n tullisin

1) Ungif yeddan εaryan.

2 )Asirem 3 )

Aceyyad 4 )

Leḥsan d Ḥsen

5 )Ddunit treffed tesrus

6 )Taddart n tẓuṛi

7 )Tagelda n teẓgi

Tukkist 1 : 

[…] Telliḍ d argaz s terrugza-k, tuɣaleḍ d ungif i yeddan εeryan. Ẓriɣ kečč d aqbayli, tessneḍ taqbaylit niɣ ala? At zik nnan : « Win yelsan ayen i t-yexḍan, yif-it win yeddan εeryan», wi ulac lxir deg-sen,  kksen-aɣ idles-nneɣ d tmagit, εewwlen ad snegren aẓar. Win i ten-iḍefren, leqrar-is ad yeddu εeryan. Ruḥ qqel s axxam-ik, ha-t-a uqcuc ɣef tuyat-ik, anagar netta kan ara k-iɣummen tafekka-k.

Ungif, yeddan εeryan, yuɣal-t-id leεqel-is, yegza i wawal atemman, yis-s yesnemmer bab n wawal d wazal : — Tanemmirt-ik a dda! Asmi qqneɣ ɣer uɣerbaz nnig lkanun, cbiɣ tizzya-w, ččureɣ tirrugza-w, tamuɣli n medden ɣur-i s wazal-is. Limer umneɣ s wayla-w, ass-a ur yi-tḍerru akka, limer fkiɣ azal i yiselsa-w, ur tettεerri tfekka-w.

#Tullist_1 : Ungif i yeddan εeryan , Sb : 16

Tukkist 2:

Agujil ur t-ččin yiqzaḥ, igenwan seḥbabren fell-as, rnan-as timusniwin. Yelmed ddunit deg ubrid-nni n baba-s, win i d-yeḍfer netta d dadda-s, izbel-d s uceyyed, yeqla-d. Yumer, tumer yemma-s, mmi-s d argaz, xas akken d aqcic ur yewwiḍ. D wa i d adrar n nnif, irebba-d argaz n yiseɣ, d tmeṭṭut yesullin  axxam s ttbut, isekkilen-a win i ten-yuran, d netta i yeknan i udrar i t-id-yessekkren. Azul ay adrar-iw deg-i tuklaleḍ annuz.

Afud iǧehden i umeskar deg umecwar-is n tira.

Nura Tafat