At Yenni: tettwasbedd ass-a tmenzit n unaẓur Idir

Ilmend n usmekti amezwaru n tmettant n Yidir. Taɣiwant n At Yenni, s ufus n tallelt n yiseqquma n tudrin, akked teddukliwin n At Yenni, rran tajmilt s wazal-is i mmi-s n At Leḥsen.

Ayagi imi sbedden tanezzayt n wass-a yiwet n tmenzit (stèle) n Yidir. Taneggarut-a tesbyyin-d anaẓur ibedd, izdi lqedd-is, am akken yella di tudert-is. Imi d bu lhiba d tissas, ur ikennu, ur yettruzu.

Ula deg yiwet n tezlit-is, yenna-d ” ɣurwet win iberrun i ttbel deg waman “.

Ddeqs n wid i t-iḥemmlen i d-yerzan i tfugla-a, i wakken ad as-inin belli deg ulawen-nneɣ mazal-ik ad tidireḍ i lebda. Ama d wid i d-yusan seg At yenni neɣ berra-s, yeɣli-d leḥzen ɣef wudmawen-nsen.

Γas ma yella iziɣer-is iruḥ, maca netta d wayen i d-yeǧǧa, ad qqimen d asmekti n lεali. Sgunfu di talwit ay anaẓur-nneɣ.