Gar Σactarut d lmasiḥ

Gar tebḥirin d yiɣallen yewḍen alarmi d ijufaṛ n Birut, tella yiwet n tqerrabt n yimasiḥiyen d taqdimt, ɣzan-tt deg wul n yiwet n teẓrut tameqqrant, tezga-d gar yisekla n lluz d uṣefṣaf, d tzemrin. Taqerrabt-a, tebεed cwiya ɣef ubrid n ukerrus. Mačči aṭas n medden i tt-yessnen ; ula d imussnawen yettnadin di latrat iqburen mačči aṭas i as-d-yerran s lexber.

Am waṭas n tɣawsiwin di Surya, keččment deg uxnac n ustehzi d tatut. Win ara ikecmen ɣer tqerrabt-a, ad yaf deg uɣrab n tama n usamar yiwet n tewlaft s tmuẓayikt. Ifassen n bu snat tqejjirin, ssawḍen ad sfesden, ad beddlen kra si tawlaft-a ; d tawlaft, tessunneɣ-d illu n tayri d ccbaḥa Σactarut (D illu n tayri d ccbaḥa ɣur Yikenεaniyen d Yifniqiyen.. Yeqqim ɣef ukersi, Yerra aɛnac ɣef uqerruy-is, zzint-as-d 07 n tεezriyin ɛeryan, tamezwarut terfed asafu, tis snat d agambar, tis tlata nnafex n lebxur, tis rebεa tasagemt n ccrab, tis xemsa d tafettust n yijeğğigen, tis setta d tazeggart, tis sebεa d tamerwast d uneccab. Akken ma llant ssikident deg yillu-nni s tmuɣli n anεam umaɛlik. Di tama tayeḍ, deg uɣrab wayeḍ, tawlaft n Lmasiḥ, yettwarrez ɣer umidag (La croix) ; ɣer tama-ines, yemma-s Lalla Meryem, tettban-d tennuɣna d snat n tlawin ttrunt. Tawlaft-a, tettban-d xir n tmezwarut-nni acku d tagi i d tamaynut. Tawlaft-a n tallit tabiẓantit, tettwajerred di lqern wis xemsa neɣ wis setta.

Deg uɣrab n umalu n tqerrabt-a, snat n tekwatin, keččmen-d seg-sent yiẓenẓaren n tafukt, kkaten srid ɣur-s, rennu-asent-id di cbaḥa. Di tlemmast n tɣerɣet, yiwet n teblaḍt d tameqqrant ; ɣef leryuf-ines, ttwajerden deg-s kra n tira d kra n tewlafin d tiqburin, ttwaḍlent s yidammen yeqquren deg umkan-nni, d ayen i d-yeskanayen dakken imezwura zellun iseflan-nsen, s ufella n teblaḍt-a, smarayen s ufella-ines ccrab, leɛter akked zzit. Di tqerrabt-a n Yimasiḥiyen, ur tufiḍ dacu yellan-nniḍen, ḥaca yiwet n tsusmi talqayant, yiwet n tewkilt i d-yettbeyyinen tazmert d trebbanit, tessawal tasusmi, tessawal war awalen, tettales-d asirem n tsutwin i iɛeddan d umecwar n yigduden seg waddad ɣer wayeḍ, seg usɣan yer wayeḍ, si tallit ɣer tayeḍ, tettawi wid yukin, wid yeṭṭurcen ɣer yiwen n umaḍal i ibeεden, tettarra afaylasuf yettamen dakken amdan yezmer ad yamen s wayen ur ẓrint wallen-is. Yettxayal-d ayen ur teẓri tiṭ-is, ur ṭṭifen yifassen, yessunuɣ-d kra n yizamulen ideg d-yessugen ayen yefren daxel-ines, ibennu lexyalat s wawal d cnawi d tewlafin d-yettbeyyinen tuɣrist di tudert nnig lqaεa, d tuɣrist daɣen deffir n tmettant.

Yusef Σacuri. Ungal : Igider amerẓu. D tasuɣilt n wungal Ǧebran Xalil Ǧebran : الأجنحة المتكسرة. Isebtar : 85-87. Tiẓrigin : Imtidad