Awal ɣef tmarut Samira Ḥusini Ɛebdelmalek d tɣuri n wungal-ines “Asmekti …”
Samira Ḥusini Σebdelmalek, d yelli-s n taddart n Tnalt, taɣiwant n Yimsuḥal, asun n Yiferḥunen. Tewwi-d akayad n lbak deg useggas n 2003.
Tkemmel leqraya-s di tesdawit n Mulud Mεemri deg ugezdu n tutlayt d yidles n tmaziɣt, syin i d-teffeɣ s ugerdas n turagt (licence).
Tebda aselmed deg uɣerbaz amenzu deg useggas aɣurbiẓ 2007-2008. Deg 2010, teqqel d taselmadt di tesnawit ; mazal-itt dinna ar ass-a. Tebda tira deg useggas n 2015 maca almi d meɣres 2018 i tessaweḍ ad d-tsuffeɣ adlis-ines amezwaru (d ammud n tullisin) iwumi tsemma “Tilufa”.
Deg useggas n 2022, tura yiwet n tneqqist “Minuca deg teẓgi n lehna”. Tewwi arraz amezwaru di temsizzelt n Belεid At Σli i d-tettheyyi tesbeddit “Tiregwa” n tmurt n Kanada deg useggas n 2022 s tullist “Anebdu n wurɣu”.
Deg wungal-ines “Asmekti, tidyanin d txidas”, tessemres aɣanib ushil, ara yezmer ad iɣer yal yiwen ; d aya ara aɣ-yeǧǧen ad nfak zik taɣuri-ines. Ungal, deg-s 141 n yisebtar. Nezmer ad d-nini dakken tadyant i d-tules deg-s tmeskart tettezzi ɣef yiwet n twademt tagejdant iwumi tsemma “Nasira”. Γur-s meḥsub i qqnen akk yineḍruyen yellan daxel.
Maca s tudert i nessen ɣef Nasira deg wungal-a ad d-naf dakken ggten yisental i yellan di tudert am wazal n tmeṭṭut di tmetti. Amek ttwalin medden tin i ixeddmen, ma d ayen yelhan neɣ uhu. Ugur d temɣart i yesεan lεeqliya n zik d userwes-ines ɣer tudert tatrart i tettidir Nasira. Tismin n tlawin fell-as. D aya ara yeǧǧen ad tesεu uguren d twacult-is maca tettḥadar iman-is.
Mi iεedda wakud, yesken-as-d Yuc udem n tnuḍt-is “Wiza” s tidet. Seg tama, tettak-as-d udem lεali ; seg tama-nniḍen, mi ara tetteffeɣ ad tmahel, ad tettεemmir tamɣart-is akken ad tt-tɣuc. Γas akken tettεawad-as i urgaz-is dacu as-txeddem Wiza maca netta yettsebbir-itt, yeqqar-as dakken tindemmit ad d-terzu ɣur-s deg tagara.
Deg wungal-a daɣen temmeslay-aɣ-d daɣen ɣef wassaɣ n Nasira waḥi d yibalmuden-is, tezdi-ten lemḥibba d leqder. Tekkat yal ass ad ten-twessi ɣer yiberdan yelhan. Deg tallit n unebdu, tḥuza tmes taddart-is ; qrib tedda terwiḥt-is nettat d warraw-is. Argaz-is, imir-nni, yeḥbes amahil di tniri (sseḥra), yuɣal-d yettmahal anda yeqreb ɣer uxxam-is akken ad yettili sdat n twacult-is.
Negra tamawt belli tessemres tmeskart aṭas n yinzan, d aya i aɣ-yeǧǧan ad d-nelmed kra seg-sen acku ad ten-nesri di tudert-nneɣ n yal ass.
Inzi, ɣur Yiqbayliyen, yesεa azal meqqren yerna win i t-ismersen yif asugget n umeslay. Ha-ten-a kra seg-sen :
“Wissen ma d ayen i nexdem ay nennul neɣ d ayen i iketben asmi nlul.”
“Taεekkazt, ad ak-tt-rquɣ rnu-yas aseḥlelli.” “Azzel neɣ ɣiwel ; lmektub, ad d-yessiwel.” “Zzwaǧ n walag, d amedlalag.” “Zzwaǧ am uslu, win yekkren ad t-yeḍlu.”
“Bu yiseɣ deg uɣbel ar iri ; bu lεar, ileḥḥu bennegni.”
“Ay argaz, ay ameɣbun i ikessen di lexla am userdun , deg uxxam, ur yeẓri dacu i iḍerrun.”
“Tanuṭ, am uɣerda n uculliḍ ; ma ur tečči awren, ad am-tečč awejjiḍ.”
“I yettamnen tanuṭ ala taεluḍt.”
“Ur tseεεuḍ ara tislit alamma teččiḍ tisegnit.” “Win yettwalasen ad ixelles deg tara neɣ di tagara.”
“Ay iles yellan d aksum, d acu ara k-yerren d iɣes.”
“Amer ur yettxellis wara, yili ad xeddmeɣ kan di tberdedda.”
“Iɣes ḍegreɣ, win yebɣun isumm-it.”
“Win ileḥḥun ɣef nnif, irewwu lḥif.” (Ccix Muḥend Ulḥusin).
“Muqqel ssadqa, taɣeḍ yelli-s.”
“Awal aziḍan, iteṭṭeḍ tasedda.”
“Anef i umcum ad iεeddi, ad tt-in-yaf anda tt-yundi.”
“Tettɣab ccbaḥa n wulawen asmi ara d-tban tebrek n wulawen.” “Ttaxliqa n uxellaq ; tiyita, ur tlaq.”
Σabdennur Ḥamituc.
D aselmad di tesnawit n Busaεa Σabderreḥman, Adekkar.