Tidukkla ” Asaki ” n Ticci: asarag askasi akked Racid Ulebsir

Tettkemmil tdukkla tadelsant ” Asaki ” n Ticci deg wahil-is amerkanti, abeεda deg wayen yeεnan isaragen.

Ihi, seld n ddeqs n yisaragen i d-yellan akked wudmawen yettwassnen deg wannar n tira d timeɣnest ɣef tmaziɣt d teqbaylit, am Ǧamel Laseb, Lεerbi Yeḥyun, Amin Zawi d wiyaḍ.

Tikkelt-agi timlilit ad d-tili akked Dda Racid Ulebsir, ass n 08 mayu i d-iteddun.

D yiwen n umaru i d-yefkan aṭas i teqbaylit. D amnadi deg umezruy amaziɣ, d aneɣmas, d win i yefkan azal meqqren i wansayen-nneɣ.

Yeṭṭef nezzeh deg leεwayed n lejdud. Ula d tira-s dɣa, tcudd ɣer waya s ufmiḍi ageεmir. Ama s tutlayt tarumit, neɣ s tin-nneɣ taqbaylit.

I yisalli, asarag-a ad d-yili deg uxxam n yidles ” Idir Ɛacur” di Bakaru. Ma yella d askasi, asentel-is ɣef tneflit idumen n taddart Taqbaylit (développement durable du village Kabyle).

War ccek d timlilit taseklant s wazal-is, ilit ihi di ttiεad.